Read اردو جیو ورژن زبور 8 Bible Online

زبور 8 - اردو جیو ورژن bible

زبور 8

¹داؤد کا زبور۔ موسیقی کے راہنما کے لئے۔ طرز: گتّیت۔ اے رب ہمارے آقا، تیرا نام پوری دنیا میں کتنا شاندار ہے! تُو نے آسمان پر ہی اپنا جلال ظاہر کر دیا ہے۔

²اپنے مخالفوں کے جواب میں تُو نے چھوٹے بچوں اور شیرخواروں کی زبان کو تیار کیا ہے تاکہ وہ تیری قوت سے دشمن اور کینہ پرور کو ختم کریں۔

³جب مَیں تیرے آسمان کا ملاحظہ کرتا ہوں جو تیری اُنگلیوں کا کام ہے، چاند اور ستاروں پر غور کرتا ہوں جن کو تُو نے اپنی اپنی جگہ پر قائم کیا

⁴تو انسان کون ہے کہ تُو اُسے یاد کرے یا آدم زاد کہ تُو اُس کا خیال رکھے؟

⁵تُو نے اُسے فرشتوں سے کچھ ہی کم بنایا،[۲] تُو نے اُسے جلال اور عزت کا تاج پہنایا۔

⁶تُو نے اُسے اپنے ہاتھوں کے کاموں پر مقرر کیا، سب کچھ اُس کے پاؤں کے نیچے کر دیا،

⁷خواہ بھیڑبکریاں ہوں خواہ گائےبَیل، جنگلی جانور،

⁸پرندے، مچھلیاں یا سمندری راہوں پر چلنے والے باقی تمام جانور۔

⁹اے رب ہمارے آقا، پوری دنیا میں تیرا نام کتنا شاندار ہے!