Read اردو جیو ورژن گنتی 34 Bible Online

گنتی 34 - اردو جیو ورژن bible

گنتی 34

¹رب نے موسیٰ سے کہا،

²”اسرائیلیوں کو بتانا کہ جب تم اُس ملک میں داخل ہو گے جو مَیں تمہیں میراث میں دوں گا تو اُس کی سرحدیں یہ ہوں گی:

³اُس کی جنوبی سرحد دشتِ صین میں ادوم کی سرحد کے ساتھ ساتھ چلے گی۔ مشرق میں وہ بحیرۂ مُردار کے جنوبی ساحل سے شروع ہو گی، پھر اِن جگہوں سے ہو کر مغرب کی طرف گزرے گی:

⁴درۂ عقربیم کے جنوب میں سے، دشتِ صین میں سے، قادس برنیع کے جنوب میں سے حصر ادّار اور عضمون میں سے۔

⁵وہاں سے وہ مُڑ کر مصر کی سرحد پر واقع وادیٔ مصر کے ساتھ ساتھ بحیرۂ روم تک پہنچے گی۔

⁶اُس کی مغربی سرحد بحیرۂ روم کا ساحل ہو گا۔

⁷اُس کی شمالی سرحد بحیرۂ روم سے لے کر اِن جگہوں سے ہو کر مشرق کی طرف گزرے گی: ہور پہاڑ،

⁸لبو حمات، صداد،

⁹زِفرون اور حصر عینان۔ حصر عینان شمالی سرحد کا سب سے مشرقی مقام ہو گا۔

¹⁰اُس کی مشرقی سرحد شمال میں حصر عینان سے شروع ہو گی۔ پھر وہ اِن جگہوں سے ہو کر جنوب کی طرف گزرے گی: سِفام،

¹¹رِبلہ جو عین کے مشرق میں ہے اور کِنّرت یعنی گلیل کی جھیل کے مشرق میں واقع پہاڑی علاقہ۔

¹²اِس کے بعد وہ دریائے یردن کے کنارے کنارے گزرتی ہوئی بحیرۂ مُردار تک پہنچے گی۔ یہ تمہارے ملک کی سرحدیں ہوں گی۔“

¹³موسیٰ نے اسرائیلیوں سے کہا، ”یہ وہی ملک ہے جسے تمہیں قرعہ ڈال کر تقسیم کرنا ہے۔ رب نے حکم دیا ہے کہ اُسے باقی ساڑھے نو قبیلوں کو دینا ہے۔

¹⁴کیونکہ اڑھائی قبیلوں کے خاندانوں کو اُن کی میراث مل چکی ہے یعنی روبن اور جد کے پورے قبیلے اور منسّی کے آدھے قبیلے کو۔

¹⁵اُنہیں یہاں، دریائے یردن کے مشرق میں یریحو کے سامنے زمین مل چکی ہے۔“

¹⁶رب نے موسیٰ سے کہا،

¹⁷”اِلی عزر امام اور یشوع بن نون لوگوں کے لئے ملک تقسیم کریں۔

¹⁸ہر قبیلے کے ایک ایک راہنما کو بھی چننا تاکہ وہ تقسیم کرنے میں مدد کرے۔ جن کو تمہیں چننا ہے اُن کے نام یہ ہیں:

¹⁹یہوداہ کے قبیلے کا کالب بن یفُنّہ،

²⁰شمعون کے قبیلے کا سموایل بن عمی ہود،

²¹بن یمین کے قبیلے کا اِلیداد بن کِسلون،

²²دان کے قبیلے کا بُقی بن یُگلی،

²³منسّی کے قبیلے کا حنی ایل بن افُود،

²⁴افرائیم کے قبیلے کا قموایل بن سِفتان،

²⁵زبولون کے قبیلے کا اِلی صفن بن فرناک،

²⁶اِشکار کے قبیلے کا فلطی ایل بن عزان،

²⁷آشر کے قبیلے کا اخی ہود بن شلومی،

²⁸نفتالی کے قبیلے کا فداہیل بن عمی ہود۔“

²⁹رب نے اِن ہی آدمیوں کو ملک کو اسرائیلیوں میں تقسیم کرنے کی ذمہ داری دی۔