Read Ўзбек тилидаги Муқаддас Китоб, 2013 Сулаймоннинг гўзал қўшиғи 3 Bible Online

Сулаймоннинг гўзал қўшиғи 3 - Ўзбек тилидаги Муқаддас Китоб, 2013 bible

Сулаймоннинг гўзал қўшиғи 3

¹Кечқурун ўрнимда ётганимда,Бутун қалбим билан севган ошиғимни қўмсадим.Жуда қўмсадим, лекин уни тополмадим.

²Энди туриб, шаҳарга чиқаман.Шаҳар майдонларию, кўчаларида юриб,Севгилимни излайман.Изладим–у, аммо уни тополмадим.

³Қўриқчилар шаҳарни кезиб юриб,Мени кўриб қолишди.Улардан: “Севгилимни кўрмадингизми?” деб сўрадим.

⁴Уларнинг олдидан кетишим биланоқ,Севгилимни топдим.Уни маҳкам қучиб, қўйиб юбормадим.Онамнинг уйига олиб келдим.Уни ўз туққан онамнинг хонасига олиб кирдим.

⁵Эй Қуддус қизлари,Кийигу ёввойи оҳулар ҳақи онт ичинг.Вақт–соати келмагунча,Севгини қўзғатманг, уйғотманг.</p>

⁶Даштда тутундай кўтарилиб,Кўринаётган нарса нимадир?Ундан аттор растасидаги барча хушбўй атирларнинг ҳиди,Мирра ва хушбўй тутатқиларнинг ҳиди келиб турибди.

⁷Қаранглар, у Сулаймоннинг тахтиравонидир,Унинг атрофида олтмишта паҳлавони бор.Улар Исроил халқи орасидаги энг баҳодир жангчилардир.

⁸Қилич ўйнатишда ҳаммаси моҳир,Жангда ҳам жуда маҳоратлидирлар.Тунда бўладиган ҳужумлардан сақланиш учунУларнинг ҳаммаси қилич билан қуролланган.

⁹Шоҳ Сулаймон ўз тахтиравониниЛубнон ёғочларидан ясаттирган.

¹⁰Бу тахтиравон дасталари кумушдан,Орқаси тилладан ясалган,Ўриндиғига эса сафсар кимхоб тўшалган.Қуддус қизлари тахтиравоннинг ичиниМуҳаббат билан безатганлар.

¹¹Чиқинглар, эй Сион қизлари!Шоҳ Сулаймонга қаранглар.Тўйи куни, юраги шодлик билан тўлган куниОнаси кийдирган тожга қаранглар.