Read اردو جیو ورژن زبور 116 Bible Online

زبور 116 - اردو جیو ورژن bible

زبور 116

¹مَیں رب سے محبت رکھتا ہوں، کیونکہ اُس نے میری آواز اور میری التجا سنی ہے۔

²اُس نے اپنا کان میری طرف جھکایا ہے، اِس لئے مَیں عمر بھر اُسے پکاروں گا۔

³موت نے مجھے اپنی زنجیروں میں جکڑ لیا، اور پاتال کی پریشانیاں مجھ پر غالب آئیں۔ مَیں مصیبت اور دُکھ میں پھنس گیا۔

⁴تب مَیں نے رب کا نام پکارا، ”اے رب، مہربانی کر کے مجھے بچا!“

⁵رب مہربان اور راست ہے، ہمارا خدا رحیم ہے۔

⁶رب سادہ لوگوں کی حفاظت کرتا ہے۔ جب مَیں پست حال تھا تو اُس نے مجھے بچایا۔

⁷اے میری جان، اپنی آرام گاہ کے پاس واپس آ، کیونکہ رب نے تیرے ساتھ بھلائی کی ہے۔

⁸کیونکہ اے رب، تُو نے میری جان کو موت سے، میری آنکھوں کو آنسو بہانے سے اور میرے پاؤں کو پھسلنے سے بچایا ہے۔

⁹اب مَیں زندوں کی زمین میں رہ کر رب کے حضور چلوں گا۔

¹⁰مَیں ایمان لایا اور اِس لئے بولا، ”مَیں شدید مصیبت میں پھنس گیا ہوں۔“

¹¹مَیں سخت گھبرا گیا اور بولا، ”تمام انسان دروغ گو ہیں۔“

¹²جو بھلائیاں رب نے میرے ساتھ کی ہیں اُن سب کے عوض مَیں کیا دوں؟

¹³مَیں نجات کا پیالہ اُٹھا کر رب کا نام پکاروں گا۔

¹⁴مَیں رب کے حضور اُس کی ساری قوم کے سامنے ہی اپنی مَنتیں پوری کروں گا۔

¹⁵رب کی نگاہ میں اُس کے ایمان داروں کی موت گراں قدر ہے۔

¹⁶اے رب، یقیناً مَیں تیرا خادم، ہاں تیرا خادم اور تیری خادمہ کا بیٹا ہوں۔ تُو نے میری زنجیروں کو توڑ ڈالا ہے۔

¹⁷مَیں تجھے شکرگزاری کی قربانی پیش کر کے تیرا نام پکاروں گا۔

¹⁸مَیں رب کے حضور اُس کی ساری قوم کے سامنے ہی اپنی مَنتیں پوری کروں گا۔

¹⁹مَیں رب کے گھر کی بارگاہوں میں، اے یروشلم تیرے بیچ میں ہی اُنہیں پورا کروں گا۔ رب کی حمد ہو۔