Read Ўзбек тилидаги Муқаддас Китоб, 2013 Янги аҳд 8 Bible Online

Янги аҳд 8 - Ўзбек тилидаги Муқаддас Китоб, 2013 bible

Янги аҳд 8

¹Исо тоғдан тушганда катта бир оломон Унинг орқасидан эргашди.

²Шу орада тери касаллигига чалинган бир одам Исонинг олдига келди. У тиз чўкиб, деди:— Ҳазрат, биламан, истасангиз, мени бу касалликдан Сиз поклай оласиз.

³Исо қўлини узатиб, унга теккизди–да:— Истайман, пок бўл! — деди. Тери касаллигига чалинган одам шу заҳоти дардидан фориғ бўлди.

⁴Исо унга деди:— Менга қара! Бу тўғрида бировга оғиз оча кўрма. Бориб, ўзингни руҳонийга кўрсат. Покланганингни ҳаммага исбот қилиш учун Мусо амр қилган қурбонликларни келтир.</p>

⁵Исо Кафарнаҳум шаҳрига кириб келганда, бир Рим юзбошиси Унинг олдига келиб, ёлворди:

⁶— Ҳазрат, хизматкорим уйда тўшакка михланиб ётибди. У қаттиқ азоб чекяпти.

⁷— Майли, Мен бориб, хизматкорингизни соғайтираман, — деди Исо.

⁸Юзбоши шундай деди:— Ҳазрат! Кулбамга оёқ босишингиз учун номуносибман. Сиз буюрсангиз, бас, хизматкорим соғайиб кетади.

⁹Мен ўзим буйруққа тобе одамман, аммо менинг ҳам қўлим остида аскарларим бор. Бирига “кет” десам, кетади, бошқасига “кел” десам, келади. Бирон хизматкоримга “шуни қил” десам, қилади.

¹⁰Исо юзбошининг бу гапини эшитиб, ҳайратланди. У орқасидан эргашиб келаётганларга деди:— Сизларга чинини айтайин: Мен Исроилда бундай кучли имонга эга бўлган биронта одамни учратмадим.

¹¹Сизларга шуни айтаман: кўп одамлар шарқу ғарбдан келиб, Иброҳим, Исҳоқ ва Ёқуб билан бирга Осмон Шоҳлигида зиёфатга ўтирадилар.

¹²Осмон Шоҳлигининг меросхўрлари эса ташқаридаги зулматга қувиб чиқарилади. Улар у ерда қаттиқ пушаймон бўлиб, фиғон чекадилар.

¹³Кейин Исо юзбошига деди:— Боринг, сиз ишонганингиздай бўлсин.Юзбошининг хизматкори ўша заҳоти соғайиб кетди.</p>

¹⁴Исо Бутруснинг уйига келганда, унинг қайнанаси иситмалаб, тўшакда ётганини кўрди.

¹⁵Исо унинг қўлига тегиши билан иситмаси тушди. Аёл туриб, Унга хизмат қилди.

¹⁶Кеч кирганда Исонинг олдига жин чалган кўплаб одамларни олиб келишди. У сўз билан жинларни қувиб чиқарди, хаста одамларнинг ҳаммасига шифо берди.

¹⁷Шу тариқа Ишаё пайғамбарнинг қуйидаги айтган сўзи бажо бўлди:“Дардларимизни у ўзига олди,Оғриқларимиздан бизни фориғ қилди.”</p>

¹⁸Исо атрофида бир талай оломонни кўриб, шогирдларига кўлнинг нариги томонига ўтишни буюрди.

¹⁹Шу пайт Таврот тафсирчиси Исонинг олдига келиб деди:— Устоз, қаерга борсангиз ҳам, мен ортингиздан бораман.

²⁰Исо унга шундай деди:— Тулкиларнинг уялари бор, қушларнинг инлари бор. Инсон Ўғлининг эса бош қўядиган жойи йўқ.

²¹Шогирд бўлган бошқа бир одам эса Исога:— Ҳазрат, ижозат беринг, аввал бориб отамни дафн қилиб келай, — деди.

²²Исо эса Унга деди:— Сен ортимдан юр. Марҳумларни руҳан ўлик бўлганлар дафн қилсинлар.</p>

²³Исо қайиққа тушди, шогирдлари ҳам Унга эргашиб, қайиққа тушдилар.

²⁴Шу орада кўлда бўрон кўтарилди, тўлқинлар қайиқни сувга тўлдира бошлади. Исо эса ухлаётган эди.

²⁵Шунда шогирдлари Исонинг олдига бориб:— Ҳазрат, бизни қутқаринг! Ҳалок бўляпмиз! — деб Исони уйғотдилар.

²⁶Исо уларга деди:— Нега қўрқяпсизлар, эй имони сустлар?Сўнг туриб, шамолга ва тўлқинларга дўқ урди. Шу ондаёқ чуқур сукунат чўкди.

²⁷Қайиқдагилар ҳайратланиб, бир–бирига:— Бу ким бўлди экан–а? Ҳатто шамол ва тўлқинлар Унга бўйсунади–я! — дейишди.</p>

²⁸Исо кўлнинг нариги қирғоғига, Гадара шаҳрининг яқинига етиб борди. Шунда жинга чалинган икки одам қабрлар орасидан югуриб чиқиб, Исони қаршилашди. Улар шунчалик ваҳший эдиларки, биронта одам у ердан ўта олмасди.

²⁹Улар шундай деб бақиришди:— Эй Худонинг Ўғли! Бизни тинч қўй! Сен бизга вақтидан олдин азоб бергани бу ерга келдингми?

³⁰Улардан нарироқда катта бир чўчқа подаси озиқланаётган эди.

³¹Жинлар Исога ёлвориб:— Агар бизларни қувиб чиқарадиган бўлсанг, унда чўчқа подасига юборгин, — дейишди.

³²Исо уларга:— Боринглар! — дейиши биланоқ, жинлар одамлар ичидан чиқиб, чўчқаларнинг ичига кириб олишди. Шу онда бутун чўчқа подаси тик қияликдан кўлга ёпирилиб, сувда нобуд бўлди.

³³Чўчқа боқувчилар эса қочиб шаҳарга бордилар. Жинга чалинганлар билан бўлиб ўтган ҳодисани ҳаммага гапириб бердилар.

³⁴Шунда бутун шаҳар аҳолиси Исонинг олдига борди. Уни кўргач, юртимиздан чиқиб кет, деб ўтиниб сўрадилар.