Read urhobo Jẹnẹsis 15 Bible Online

Jẹnẹsis 15 - urhobo bible

Jẹnẹsis 15

¹Rẹ imu nana vwọ wan nu ota rẹ Ọrovwohwo de bru Ebram rhe vwẹ evwerhẹ, Wọ djẹ oshọ-ọ, Ebram, mẹvwẹ ekpọfia wẹn, osa wẹn cha rho gangan.

²Ẹkẹvuọvo Ebram da ta, E Ọrovwohwo Ọghẹnẹ, kidie wọ kẹ vwẹ, fikiridie mi ji vwo ọmọ-ọ, ohwo rọ re uku rẹ uwevwi mẹ kẹ Ẹliẹza ri Damaskọs?

³Ebram da ta, Nighe, wọ je kẹ vwẹ ọmọ-ọ, ọviẹn re vwiẹ vwẹ uwevwi mẹ kọye cha re uku mẹ.

⁴Nighe, ota rẹ Ọrovwohwo de bro rhe, Ohwo nana cha dia ọriuku wẹ-ẹn, ọmọ rẹ obọ wẹn re cha dia ọriuku wẹn.

⁵Ọ da reyọ rhe otafe ọ da ta, Gbe ni enu na, ru wo keri isio na, su wo se kere ayen. Etiyin ọ da ta kẹ, Ọtiọye uvwiẹ wẹn cha dia.

⁶O de se Ọrovwohwo gbuyota, o de kere vwọ kẹ nẹ ọvwata o ruẹ.

⁷Ọ da ta kẹ, Mẹvwẹ Ọrovwohwo rọ reyọ owẹ ni Ur ri Kaldia rhe, ro kẹ wẹ otọ nana vwọ re uku.

⁸Ẹkẹvuọvo ọ da ta, E Ọrovwohwo Ọghẹnẹ, komavọ mi ru riẹn nẹ mi che vwo otọ na?

⁹Ọ da ta kẹ, Reyọ upene rẹ erhuẹn rẹ ikperha, ẹvwe aye rẹ ikperha, egbo rẹ ikperha, inekuku, kugbe eme erurẹ.

¹⁰Ọ da ghwe aye ejobi vwo rhe, ọ da bẹrẹ ayen ivivẹ, o de mu ayen ohwohwo kpahe ohwo, ẹkẹvuọvo ephra na ọ gbe bẹrẹ ayen ivivẹ-ẹ.

¹¹Ọke rẹ ekala vwọ rhan mu ayen re cha vwọ sohrọ ayen, Ebram da djẹ ayen yanran.

¹²Rẹ ọnre vwo kpotọ re, ovwerhẹ rode de mu Ebram, o vwo ni, oshọ rode vẹ egho de rhi rhuro.

¹³Etiyin Ọrovwohwo da ta kẹ Ebram, Riẹn gbagba nẹ uvwiẹ wẹn che suosuo vwẹ otọ rẹ ihwo efa, ke dia eviẹn vwẹ oboyi, ke shenyẹ ayen ikpe uri ivẹ,

¹⁴Ẹkẹvuọvo ke Me cha vwẹ ẹgborho re ayen na vwo guẹdjọ, tavwe ayen ki norhe vẹ eyenre buebu.

¹⁵Vwọ kẹ oma wẹn, ku wo rhivwi bru esẹ wẹn ra egberhẹnẹdẹ, ke shi we vẹ uyovwi esha hẹrẹhẹrẹ.

¹⁶Vwẹ orua rẹ ẹne kẹsiẹye aye ki che rhivwi rhe, fikiridie orukuruku rẹ ihwo rẹ Amọr je gba-a.

¹⁷Ọke rẹ ọnre vwo she nu rẹ ebri vwo mu re, nighe, ubrochẹ vẹ erhanre ro bru ivwirhi vẹ ukpe rọ la da va nẹ uvwre rẹ ibro rẹ eranvwe na rhe.

¹⁸Vwẹ ẹdẹ yena Ọrovwohwo vẹ Ebram da re ọphọ tanẹ, Uvwiẹ wẹn Me vwẹ otọ nana kẹ, nẹ urhie rẹ Ijipt re te urhie rode na, urhie ri Yufretis.

¹⁹Otọ rẹ ihwo ri Ken, ihwo ri Keniz, ihwo ri Kadmon,

²⁰ihwo ri Hẹt, ihwo ri Pẹriz, ihwo ri Rifrem,

²¹ihwo rẹ Amọn, ihwo ri Kenan, ihwo ri Girgash kugbe ihwo ri Jebu.