Read Ўзбек тилидаги Муқаддас Китоб, 2013 Шоҳлар 2 20 Bible Online

Шоҳлар 2 20 - Ўзбек тилидаги Муқаддас Китоб, 2013 bible

Шоҳлар 2 20

¹Ўша пайтда Бенямин қабиласидан Шеба деган ярамас бир одам шу ерда — Гилгалда эди. У Бихри деганнинг ўғли эди. Шеба бурғу чалиб, шундай хитоб қилди:“Эссай ўғли Довуднинг бизга ўтказиб қўйган жойи йўқ,Бизнинг ҳам ундан қарзимиз йўқ!Эй, Исроил[115] эрлари, ҳамма ўз уйига қайтсин!”

²Шундан кейин жамики Исроил одамлари Довудни тарк этиб, Шебага эргашиб, кетиб қолишди. Яҳудо халқи эса ўзларининг шоҳига содиқ қолиб, Иордан дарёсидан Қуддусгача унга ҳамроҳ бўлишди.

³Шоҳ Довуд Қуддусдаги саройига етиб боргач, саройга қараб туринглар, деб қолдириб кетган ўнта канизагини[116] алоҳида уйда сақлашни буюрди. Довуд уларни боқди, лекин бирортаси билан бирга бўлмади[117]. Канизаклар эса умрларининг охиригача назорат остида, бева хотинлар каби яшадилар.

⁴Шундан кейин шоҳ Довуд ўз лашкарбошиси Эмосага:— Уч кун ичида Яҳудо халқини ҳузуримга чақириб кел, ўзинг ҳам шу ерда бўл, — деди.

⁵Эмоса Яҳудо халқини чақириб келишга кетди. Аммо белгиланган вақтда қайтиб келмади.

⁶Шундан сўнг Довуд бошқа лашкарбошиси Абушайга деди:— Энди Шеба бизга Абсаломдан ҳам оғирроқ кулфат келтиради. Менинг одамларимни олиб, Шебанинг орқасидан қувла. Акс ҳолда у мустаҳкам шаҳарга ўрнашиб олиб, биздан яширинади.

⁷Ўша заҳоти Абушай Шебани тутиб келиш учун Қуддусдан чиқди. У Йўабни ва унинг одамларини, Харетлик ва Палатлик қўриқчиларни[118], ҳамма ботир сипоҳларни ёнига олди.

⁸Улар Гивондаги[119] катта қоянинг ёнига етиб борганда, Эмосани учратиб қолдилар. Йўаб жанг кийимларини кийиб олган эди. Кийимининг устидан камар боғлаган, ханжарини қинига солиб, камарига осиб олган эди. У Эмосанинг олдига сўрашиш учун қадам ташлади–ю, яширинча ханжарини қинидан суғурди.Йўаб Эмосага:

⁹— Яхшимисан, иним? — деди–ю, гўё уни ўпмоқчи бўлиб, ўнг қўли билан Эмосанинг соқолидан ушлади.

¹⁰Эмоса Йўабнинг нариги қўлида ханжар борлигини сезмай қолди. Йўаб ханжарини Эмосанинг қорнига тиқиб юборди, Эмосанинг ичак–човоғи ерга тўкилди. Иккинчи марта ханжар уришига ҳожат қолмади, Эмосанинг жони чиқиб бўлган эди.Шундан кейин Йўаб билан акаси Абушай Шебани қувлашда давом этишди.

¹¹Йўабнинг одамларидан бири Эмосанинг жасади тепасида туриб:— Йўабга ким содиқ бўлса, ким Довуд тарафида бўлса, Йўабнинг орқасидан борсин, — деди.

¹²Эмосанинг жасади қонга беланиб йўлнинг ўртасида ётар, ҳар бир одам жасадга яқинлашганда, унинг тепасида тўхтаб қоларди. Йўабнинг ҳалиги гапирган йигити бу аҳволни кўриб, Эмосанинг жасадини судраб йўл ёқасидаги далага олиб бориб ташлади, устига кийим ташлаб қўйди.

¹³Жасад йўлдан олиб ташлангандан сўнг, ҳамма Шебани қувлаб, Йўабнинг ортидан кетди.

¹⁴Шу орада Шеба ҳамма Исроил қабилалари ерларини босиб ўтиб, Овил–Байт–Махо шаҳрига[120] етиб келди. Бихри уруғининг[121] ҳаммаси Шебага эргашиб, шаҳарга кириб олишди.

¹⁵Сўнг Йўаб ҳамма одамлари билан Овил–Байт–Махога бориб, ўша шаҳарни қамал қилиб, шаҳар деворига қиялатиб тупроқ уйдилар[122] ва тепага чиқиб девортешар қурол билан деворни йиқита бошладилар.

¹⁶Шу пайт бир доно аёл шаҳар ичкарисидан овоз берди:— Эшитинглар! Қулоқ солинглар! Йўабни айтиб юборинглар, бу ёққа келсин, у билан гаплашмоқчиман.

¹⁷Йўаб аёлга яқинроқ борди.— Йўаб сизмисиз? — сўради аёл.— Ҳа, менман, — деди Йўаб.— Бу чўрингизнинг сўзларини эшитинг! — деди аёл.— Қулоғим сенда, — деди Йўаб.

¹⁸Аёл гапида давом этди:— Қадимдан “Овил шаҳрида маслаҳат қилинглар” деган гап бўларди, шунга риоя қилиб, ҳамма ҳар қандай ишларини ҳал қилишарди.

¹⁹Биз Исроилнинг тинчлигини истаган содиқ кишилармиз. Сиз эса Исроилда онадай бўлган шаҳарни вайрон қилмоқчисиз. Нимага Эгамнинг меросини йўқ қилиш сизга керак бўлиб қолди?

²⁰— Худо сақласин! — деди Йўаб, — вайрон қилмоқчи ёки бутунлай йўқ қилмоқчи эмасман.

²¹Ҳечам ундай эмас. Эфрайим қирларидан Бихри ўғли Шеба деган одам шоҳ Довудга қарши исён кўтарган эди. Фақат ўшани берсангизлар бўлди, мен шаҳардан тинчгина кетаман.— Унинг бошини девордан ошириб, сизга ташлашади, — деди аёл.

²²Сўнг аёл бутун шаҳар аҳлига ўзининг доно гапларини етказди. Шаҳар аҳли Шебанинг бошини кесиб, девордан ошириб Йўабга ташлади. Йўаб бурғусини чалди. Йўабнинг одамлари шаҳардан чиқиб, уйларига қайтиб кетишди. Йўаб ҳам Қуддусга — шоҳнинг ёнига жўнади.</p>

²³Йўаб бутун Исроил қўшинининг лашкарбошиси эди. Ёҳайидо ўғли Бинаё эса Харетлик ва Палатлик қўриқчиларнинг сардори эди.

²⁴Одонирам[123]қароллар устидан масъул, Охилуд ўғли Ёҳушафат мушовир[124] эди.

²⁵Шаво — котиб, Зодўх билан Абуатар — руҳоний,

²⁶Ёвирлик Эро ҳам Довуднинг руҳонийси эдилар.