Read Ўзбек тилидаги Муқаддас Китоб, 2013 Еремиёнинг марсияси 5 Bible Online

Еремиёнинг марсияси 5 - Ўзбек тилидаги Муқаддас Китоб, 2013 bible

Еремиёнинг марсияси 5

¹Эй Эгам, бошимизга тушган кўргиликни ёдингда тутгин,Қанчалик хор бўлганимизни бир кўриб қўйгин!

²Мулк қилиб олган еримиз ажнабийлар қўлига тушди,Келгиндилар уйларимизга эга бўлишди.

³Отасиз етимдай бўлиб қолдик биз,Бевага ўхшаб қолди оналаримиз.

⁴Биз ичган сувимизга пул тўлаймиз,Ёққани ўтинни сотиб оламиз.

⁵Ёвларимиз таъқиб қилиб, қўймас бизни ҳолимизга,Чарчаб кетдик, тиним йўқ бизга.

⁶Тўйгунча нон еймиз деб,Миср ва Оссурия билан биз сулҳ туздик.

⁷Аждодларимиз гуноҳ қилиб, ўтиб кетди,Аммо уларнинг жазосини биз тортяпмиз энди.

⁸Бизга ҳукмронлик қилаётир қуллар,Улар зулмидан бизни ким қутқарар?!

⁹Нон излаймиз, жонимизни қўйиб хавф остига,Чунки каллакесарлар писиб ётибди далаларда.

¹⁰Очарчилик дастидан чиққан иссиғимиз,Тандирдай қизиган бизнинг баданимиз.

¹¹Ғанимларимиз Қуддусда аёлларни зўрлашди,Яҳудо шаҳарларида қизларнинг номусига тегишди.

¹²Қўлларидан осишди йўлбошчиларимизни,Хор қилишди оқсоқолларимизни.

¹³Йигитлар тегирмон тошини тортяпти,Ўғлонлар оғир ўтин остида гандираклаб қолди.

¹⁴Шаҳар дарвозасида оқсоқоллар ўтирмайдиган бўлди,Йигитлар шодон куйлар чалмайдиган бўлди.

¹⁵Кўнглимизни шодлик тарк этди,Ўйин–кулгимиз азага айланди.

¹⁶Бошимиздаги тожимиз тушиб кетди,Гуноҳ қилдик! Шўримиз қуриди!

¹⁷Дарду аламга тўлди юрагимиз,Йиғлайвериб хиралашди кўзимиз.

¹⁸Ахир, Сион тоғи ҳувиллаб қолди,Чиябўрилар у ерда изғиб юрибди.

¹⁹Сен эса, эй Эгам, абадий ҳукмронлик қиласан,Авлодлар оша Ўз тахтингда ўтирасан.

²⁰Нечун бизни Сен тамом унутдинг?Нечун узоқ вақтга ташлаб қўйдинг?

²¹Эй Эгам, бизни Ўзингга юз бурдиргин,Токи Сенга қайтайлик.Қадимги улуғворлигимизни тиклагин.

²²Наҳотки Сен биздан бутунлай воз кечдинг?!Қаҳру ғазабингнинг ҳад–поёни бордир, ахир!