Read urhobo Jẹnẹsis 14 Bible Online

Jẹnẹsis 14 - urhobo bible

Jẹnẹsis 14

¹Ọke rẹ Amrafel vwọ ovie ri Shinar, Ariọk ke ovie re Elasai, Chedor-laomer kẹ ovie rẹ Elam, Tidal kẹ ovie ri Goiim,

²ivie nana da kpare ofovwi bru Bera ovie ri Sodọm, Birsha ovie ri Gomora, Shinab ovie rẹ Adma, Shimeba ovie ri Zeboim, kugbe ovie ri Bẹla (kọye Zoar)

³Enana ejobi da rhe ghwẹ koko vwẹ ushekpotọ ri Sidim (kọye urhie rẹ ughweri).

⁴Ikpe ihwivẹ soso ọye ayen ga Chedor-laomer, ẹkẹvuọvo ikpe rẹ ihwerha re, ophu de rhi mu ayen kpahọ.

⁵Vwẹ ikpe ihwẹne rẹ Chedor-laomer kugbe ivie re vẹ ọye gba obọ na da rhe re họnre Rifem vwi Ashterof-karnaim, Zuzim vwi Ham, Emim vwi Shaveh-kiria-taim,

⁶kugbe Họr vwẹ ugbenu ri Seir re te Elparan rọ hẹ ughwru rẹ aton na;

⁷ayen da rhoma rhe ri te Enmish-pat (kọye Kadẹsh) ayen da ghwọrọ aghwa rẹ Amalẹk ejobi kugbe aghwa rẹ Amọr re dia Haz-azon-tamar.

⁸Etiyin ovie ri Sodọm, ovie ri Gomora, ovie ri Adma, ovie ri Zeboim, kugbe ovie ri Bẹla (kọye Zoar), ayen da yan phia ra gbara oma vwẹ ushekpotọ ri Sidim

⁹vi Chedor-laomer ovie ri Elam, Tidal ovie ri Goiim, Amrafel ovie ri Shinar, kugbe Ariọk ovie rẹ Elasar, ivie ẹne so iyori

¹⁰Ushekpotọ ri Sidim na vọnre vẹ egọdọ ri mu avwrogbo, ọke rẹ ivie ri Sodọm vi Gomora vwọ djẹ re, ẹvo de she phihọ egọdọ na, iri chekọ da djẹ kpo obo ugbenu.

¹¹Kọye ivwighrẹ na da ghwẹ ekuakua ri Sodọm vi Gomora reyọ, kugbe emuọre rayen ejobi ayen da yanran kpo,

¹²ayen ji mu Lọt rhe, ọmọ rẹ oniọvo rẹ Ebram, rọ dia Sodọm, vẹ eyenre rọye, ayen de kpo.

¹³Kọye ọvo vwẹ usun rẹ ayen re djẹ vabọ da rhe, re vuẹ Ebram ri Hibru na, rọ dia kẹrẹ ọhahe ri Mamre rẹ ohwo ri Amọr, oniọvo rẹ Eskol kugbe Aner, enana vẹ Ebraham kẹ obọ.

¹⁴Ọke rẹ Ebram vwo nyo nẹ emu omoni rọye ighuvwun, o de sun otu rẹ ofovwi rọye phia rọ nabọ yono, re ji vwiẹ vwẹ uwevwi rọye, uri gbẹ ujori, gbẹ ihwe gbẹ ẹrenre, ayen da vwọ tua ayen rhi te Dan.

¹⁵Vwẹ ason re ayen da ghare oma, te ọye vẹ idibo rọye, ayen de ke ayen phihọ, ayen da vwọ tua ayen re te Hobah, rọ obenu ri Damaskọs.

¹⁶Etiyin o de mie ayen eyenre na ejobi, ọ da reyọ Lọt omoni rọye vẹ eyenre rọye, kugbe eya na vẹ ihwo na ejobi.

¹⁷Ro vwo rhivwi rhe nu ro vwo phi Chedor-laomer, kugbe ivie re vẹ ọye gba obọ kparobọ nu, ovie ri Sodọm da yanran ra vwa vwẹ ushekpotọ ri Shaveh (kọye ese ushekpotọ rẹ Ovie).

¹⁸Melkizẹdẹk ovie ri Salẹm da vwẹ ọkuọka vi wain vwo rhe, ọye orherẹn rẹ Ọghẹnẹ ro Me Kpenu.

¹⁹Ọ da nẹ ẹrhovwo kẹ tanẹ, Ebruba kẹ Ebram vwẹ oma rẹ Ọghẹnẹ ro Me Kpenu, rọ ma odjuvwu vẹ akpọ;

²⁰Ebruba kẹ Ọghẹnẹ ro Me Kpenu, rọ reyọ ivwighrẹ wẹn phihọ owẹ obọ. Ebram da vwẹ ẹkẹn ihwe rẹ ekuakua na ejobi kẹ.

²¹Ovie ri Sodọm da ta kẹ, Ebram, Vwẹ ihwo na kẹ vwẹ, ẹkẹvuọvo gba reyọ ekuakua na kẹ oma wẹn.

²²Ẹkẹvuọvo Ebram da ta kẹ ovie ri Sodọm, Mi vẹ kẹ Ọrovwohwo Ọghẹnẹ ro Me Kpenu nure, ọ rọ ma odjuvwu vẹ akpọ,

²³nẹ Me sa reyọ ogẹ rẹ oruru-u, eyẹ ufi rẹ isabatoo, eyẹ kemu kemu rọ dia ọwẹ-ẹn, wọ da rha tanẹ, Mẹvwẹ nẹrhẹ Ebram fe.

²⁴Me sa reyọ emuọvo-o jokpa rẹ emu rẹ emeshare mẹ na rere, kugbe ẹkẹn rẹ ihwo ri nene uvwe, jẹn Aner, Eskol, kugbe Mamre reyọ ẹkẹn rayen.