Read Ўзбек тилидаги Муқаддас Китоб, 2013 Закариё 6 Bible Online

Закариё 6 - Ўзбек тилидаги Муқаддас Китоб, 2013 bible

Закариё 6

¹Мен яна тепага қараб, иккита бронза тоғ орасидан чиқиб келаётган тўртта аравани кўрдим.

²Биринчи аравани қизил, иккинчи аравани эса қора отлар,

³учинчи аравани оқ, тўртинчи аравани эса ола–була отлар тортиб келаётган эдилар. Бу отларнинг ҳаммаси кучли эди.

⁴Мен билан гаплашаётган фариштадан:— Эй, тўрам, булар нима? — деб сўрадим.

⁵Фаришта шундай жавоб берди:— Булар бутун олам Раббийсининг ҳузуридан чиқиб келаётган тўртта самовий руҳдир.

⁶Қора отли арава шимолга боради. Оқ отлиси эса унинг орқасидан кетади. Ола–була отли арава жанубга боради.

⁷Ана шу кучли отлар чиқдилар. Кейин улар бориб, ерни айланиб келишга шошилдилар. Фаришта уларга:— Боринглар, ерни кўриб чиқинглар, — деди. Шунда улар бориб, айланиб келишди.

⁸Кейин фаришта мени чақириб, шундай деди:— Мана, қара! Отлар шимолий юртга бориб, у ерда Эгамизнинг Руҳига тинчлик беришди.</p>

⁹Эгамиз менга қуйидаги сўзларни аён қилди:

¹⁰— Бобилдаги сургундан қайтиб келган Халдай, Товиё ва Ёдаёдан тилла ва кумуш ол. Ўша куниёқ Зафаниё ўғли Йўшиёнинг уйига бор.

¹¹Берилган кумуш ва олтиндан тож ясагин. Уни Ёҳузадах ўғли — олий руҳоний Ёшуанинг бошига кийгизгин–да,

¹²унга шундай дегин: “Сарвари Олам шундай демоқда: ‘Новда деган одам ўз турган жойидан шохлайди–да, Менинг Маъбадимни қуради.

¹³Менинг Маъбадимни қурадиган ўшадир. У шоҳона улуғворликка эга бўлиб, ҳукмронлик қилади. Тахтининг олдида руҳоний туради. Иккаласи орасида тинчлик, осойишталик бўлади.

¹⁴Бу тож Халдай, Товиё, Ёдаё ва Зафаниё ўғли Йўшиёнинг қарамоғида бўлади. У Менинг Маъбадимда ёдгорлик бўлиб қолади.

¹⁵Узоқ жойлардан одамлар келиб, Менинг Маъбадимни қуришга ёрдам беришади.’”Эй сургундан қайтиб келганлар, шунда Сарвари Олам мени юборганини сизлар англаб етасизлар. Агар сизлар Эгангиз Худонинг сўзларига яхшилаб қулоқ солсангизлар, мана шуларнинг ҳаммаси содир бўлади.