Read Ўзбек тилидаги Муқаддас Китоб, 2013 Ибтидо 13 Bible Online

Ибтидо 13 - Ўзбек тилидаги Муқаддас Китоб, 2013 bible

Ибтидо 13

¹Шундай қилиб, Ибром[84] хотинини, жияни Лутни ва бор мол–мулкини олиб, Мисрдан чиқди ва шимолга — Нагав чўлига[85] йўл олди.

²Ибром энди жуда бойиб кетган, мол–қўйлари, кумушу олтини кўп эди.

³У Нагав чўлидан Байтилга боргунича бир жойдан иккинчи жойга кўчиб юрди. Ниҳоят, Байтил билан Ай оралиғига[86] етиб келди. У олдин ҳам шу ерда чодир тикиб,

⁴қурбонгоҳ қурган эди. Ибром ўша ерда яна Эгамизга сажда қилди.

⁵Ибром билан бирга кетаётган Лут ҳам жуда бой бўлиб, мол–қўйлари, кўплаб чодирлари бор эди.

⁶Икковлари чорваси билан бир жойда яшашлари учун ер торлик қилиб қолди.

⁷Қолаверса, Ибромнинг чўпонлари билан Лутнинг чўпонлари ўртасида жанжал чиқиб қолди. Бу пайтда ўша юртда Канъон ва Париз халқлари яшардилар.

⁸Шунда Ибром Лутга деди:— Менинг чўпонларим билан сенинг чўпонларинг ўртасида жанжал бўлмаслиги керак. Ахир, биз яқин қариндошлармиз.

⁹Нима қилишимиз лозимлигини мен сенга айтай. Сен мана шу ердан яхши жойини керагича танлаб ол, кейин бир–биримиздан ажралайлик. Агар сен чап томонга кетсанг, мен ўнг томонга кетаман, агар сен ўнг томонга кетсанг, мен чап томонга кетаман.

¹⁰Лут Зўвар томондаги Иордан водийсининг серҳосил текисликларига қаради. Ҳаммаёқ серсув, гўё Эгамиз яратган боққа[87] ва Мисрнинг ажойиб ерларига ўхшарди. Эгамиз Садўм ва Ғамўра шаҳарларини вайрон қилмасдан олдин водий шунақа эди.

¹¹Шундай қилиб, Лут Иордан текисликларини танлади ва шарқ томонга кетди. Шу тариқа Ибром билан Лут бир–биридан айрилдилар.

¹²Ибром Канъон юртида ўрнашди, Лут эса Иордан текисликларидаги шаҳарлар орасига ўрнашиб, чодирларини Садўм ёнига кўчирди.

¹³Садўм аҳолиси қабиҳлик қилишар, Эгамиз олдида қаттиқ гуноҳкор эдилар.</p>

¹⁴Лут Ибромдан айрилиб кетгандан кейин, Эгамиз Ибромга деди:— Мана шу турган жойингдан шимолга, жанубга, шарққа ва ғарбга қара.

¹⁵Сен кўриб турган ҳамма ерни сенга ва сенинг наслингга абадий мулк қилиб бераман.

¹⁶Мен сенинг наслингни ердаги қумдай кўпайтираман. Кимки ердаги қумни санай олса, сенинг наслингни ҳам санай олади.

¹⁷Қани, отлан, юртни айланиб чиқ. Мен бу юртни сенга мулк қилиб бераман.

¹⁸Шундай қилиб, Ибром чодирини йиғиштириб, Хеврондаги[88] Мамре номли муқаддас эманзор[89] ёнига келди ва ўша ерда ўрнашди. У ерда Эгамизга қурбонгоҳ қурди.