Read Ўзбек тилидаги Муқаддас Китоб, 2013 Еремиё 30 Bible Online

Еремиё 30 - Ўзбек тилидаги Муқаддас Китоб, 2013 bible

Еремиё 30

¹Эгамизнинг сўзи Еремиёга аён бўлди.

²Исроил халқининг Худоси — Эгамиз шундай деди: “Мен сенга айтган барча сўзларимни ўрама қоғозга ёзиб қўй.

³Шундай кунлар келадики, Мен халқим Исроилни ва Яҳудони яна фаровонликка эриштираман. Ота–боболарига берган юртга уларни олиб келаман. Улар ўша юртга эгалик қиладилар.” Эгамизнинг каломи шудир.

⁴Қуйида Эгамизнинг Исроил ва Яҳудо ҳақида айтган сўзлари ёзилган:

⁵“Эгамиз шундай демоқда,Саросима хитобларини эшитдик.Ана, ваҳима садолари эшитилмоқда! Тинчлик йўқ!

⁶Қани, сўраб кўринг:Эркак киши туғадими?Нега унда мен кўрган ҳар бир кучли эркакДард тутган аёлдай белини ушлаб олган?Нега ҳар бир эркакнинг юзи бўздай оқарган?

⁷Эвоҳ, нақадар даҳшатли бу кун!Бундай кун ҳеч қачон бўлмаган.Ёқуб насли учун бу жабр куни бўлади,Аммо бу кундан халқим қутқарилади.”

⁸Сарвари Олам шундай демоқда: “Ўша куни Мен халқимнинг бўйнидаги бўйинтуруқни синдираман, кишанларини узиб ташлайман. Менинг халқим энди ҳеч қачон ажнабийларга қул бўлмайди.

⁹Улар Менга — Ўз Эгаси Худога ва Мен тахтга ўтқизадиган Довуд авлодидан бўлган шоҳга хизмат қилишади.

¹⁰Эгамиз шундай демоқда:“Эй қулим Ёқуб, қўрқма!Эй Исроил халқи, саросимага тушма!Мен сени олис юртдан озод қилиб олиб келаман,Наслингни сургун бўлган мамлакатдан қутқараман.Эй Ёқуб насли, сен юртингга қайтасан,Осойишта ва бехатар яшайсан.Энди ҳеч ким сени қўрқитмайди.”

¹¹Эгамиз шундай демоқда:“Мен сен билан бирга бўламан,Ўзим сени қутқараман.Сени халқлар орасига тарқатган эдим,Энди ўша халқларнинг ҳаммасини қириб ташлайман.Сени эса қириб юбормайман,Аммо жазосиз ҳам қолдирмайман,Адолат ила жазоингни бераман.”

¹²Мана, Эгамиз халқига шундай демоқда:“Ярангни даволаб бўлмайди,Сенинг дардинг тузалмасдир.

¹³Арзингни эшитадиган одам йўқ,Яранг учун дори–дармон йўқ,Сени даволаб бўлмайди.

¹⁴Ҳамма ўйнашларинг сени унутди,Уларнинг сен билан иши йўқ.Мен душман каби сенга ҳамла қилдим,Шафқатсиз жазоингни бердим.Оғир жиноятинг, кўп гуноҳларинг учун,Сени шу кўйга солдим.

¹⁵Нечун жон аччиғида бақиряпсан?!Ярангни даволаб бўлмайди, ахир!Оғир жиноятинг, кўп гуноҳларинг учунСени шу кўйга солдим.

¹⁶Аммо сени ҳалок қилганлар ҳалок бўлади,Душманларингнинг ҳаммаси сургун қилинади.Сени талон–тарож қилганлар таланади.Сенга ҳужум қилганлар босиб олинади.

¹⁷Душманлар сени “Ташлаб кетилган”, деб аташса ҳам,“Ҳеч кимнинг Қуддус билан иши йўқ”, деб айтишса ҳам,Мен сени соғайтираман,Ярангга шифо бераман.”Эгамизнинг каломи шудир.

¹⁸Эгамиз шундай демоқда:“Мен Ёқуб наслининг чодирларини қайта тиклайман.Халқим хонадонларига раҳм–шафқат қиламан.Шаҳар ўз вайроналари устида қайта бунёд бўлади,Сарой ўз жойида тикланади.

¹⁹У ердан шукрона қўшиқлари эшитилади,Шодлик ҳайқириқлари янграб туради.Мен халқимни кўпайтираман,Уларнинг сони камаймайди.Уларни обрў–эътиборли қиламан,Ҳеч ким уларни оёқ ости қилмайди.

²⁰Фарзандлари олдингидай фаровон ҳаёт кечиради,Жамоаси олдимда мустаҳкам туради.Уларга жабр қилганларни Мен жазолайман.

²¹Шаҳзодаси ўзларидан чиқади,Ҳукмдори Менинг халқимдан бўлади.Мен уни Ўзимга яқинлаштираман,Шунда у Менга яқинлаша олади.Зотан ҳеч ким ўзидан ўзиМенга яқинлашишга журъат этмайди!” деб айтмоқда Эгамиз.

²²Шунда сизлар Менинг халқим,Мен эса сизларнинг Худойингиз бўламан.

²³Қаранглар, Эгамиз ғазабга минди,Унинг қаҳри бўронга ўхшайди,Авж олган тўфондай,Фосиқларнинг бошига тушади.

²⁴Эгамиз ниятини тўлиқ бажармагунча,Ўз ғазабидан тушмайди.Кейинчалик буни англаб оласиз.”