Read urhobo Jẹnẹsis 18 Bible Online

Jẹnẹsis 18 - urhobo bible

Jẹnẹsis 18

¹Ọrovwohwo da vwẹ oma phia kẹ vwẹ oma rẹ ọhahe ri Mamre, ro vwo tidia anurhoro rẹ utughẹ rọye vwẹ oghẹruvo na.

²Ọ vwọ kparo ni, nighe eshare erha mudia vwẹ obaro rọye. Ọke rọ vwọ mrẹ ayen, ọ da djẹ nẹ anurhoro rẹ utughẹ na ra vwa ayen, o de diguẹ kẹ ayen,

³ọ da ta, Ọrovwovwe, ọ da dianẹ ivun mẹ vwerhe owẹ, wọ wanvrẹn odibo wẹ-ẹn.

⁴E jo vo ama ame rhe, re wa hworhẹ awọ wẹn, rere we rovwoma vwẹ otọ rẹ urhe na,

⁵re Me ra guọnọ eme emu rhe ru we vwo te unu, re wa ke wanvrẹn kidie ọ guakẹ ovwan ghwa vwẹriẹ asan rẹ odibo wẹn nure. Kọye ayen da ta kẹ nẹ, Gbe ru kiri obo rẹ wo tare na.

⁶Ebraham de bru Sera kpata kpata kpo obo utughẹ, ọ da ta, Chere emu kpata kpata kẹ ihwo erha, omamọ rẹ emu, gbe, re wọ kaka ikara.

⁷Ebraham da ghwa djẹ kpo obo uchuru rọye, o de mu upene rẹ erhuẹn, sọkọ sọkọ yoyovwi, ọ da vwọ kẹ odibo rọye, nọ ra rhuẹrẹ phẹrẹkpẹ.

⁸Ọ da reyọ evwri, kugbe ameivie vwo chere upene rẹ erhuẹn na, o de muo kẹ ayen, o de mudia kẹrẹ ayen vwẹ otọ rẹ urhe na je ayen ra ria.

⁹Ayen da nọ nẹ, Tivọ Sera rẹ aye wẹn epha? Ọ da tanẹ, Ọ obo utughẹ.

¹⁰Ọ da ta, Uyota Me cha rhoma rhe vwẹ asan evwru, Sera rẹ aye wẹn na che vwiẹ ọmọshare. Yi Sera ra kerhọ vwẹ anurhoro rẹ utughẹ na

¹¹Vwẹ ọke nana Ebraham vi Sera eghwore, ekpakoro gangan re; okpuyovwi ri Sera bru afe re.

¹²Etiyin Sera da hwẹ phihọ evun tanẹ, Ọke nana Me vwọ ghwo nure na, ekpuyovwi rẹ ọshare mẹ je ghwo, kẹ ọke na a ke mrẹ avwerhe ọfa?

¹³Ọrovwohwo da ta kẹ Ebraham, Kidie Sera vwọ hwẹ, tanẹ, Ke Me cha rhoma vwiẹ ọmọ vwẹ emare na?

¹⁴O vwo emuọvo rọ bẹn kẹ Ọrovwohwo? Ọke ri mi seri na ke Me cha rhoma bru we rhe, vwẹ asan evwru na, Sera ko che vwiẹ ọmọshare.

¹⁵Ẹkẹvuọvo Sera da ghwunu, tanẹ, Me hwẹre-e, kidie oshọ muro. Ọ da ta, Ẹjo, ẹkẹvuọvo wọ ghine hwẹ.

¹⁶Etiyin eshare na da yan nẹ Etiyin, ayen da garo vi Sodọm; Ebraham de sun ayen te idjerhe.

¹⁷Ọrovwohwo da ta, Ki mi si obo ri mi che ru na nu kẹ Ebraham,

¹⁸ye Me mrẹre nẹ Ebraham cha rho ri hirhe ẹgborho rode, rẹ ẹgborho rẹ akpọ na ejobi da wan oma rọye vwo ebruphihọ?

¹⁹Ẹjo, kidie Me jẹrẹ reyọ nure, nẹ oyono emọ rọye vẹ evwruwevwi rọye ejobi re ayen sẹro rẹ idjerhe rẹ Ọrovwohwo re ayen ru uruemu rẹ ọvwata vẹ ọsoso; rere ive rẹ Ọrovwohwo vẹ kẹ Ebraham na o vwo se ruo gba kẹ.

²⁰Etiyin Ọrovwohwo da ta kẹ, Kidie ekuvwie rẹ edo ri Sodọm vi Gomora ọ rhoro gangan umwemwu rayen brare gangan,

²¹Me ra Me ra mrẹ sẹ ekuvwie ri mi nyo kpahọ ayen na ghine uyota eyẹ efia, ọ rha dia uyota-a ke Me riẹn.

²²Etiyin ihwo na de ku oma rhẹriẹ nẹ Etiyin, ayen da garo vi Sodọm; ẹkẹvuọvo Ebraham ji mudia vwẹ obaro rẹ Ọrovwohwo.

²³Etiyin Ebraham de sikẹrẹ, ọ da ta, Ku wo ghine ghwọrọ evwata kugbe iruimwemwu?

²⁴Ọ da dianẹ a mrẹ ihwo ujuvẹ gbe ihwe re dia evwata vwẹ orere na; wọ je ghwọrọ asan na, wo rhe jẹ ihwo ujuvẹ gbẹ ihwe rẹ evwata na vwo vwọ?

²⁵A gha e se ru emu ọtiọye-e, rẹ e vwo hwe evwata kugbe iruimwemwu, re evwata vwọ họhọ iruimwemwu, A sa mrẹ-ẹ; Obrorhiẹ rẹ akpọ na rhe se ru obo re gbare?

²⁶Ọrovwohwo da ta, Me da sa mrẹ evwata ujuvẹ gbẹ ihwe vwi Sodọm, ki mi ji asan na vwo vwi fiki rẹ ayen.

²⁷Ebraham da kpahe, Nighe, Me ra ta ota kẹ Ọrovwohwo, mẹvwẹ re ekpẹn vẹ iwurhie diodi na,

²⁸Ọ da dianẹ a mrẹ evwata ujuvẹ gbẹ iyori? Ku wọ je ghwọrọ orere na fiki rẹ iyori ọvo ri nuro na? Ọ da ta, Me sa ghwọrọ-ọ ọ da dianẹ a mrẹ evwata ujuvẹ gbe iyori vwọ.

²⁹Ọ da rhoma ta kẹ nẹ, Ọ da dianẹ a mrẹ ujuvẹ vwọ. Ọ da kpahe, Vwi fiki rẹ ujuvẹ na mi se ruo-o.

³⁰Etiyin ọ da ta, Biko e jẹn ophu mu Ọrovwohwo-o, re Me ta Ọnana. Ọ da dianẹ a mrẹ ọgban vwọ. Ọ da ta, Mi se ruo-o, ọ da dianẹ Me mrẹ ọgban vwọ.

³¹Ọ da ta, Nighe, ki mi kpokpo Ọrovwohwo na. Ọ da dianẹ a mrẹ uje vwọ. Ọ da kpahe, Vwi fiki rẹ uje na Me gbe sa ghwọrọ-ọ.

³²Ọ da rhoma ta, Biko e jẹn ophu mu Ọrovwohwo-o, Me je ta obọ nana tavwe. Ọ da dianẹ a mrẹ ihwo ihwe vwọ. Ọ da ta, Fiki rẹ ihwe na Me je sa ghwọrọ-ọ.

³³Ọrovwohwo da yanran, vwẹ ọke rẹ Ebraham vẹ ọye vwọ ta ota nu: Ebraham de rhivwi kpo.