Read urhobo Jẹnẹsis 16 Bible Online

Jẹnẹsis 16 - urhobo bible

Jẹnẹsis 16

¹Vwẹ ọke nana Serai, aye rẹ Ebram na, ji vwiẹ ọmọ kẹ-ẹ. Yo vwo ọmọtẹ rẹ Ijipt ọvo ro gbe odibo kẹ rẹ odẹ rọye Hagar;

²Serai da ta kẹ Ebram, Gbe no, Ọrovwohwo kanro ovwẹ o gbi ju vwe vwiẹ ọmọ-ọ, gbe bru ọmọtẹ mẹ na ra, ọkeọvo ke Me wan oma rọye vwo ọmọ. Ebram de nyo ota ri Serai na.

³Kọye, Ebram rhe vwọ dia Kenan ikpe ihwe nure, Serai, aye rẹ Ebram na, da vwi Hagar ohwo rẹ Ijipt ọmọtẹ rọye, vwọ kẹ Ebram ọshare rọye vwọ rọvwọ.

⁴O de bru Hagar ra, ọ da mrevun, rọ vwọ mrevun nure na, ko nẹ onini rọye na Serai saka.

⁵Serai da ta kẹ Ebram, Jẹn oruchọ ri mi ruru dia uyovwi wẹn; Me da vwẹ ọmọtẹ mẹ vwọ kẹ wẹ vwọ rọvwọ, rọ rhe vwọ mrẹ nẹ ọye mrevun na, ko ni vwe saka. Gbe jẹ Ọrovwohwo brorhiẹ mẹ vẹ ọwẹn,

⁶Ẹkẹvuọvo Ebram da ta kẹ Serai, Nighe, ogangan rẹ ọmọtẹ wẹn o rhe we, vwo ru obo ri je we. Etiyin Serai da djoma kpahọ, ọ da djẹ nẹ obọ rọye.

⁷Amakashe rẹ Ọrovwohwo da mrẹ vwẹ asan ogbugbu rẹ ame vwẹ evun rẹ aghwa, ogbugbu rọ orhoma rẹ idjerhe re de kpo Shur na.

⁸O da tanẹ, Hagar, ọmọtẹ ri Serai, tivọ wo nurhe ki tivọ wọ je ra? Ọ da tanẹ, Me djẹ nẹ obọ rẹ onini mẹ Serai

⁹Amakashe rẹ Ọrovwohwo na da ta kẹ, Rhivwi bru onini wẹn, ru wọ vwẹ oma kpotọ kẹ.

¹⁰Amakashe rẹ Ọrovwohwo na da je ta kẹ, Mi che ru uvwiẹ wẹn buebu gangan re de je se kere.

¹¹Amakashe rẹ Ọrovwohwo na da ta kẹ, Nighere, wọ mrevun, ku wo vwiẹ ọmọshare, gbe se odẹ rọye Ishmael, fikiridie Ọrovwohwo nyo oja wẹn re.

¹²Ọ cha họhọ ekẹtẹkẹtẹ rọ djoma, rẹ obọ rọye mu kohwo kohwo rẹ obọ ri kohwo kohwo ji mu rhe, vwẹ irharo rẹ imoni rọye o de yenre akpọ rọye.

¹³Kọye o de se asan rẹ Ọrovwohwo da ta ota kẹ na, Wẹ Ọghẹnẹ rọ mrorẹ, kidie ọ tare nẹ, Ke Me ghene mrẹ Ọghẹnẹ, Me mrẹrẹ nu Me da je rhọ?

¹⁴Fiki rẹ ọtiọye na e de se orhare na Beer-lahai-roi, ọ ughwru ri Kadẹsh vi Bẹrẹd.

¹⁵Hagar de vwiẹ ọmọshare kẹ Ebram, Ebram de se odẹ rẹ ọmọ na ri Hagar vwiẹ kẹ na Ishmael.

¹⁶Ebram da dia ikpe ujọne gbẹ esan vwẹ ọke ri Hagar vwo vwiẹ Ishmael kẹ Ebram.