Read Ўзбек тилидаги Муқаддас Китоб, 2013 Забур 106 Bible Online

Забур 106 - Ўзбек тилидаги Муқаддас Китоб, 2013 bible

Забур 106

¹“Эгамизга шукрона айтинг, У яхшидир,Унинг содиқ севгиси абадийдир”, деб

²Эгамиз нажот берганлар ана шундай айтсин,У кулфатдан қутқарганлар ана шундай айтсин.

³У шарқу ғарбдан, шимолу жанубдан[285] тўплаганлар ҳам,Кўп юртлардан йиғиб келтирганлар ҳам ана шундай айтсин.

⁴Баъзилари чўлу биёбонда тентираб юрдилар,Яшаш учун бирон шаҳарга йўл топмадилар.

⁵Оч, ташна ҳолда қолдилар,Сал бўлмаса ўлаёздилар.

⁶Кулфатда қолганларида Эгамизга нола қилдилар,Эгамиз уларни азоб–уқубатлардан қутқарди.

⁷Улар яшайдиган шаҳарга боргунга қадар,Эгамиз уларни тўғри йўлдан етаклади.

⁸Содиқ севгиси учун улар Эгамизга шукрона айтсин!Эгамизнинг инсониятга кўрсатган ажойиб ишлари учун шукр қилсин!

⁹Зотан У қондирар ташна бўлганларни,Тўйдирар неъматлар билан очларни.

¹⁰Баъзилари зим–зиё зулматда ўтирардилар,Асир бўлиб, кишанда азоб чекардилар.

¹¹Улар Худонинг сўзларига қарши исён қилгандилар,Худойи Таолонинг йўл–йўриқларини менсимадилар.

¹²Шу боис Худо уларни оғир ишларга мажбур этди,Улар йиқилганда, ёрдам беришга бирон кимса бўлмади.

¹³Кулфатда қолганларида Эгамизга нола қилдилар,Эгамиз уларни азоб–уқубатлардан қутқарди.

¹⁴Уларни зим–зиё зулматдан олиб чиқди,Уларнинг кишанларини парча–парча қилди.

¹⁵Содиқ севгиси учун улар Эгамизга шукрона айтсин!Эгамизнинг инсониятга кўрсатган ажойиб ишлари учун шукр қилсин!

¹⁶Зотан У бронза дарвозаларни синдирар,Темир тамбаларни иккига бўлиб ташлар.

¹⁷Баъзилари аҳмоқ бўлиб, итоатсизлик қилдилар,Гуноҳлари туфайли азобга дучор бўлдилар.

¹⁸Ҳар қандай овқатдан жирканар эдилар,Ўлим оғзига яқинлашиб қолган эдилар.

¹⁹Кулфатда қолганларида Эгамизга нола қилдилар,Эгамиз уларни азоб–уқубатлардан қутқарди.

²⁰Эгамиз гапириб, уларга шифо берди,Қабрдан уларни сақлаб қолди.

²¹Содиқ севгиси учун улар Эгамизга шукрона айтсин!Эгамизнинг инсониятга кўрсатган ажойиб ишлари учун шукр қилсин!

²²Шукрона қурбонлигини улар келтирсинлар,Унинг ишларини севинч қўшиқлари ила айтсинлар.

²³Баъзилари кемаларда денгизга чиқдилар,Ваҳимали сувлар узра савдо қилдилар.

²⁴Улар Эгамизнинг ишларини,Чуқур сувда Унинг мўъжизаларини кўрдилар.

²⁵У амр берганда, бўрон қўзғалди,Денгиз тўлқинлари баланд кўтарилди.

²⁶Кема осмонга кўтарилиб, яна чуқур сувга тушди,Фалокатдан кемадагилар бемажол бўлиб қолди.

²⁷Улар мастлар каби довдираб айланди,Маҳоратлари фойда бермади.

²⁸Кулфатда қолганларида Эгамизга нола қилдилар,Эгамиз уларни азоб–уқубатлардан қутқарди.

²⁹У бўронни шабадага айлантирди,Денгиз тўлқинлари сукутга чўмди.

³⁰Тўлқинлар жим бўлганидан улар севинди,Истаган бандаргоҳга уларни келтириб қўйди.

³¹Содиқ севгиси учун улар Эгамизга шукрона айтсин!Эгамизнинг инсониятга кўрсатган ажойиб ишлари учун шукр қилсин!

³²Улар жамоа олдида Эгамизни улуғласин,Оқсоқоллар йиғинида Унга ҳамду санолар айтсин.

³³Эгамиз дарёларни саҳрога айлантирар,Булоқларни қақраган ерга айлантирар.

³⁴Аҳолининг фосиқлиги сабабли эсаҲосилдор ерларни шўр ерга айлантирар.

³⁵Эгамиз саҳрони кўлларга айлантирар,Қақраган ерни булоқларга айлантирар.

³⁶Оч–юпунларни у ерга олиб келиб ўрнаштирар.Улар эса яшаш учун шаҳарлар қурар.

³⁷Далаларга уруғ экиб, узумзорлар яратар,Далалардан мўл–кўл ҳосил олар.

³⁸Эгамизнинг баракаси ила улар жуда кўпаяр,Уларнинг чорваси камайишига Эгамиз йўл қўймас.

³⁹Эгамиз аслзодаларни хор қилди,Йўлсиз саҳрода уларни саргардон қилди.Зулм, кулфат, ғамданУларнинг сони камайди,Улар қашшоқлашди.

⁴¹Йўқсилларни эса Эгамиз кулфатдан қутқарар,Уларнинг оиласини қўй сурувидай кўпайтирар.

⁴²Тўғри инсонлар буни кўриб, севинар,Фосиқлар эса оғзини ёпиб, жим бўлар.

⁴³Донолар буларга эътибор берсин,Эгамизнинг содиқ севгисини англасин.