Read Ўзбек тилидаги Муқаддас Китоб, 2013 Шоҳлар 3 4 Bible Online

Шоҳлар 3 4 - Ўзбек тилидаги Муқаддас Китоб, 2013 bible

Шоҳлар 3 4

¹Сулаймон бутун Исроилнинг шоҳи эди.

²Унинг қўл остидаги аъёнлар қуйидагилар эди:Зодўх ўғли Озариё — руҳоний,

³Шишонинг ўғиллари Элихорут ва Охиё — котиб,Охилуд ўғли Ёҳушафат — тарихнавис,

⁴Ёҳайидо ўғли Бинаё — лашкарбоши,Зодўх билан Абуатар — руҳоний,

⁵Натан ўғли Озариё — ҳокимларнинг назоратчиси,Натан ўғли Забуд — руҳоний ва шоҳнинг маслаҳатчиси,

⁶Охисар — сарой бошқарувчиси,Абдах ўғли Одонирам — қаролларнинг бошлиғи эди.

⁷Сулаймоннинг ўн иккита ҳокими бўлиб, улар Исроил ҳудудларини бошқарар, шоҳни ва шоҳ хонадонини озиқ–овқат билан таъминлардилар. Ҳар биттаси йилига бир ой давомида шоҳ хонадонига озиқ–овқат етказиб бериши шарт эди.

⁸Уларнинг исмлари қуйидагича эди:Эфрайим қирларида — Банхур,

⁹Мохаз, Шалбим, Байт–Шамаш, Элўн–Байт–Ханон деган шаҳарларда — Бандахор,

¹⁰Арбўт ва Сўхў шаҳарларида, бутун Хафер ўлкасида — Банхесед,

¹¹Бутун Нафўт–Дўр[28] деган жойда — Банабунадов (Сулаймоннинг қизи Тўфат Банабунадовнинг хотини эди),

¹²Танах ва Махидў шаҳарларида, бутун Байт–Шан[29] ҳудудида — Охилуд ўғли Бано (бу жой Йизрил этагидаги Зоратон шаҳридан Овил–Махла шаҳригача ва Ёхмаём шаҳрининг нариги томонига қадар бўлган ерлардир),

¹³Гиладдаги Рамўт шаҳрида — Бангебер, шунингдек, Манаше ўғли Ёвир уруғига қарашли Гилад ўлкасидаги қишлоқлар, Башан ўлкасидаги Аргоб ҳудуди, девор билан ўралган ва дарвозаси бронза тамба билан мустаҳкамланган олтмишта катта шаҳар ҳам унга қарарди.

¹⁴Моханайим ерларида — Иддо ўғли Охинадов,

¹⁵Нафтали ҳудудида — Охимас (у Сулаймоннинг қизи Босиматга уйланган эди),

¹⁶Ошер ҳудудида ва Болўт шаҳрида — Хушай ўғли Бано,

¹⁷Иссахор ерларида — Парувах ўғли Ёҳушафат,

¹⁸Бенямин ерларида — Эла ўғли Шимах,

¹⁹Гилад ўлкасида — Ури ўғли Гебер. Бу юртда Сихўн — Амор халқининг шоҳи, Ўг — Башан шоҳи бўлган эди.Яҳудо юртининг ўз ҳукмдори бор эди[30].</p>

²⁰Яҳудо ва Исроил халқи шу қадар кўп эдики, гўё денгиз қирғоғидаги қумни эслатарди. Улар еб–ичиб, хурсандчилик билан яшашарди.

²¹Сулаймон Фурот дарёсидан Филистлар ерига ва Миср чегараларига қадар бўлган ҳамма ўлкаларда шоҳлик қиларди. Бу ўлкалардаги халқлар Сулаймонга ўлпон тўлаб, умр бўйи унга тобе бўлдилар.

²²Сулаймон хонадонининг бир кунлик озиғи қуйидагича эди: 300 тоғора[31] сифатли ун ва 600 тоғора[32] кепакли ун,

²³оғилхонада боқилган семиз молдан 10та ва яйловда боқилган буқадан 20та мол, 100та қўй, булардан ташқари, буғулар, кийиклар, оҳулар, семиз паррандалар.

²⁴Фурот дарёсининг ғарбидаги Тифсахдан Ғазо шаҳрига қадар бўлган ўлкаларда, дарёнинг ғарб томонидаги ҳамма шоҳлар устидан Сулаймон ҳукмрон эди. Атрофдаги ҳамма юртлар билан алоқаси яхши эди.

²⁵Сулаймон ҳаётлигида Дандан Бэршэвага қадар бўлган Яҳудо ва Исроил юртидаги ҳар бир одам ўз узумзорида, ўз анжир дарахти остида тинчгина умр кечирарди.

²⁶Сулаймоннинг отхоналарида жанг аравалари учун тўрт минг[33] оти, ўн икки минг учқур отлари бор эди.

²⁷Ўша ўн икки ҳокимнинг ҳар бири шоҳ Сулаймонни, шоҳ Сулаймоннинг дастурхонидан таом ейдиганларнинг ҳаммасини белгиланган ойда озиқ–овқат билан таъминларди, бирорта ҳам камчиликка йўл қўйишмасди.

²⁸Ҳар бири ўзининг навбати келганда шоҳ тайинлаган ерга[34] жанг араваларининг отлари ва бошқа отлар учун арпа, сомон ҳам олиб келишарди.

²⁹Шундай қилиб, Худо Сулаймонга денгиз қирғоғидаги қум каби чексиз–чегарасиз донолик, идрок, тенгсиз ақл берди.

³⁰Сулаймоннинг донолиги бутун шарқ халқларининг донолигидан, бутун Миср халқининг донолигидан ҳам ортиқ эди.

³¹У ҳамма инсонлардан, Зерах уруғидан бўлган Этхандан, Мохул ўғиллари Хаман, Қолкўл, Дардахдан ҳам доно эди. Атрофдаги ҳамма халқлар орасида унинг донғи кетган эди.

³²У 3000 матал, 1005та қўшиқлар ижро этди.

³³У Лубнондаги садр дарахтидан тортиб деворда ўсган иссопгача, қўйингки, жамики дов–дарахтлар, ҳайвонлар, қушлар, судралиб юрувчилар, балиқлар ҳақида сўз юритарди.

³⁴Дунёдаги ҳамма шоҳлар Сулаймоннинг донолигидан баҳраманд бўлгани унинг олдига одамларини юборарди. Ҳамма халқлардан одамлар келиб, Сулаймоннинг доно сўзларини эшитардилар.