Read اردو جیو ورژن گنتی 1 Bible Online

گنتی 1 - اردو جیو ورژن bible

گنتی 1

¹اسرائیلیوں کو مصر سے نکلے ہوئے ایک سال سے زیادہ عرصہ گزر گیا تھا۔ اب تک وہ دشتِ سینا میں تھے۔ دوسرے سال کے دوسرے مہینے کے پہلے دن رب ملاقات کے خیمے میں موسیٰ سے ہم کلام ہوا۔ اُس نے کہا،

²”تُو اور ہارون تمام اسرائیلیوں کی مردم شماری کنبوں اور آبائی گھرانوں کے مطابق کرنا۔ اُن تمام مردوں کی فہرست بنانا

³جو کم از کم بیس سال کے اور جنگ لڑنے کے قابل ہوں۔

⁴اِس میں ہر قبیلے کے ایک خاندان کا سرپرست تمہاری مدد کرے۔

⁵یہ اُن کے نام ہیں: روبن کے قبیلے سے اِلی صور بن شدیور،

⁶شمعون کے قبیلے سے سلومی ایل بن صوری شدی،

⁷یہوداہ کے قبیلے سے نحسون بن عمی نداب،

⁸اِشکار کے قبیلے سے نتنی ایل بن ضُغر،

⁹زبولون کے قبیلے سے اِلیاب بن حیلون،

¹⁰یوسف کے بیٹے افرائیم کے قبیلے سے اِلی سمع بن عمی ہود، یوسف کے بیٹے منسّی کے قبیلے سے جملی ایل بن فدا ہصور،

¹¹بن یمین کے قبیلے سے ابدان بن جدعونی،

¹²دان کے قبیلے سے اخی عزر بن عمی شدی،

¹³آشر کے قبیلے سے فجعی ایل بن عکران،

¹⁴جد کے قبیلے سے اِلیاسف بن دعوایل،

¹⁵نفتالی کے قبیلے سے اخیرع بن عینان۔“

¹⁶یہی مرد جماعت سے اِس کام کے لئے بُلائے گئے۔ وہ اپنے قبیلوں کے راہنما اور کنبوں کے سرپرست تھے۔

¹⁷اِن کی مدد سے موسیٰ اور ہارون نے

¹⁸اُسی دن پوری جماعت کو اکٹھا کیا۔ ہر اسرائیلی مرد جو کم از کم 20 سال کا تھا رجسٹر میں درج کیا گیا۔ رجسٹر کی ترتیب اُن کے کنبوں اور آبائی گھرانوں کے مطابق تھی۔

¹⁹سب کچھ ویسا ہی کیا گیا جیسا رب نے حکم دیا تھا۔ موسیٰ نے سینا کے ریگستان میں لوگوں کی مردم شماری کی۔ نتیجہ یہ نکلا:

²⁰روبن کے قبیلے کے 46,500 مرد،

²²شمعون کے قبیلے کے 59,300 مرد،

²⁴جد کے قبیلے کے 45,650 مرد،

²⁶یہوداہ کے قبیلے کے 74,600 مرد،

²⁸اِشکار کے قبیلے کے 54,400 مرد،

³⁰زبولون کے قبیلے کے 57,400 مرد،

³²یوسف کے بیٹے افرائیم کے قبیلے کے 40,500 مرد،

³⁴یوسف کے بیٹے منسّی کے قبیلے کے 32,200 مرد،

³⁶بن یمین کے قبیلے کے 35,400 مرد،

³⁸دان کے قبیلے کے 62,700 مرد،

⁴⁰آشر کے قبیلے کے 41,500 مرد،

⁴²نفتالی کے قبیلے کے 53,400 مرد۔

⁴⁴موسیٰ، ہارون اور قبیلوں کے بارہ راہنماؤں نے اِن تمام آدمیوں کو گنا۔

⁴⁵اُن کی پوری تعداد 6,03,550 تھی۔

⁴⁷لیکن لاویوں کی مردم شماری نہ ہوئی،

⁴⁸کیونکہ رب نے موسیٰ سے کہا تھا،

⁴⁹”اسرائیلیوں کی مردم شماری میں لاویوں کو شامل نہ کرنا۔

⁵⁰اِس کے بجائے اُنہیں شریعت کی سکونت گاہ اور اُس کا سارا سامان سنبھالنے کی ذمہ داری دینا۔ وہ سفر کرتے وقت یہ خیمہ اور اُس کا سارا سامان اُٹھا کر لے جائیں، اُس کی خدمت کے لئے حاضر رہیں اور رُکتے وقت اُسے اپنے خیموں سے گھیرے رکھیں۔

⁵¹روانہ ہوتے وقت وہی خیمے کو سمیٹیں اور رُکتے وقت وہی اُسے لگائیں۔ اگر کوئی اَور اُس کے قریب آئے تو اُسے سزائے موت دی جائے گی۔

⁵²باقی اسرائیلی خیمہ گاہ میں اپنے اپنے دستے کے مطابق اور اپنے اپنے علَم کے ارد گرد اپنے خیمے لگائیں۔

⁵³لیکن لاوی اپنے خیموں سے شریعت کی سکونت گاہ کو گھیر لیں تاکہ میرا غضب کسی غلط شخص کے نزدیک آنے سے اسرائیلیوں کی جماعت پر نازل نہ ہو جائے۔ یوں لاویوں کو شریعت کی سکونت گاہ کو سنبھالنا ہے۔“

⁵⁴اسرائیلیوں نے ویسا ہی کیا جیسا رب نے موسیٰ کو حکم دیا تھا۔