Read Ўзбек тилидаги Муқаддас Китоб, 2013 Саҳрода 17 Bible Online

Саҳрода 17 - Ўзбек тилидаги Муқаддас Китоб, 2013 bible

Саҳрода 17

¹Шундан кейин Эгамиз Мусога деди:

²— Исроил халқига айт, улар ҳар бир қабила йўлбошчисининг таёғини[89] олиб келишсин. Ҳаммаси бўлиб ўн иккита таёқ бўлсин. Ҳар бир қабила йўлбошчисининг исмини ўз таёғига ёзиб қўйинглар.

³Леви қабиласининг таёғига Ҳоруннинг исмини ёзинглар, ҳар бир қабила йўлбошчисидан биттадан таёқ бўлиши лозим.

⁴Сен таёқларни Учрашув чодирига олиб кириб, Мен сен билан учрашадиган жойга — аҳд сандиғи[90] олдига қўй.

⁵Мен танлаган одамнинг таёғи куртак чиқаради. Шундай қилиб, сенга қаршилик қилаётган Исроил халқининг минғирлаб нолишларига Мен чек қўяман.

⁶Мусо Исроил халқига Эгамизнинг гапларини айтди. Йўлбошчилар ҳар бир қабила номидан биттадан таёқни беришди, ҳаммаси бўлиб ўн иккита таёқ бўлди. Ҳоруннинг таёғи ҳам ўша таёқлар орасида эди.

⁷Мусо таёқларни Муқаддас аҳд чодирига[91] — Эгамизнинг олдига қўйди.

⁸Эртаси куни Мусо Муқаддас аҳд чодирига кириб қараса, Ҳоруннинг Леви қабиласини ифода этган таёғи куртак ёзибди, кўкариб, гуллабди, ҳатто бодом тугибди.

⁹Мусо Эгамизнинг ҳузуридаги ҳамма таёқларни Исроил халқи олдига олиб чиқиб кўрсатди. Ҳар бир йўлбошчи ўз таёғини олди.

¹⁰Эгамиз Мусога шундай амр берди:— Ҳоруннинг таёғини аҳд сандиғи олдига қайтариб олиб бориб қўй. Таёқ доимо ўша ерда сақланиб, исёнчиларни огоҳ қилиб турсин. Шундай қилиб, сен уларнинг минғирлаб нолишларига чек қўйиб, уларнинг қирилиб кетишига йўл қўймайсан.

¹¹Эгамиз қандай амр этган бўлса, Мусо ҳаммасини бажарди.

¹²Исроил халқи эса Мусога фарёд қилди:— Шўримиз қуриди! Кунимиз битди!

¹³Эгамизнинг Муқаддас чодирига яқин борганлар нобуд бўлишади. Биз ҳаммамиз қирилиб кетамиз!