Read Ўзбек тилидаги Муқаддас Китоб, 2013 Шоҳлар 2 5 Bible Online

Шоҳлар 2 5 - Ўзбек тилидаги Муқаддас Китоб, 2013 bible

Шоҳлар 2 5

¹Жамики Исроил қабилалари Хевронга — Довуднинг ҳузурига келиб шундай дейишди:— Биз ҳам сизнинг жигарингизмиз.

²Илгари Шоул шоҳимиз бўлганда ҳам, урушларда Исроил лашкарига ўзингиз бош бўлар эдингиз. Эгамиз сизга: “Сен халқим Исроилнинг чўпони бўлиб, уларни боқасан, Исроилга сен раҳнамолик қиласан”, деб ваъда берган эди.

³Шундай қилиб, Довуд Хевронда Исроил оқсоқоллари билан Эгамиз олдида аҳд қилди. Исроил оқсоқоллари Довуднинг бошига мой суртиб, уни Исроил устидан шоҳ қилиб кўтаришди.

⁴Довуд ўттиз ёшида шоҳ бўлиб, қирқ йил шоҳлик қилди.

⁵Хевронда етти йилу олти ой Яҳудо устидан, Қуддусда эса ўттиз уч йил бутун Исроил ва Яҳудо устидан шоҳ бўлди.

⁶Шоҳ Довуд одамлари билан Қуддусда яшаётган Ёбус халқига қарши отланганда, улар Довудга: “Сен бу ерга кира олмайсан, ҳатто орамиздаги кўрлар билан чўлоқлар ҳам сени орқангга улоқтириб юборади”, дейишди. Ёбус халқи: “Довуд шаҳримизни босиб ололмайди”, деб ўйлаган эди.

⁷Аммо Довуд Сион қалъасига[30] бостириб кириб, қалъани эгаллади. Кейинчалик бу қалъага “Довуд қалъаси”, деб ном берилди.

⁸Ўша куни Довуд одамларига шундай деди:— Кимки Ёбус халқини енгмоқчи бўлса, шаҳарга қувур орқали кириб, “чўлоқ” ва “кўр” Ёбусларга ҳужум қилсин. Уларни кўргани кўзим йўқ.” Шу сабабдан: “Кўрлар билан чўлоқлар Худо уйига кирмайди”, деган гап пайдо бўлган.

⁹Шундай қилиб, Довуд қалъани эгаллаб, бу ерни “Довуд қалъаси”, деб атади. У Милло деган жойдан[31] бошлаб бутун шаҳар атрофини девор билан мустаҳкамлади.

¹⁰Довуд тобора кучайиб борарди, чунки Парвардигори Олам — Эгамиз унга ёр эди.

¹¹Тир[32] шоҳи Хирам Довудга элчилар жўнатиб, садр ёғочларини, дурадгорлар ва тош терувчиларни ҳам йўллади. Улар Довудга бир сарой қуриб беришди.

¹²Довуд энди билдики, Эгамиз уни Исроил устидан шоҳ қилиб тайинлаган экан, Эгамиз Ўз халқининг ҳақи–ҳурмати учун унинг шоҳлигини юксалтирган экан.

¹³Довуд Хеврондан Қуддусга келгандан кейин, бу ерда яна канизаклар[33], хотинлар олди, улардан янада кўп ўғил–қизлар кўрди.

¹⁴Довуднинг Қуддусда туғилган фарзандлари қуйидагилар эди: Шимо[34], Шўвав, Натан, Сулаймон,

¹⁵Йибхар, Элишува, Нафах, Ёфия,

¹⁶Элишама, Элёдах ва Элифалет.</p>

¹⁷Филистлар: “Исроил халқи Довудга мой суртиб шоҳ қилишибди” деган хабарни эшитишди. Шундан кейин барча Филист лашкари Довудни қидириб жангга отландилар. Довуд бу хабарни эшитиб, муҳофаза қўрғонига чиқди.

¹⁸Филистлар келиб, Рафа сойлигида[35] ёйилдилар.

¹⁹Довуд Эгамиздан:— Филистларга ҳужум қилайми? Уларни қўлимга берасанми? — деб сўради[36]— Ҳужум қил! — деб жавоб берди Эгамиз Довудга, — уларни албатта қўлингга бераман.

²⁰Шундай қилиб, Довуд Баал–Перазимга кетди ва у ерда Филистларни тор–мор қилди. Кейин шундай деди:— Сув тўғондан тошиб далани босгани сингари, Эгам ғанимларимни босиб, олдимдан улоқтириб юборди.Шу сабабдан бу ерга “Баал–Перазим”[37] деган ном берилди.

²¹Филистлар ўша ерда бутларини ташлаб қочган эдилар, Довуд одамлари билан ўша бутларни олиб кетди.

²²Ундан сўнг Филистлар яна Рафа сойлигига келиб, жангга шай бўлиб туришди.

²³Довуд тағин Эгамизнинг хоҳиш–иродасини сўради. Эгамиз эса шундай жавоб берди: “Олд томонидан ҳужум қилма. Уларнинг орқасига айланиб ўтгин–да, мумиёли дарахтлар томондан яқинлашиб бор.

²⁴Мумиёли дарахтлар тепасида қадам товушларини эшитганинг заҳоти уларга ҳужум қил. Ўшанда Мен Филист лашкарини йўқ қилиш учун сенинг қаршингдан чиқаман.”

²⁵Довуд, Эгамиз амр берганидай қилиб, Ғибодан Гезер шаҳригача бўлган жойларда Филистларни тор–мор қилди.