Read Ўзбек тилидаги Муқаддас Китоб, 2013 Шоҳлар 1 11 Bible Online

Шоҳлар 1 11 - Ўзбек тилидаги Муқаддас Китоб, 2013 bible

Шоҳлар 1 11

¹Оммон[47] шоҳи Нахош Гиладдаги Ёбош шаҳрига[48] келиб, у ерни қамал қилди. Ҳамма Ёбошликлар Нахошга:— Биз сен билан сулҳ тузиб, сенга итоат этамиз, — дейишди.

²Оммон шоҳи Нахош:— Фақат бир шарт билан сулҳ тузаман, — деди. — Ҳар бирингизнинг ўнг кўзингизни ўйиб оламан–да, бутун Исроил халқини бадном қиламан.

³Ёбош шаҳрининг оқсоқоллари Нахошга шундай дейишди:— Бизга етти кун муҳлат бер, Исроилнинг ҳамма ҳудудига хабарчилар жўнатайлик. Агар бизга нажот берадиган кимса чиқмаса, сенга таслим бўламиз.

⁴Хабарчилар Шоул яшайдиган Гиво шаҳрига келиб, бўлаётган воқеаларни халққа билдиришди. Ҳаммаси йиғи–сиғи қилиб, дод–фарёд солди.

⁵Худди шу пайт Шоул ҳўкизларини олдига солиб даладан қайтаётган эди. Шоул:— Одамларга нима бўлди? Нега бунчалик йиғлайди? — деб сўради.Ёбошликларнинг жўнатган хабарини унга айтиб беришди.

⁶Шоул бу гапларни эшитган заҳоти, Худонинг Руҳи уни қамраб олди. Шоул қаттиқ ғазабланди.

⁷Бир жуфт ҳўкизни сўйиб, нимталади. Хабарчилар орқали Исроилнинг ҳамма томонига ўша нимталанган бўлакларни жўнатиб, шундай деди: “Кимки Шоул билан Шомуилнинг орқасидан эргашмаса, ўша одамнинг ҳўкизлари ҳам худди шу аҳволга тушади.”Одамлар Эгамиздан қўрққанидан зир титраб, бир ёқадан бош чиқариб йўлга чиқди.

⁸Шоул уларни Базахда[49] йиғди. Исроил уруғларидан 300.000, Яҳудо уруғидан эса 30.000 киши бор эди.

⁹У ерга келган Ёбошлик хабарчиларга шундай дейишди:— Гиладдаги Ёбош аҳолисига, эртага кун тиккага келганда нажот топасизлар, деб айтинглар.Хабарчилар бориб, бу гапни етказишди. Ёбошликлар қувониб кетишди.

¹⁰Нахошга эса:— Эртага сизга таслим бўламиз, бизга нимани лозим кўрсангиз, шуни қилаверинг, — дейишди.

¹¹Эртаси куни Шоул одамларни уч қисмга бўлди. Улар тонг пайти Оммон лашкарининг қароргоҳига бостириб киришди. Куннинг жазирама иссиғи бошлангунча, уларни мағлуб қилиб бўлишди. Омон қолганлари шундай тирқираб қочдики, ҳатто бирон жойда икки киши тўпланганини учратиб бўлмасди.

¹²Исроил лашкари Шомуилнинг олдига бориб:— “Бизга шоҳлик қилиш Шоулга тушиб қолибдими?” деганлар кимлар эди? Олиб келинг уларни, ўлдирамиз! — деб қаттиқ талаб қилишди.

¹³Шоул эса:— Бугун бирон кимса ўлдирилмайди, чунки Эгамиз бугун Исроилга нажот берди, — деди.

¹⁴— Майли, Гилгалга борамиз, ўша ерда шоҳликни янгидан тиклаймиз, — деди Шомуил халққа.

¹⁵Шундай қилиб, бутун халқ Гилгалга борди ва Эгамиз ҳузурида Шоулнинг шоҳлигини тасдиқлади. Ўша ерда — Эгамизнинг ҳузурида тинчлик қурбонликлари келтиришди. Шоул ва бутун Исроил халқи роса хурсандчилик қилишди.