Read اردو جیو ورژن زبور 67 Bible Online

زبور 67 - اردو جیو ورژن bible

زبور 67

¹زبور۔ تاردار سازوں کے ساتھ گانا ہے۔ موسیقی کے راہنما کے لئے۔ اللہ ہم پر مہربانی کرے اور ہمیں برکت دے۔ وہ اپنے چہرے کا نور ہم پر چمکائے (سِلاہ)

²تاکہ زمین پر تیری راہ اور تمام قوموں میں تیری نجات معلوم ہو جائے۔

³اے اللہ، قومیں تیری ستائش کریں، تمام قومیں تیری ستائش کریں۔

⁴اُمّتیں شادمان ہو کر خوشی کے نعرے لگائیں، کیونکہ تُو انصاف سے قوموں کی عدالت کرے گا اور زمین پر اُمّتوں کی قیادت کرے گا۔ (سِلاہ)

⁵اے اللہ، قومیں تیری ستائش کریں، تمام قومیں تیری ستائش کریں۔

⁶زمین اپنی فصلیں دیتی ہے۔ اللہ ہمارا خدا ہمیں برکت دے!

⁷اللہ ہمیں برکت دے، اور دنیا کی انتہائیں سب اُس کا خوف مانیں۔