Read urhobo Jẹnẹsis 19 Bible Online

Jẹnẹsis 19 - urhobo bible

Jẹnẹsis 19

¹Emakashe ivẹ na de rhi te Sodọm vwẹ ovwọnvwọn, yi Lọt tidia ughere ri Sodọm, Ri Lọt vwọ mrẹ ayen, o de vrẹn ra vwa ayen, o de diguẹ bọvwọ opharo rhu otọ,

²ọ da ta, Ọrovwovwe vwẹriẹ rhe, Me rẹ wẹ, uwevwi rẹ odibo wẹn re wọ dia Etiyin ason na, re wa hworhẹ awọ rẹ ovwan, re ọke de rhie irhiọke wa ke yanran. Ayen da ta, Ẹjo, evun rẹ urhuvwu na avwanre cha vwerhẹ.

³Ẹkẹvuọvo ọda rẹ ayen gangan; kọye ayen da vwẹriẹ bro kpo uwevwi rọye, o de chere emu kẹ ayen, ọ da kaka ikara ro jephuo, ayen da re.

⁴Ẹkẹvuọvo tavwe rẹ ayen ki rhi sherhẹ, eshare rẹ orere na, eshare ri Sodọm, te omotete te ọkpako, ihwo na ejobi tototo, de sogodogo riariẹ uwevwi na;

⁵ayen de se Lọt, nẹ, Ke eshare ri wo uwevwi wẹn ason na rhọ? Reyọ ayen phia kẹ avwanre, rere avwanre vughe ayen.

⁶Lọt da ro otafe ra vwa ihwo na, ọ da kare ẹchẹ gbe erhorha na,

⁷ọ da ta, Me rẹ ovwan, imoni mẹ, we ruẹ emu umwemwu tiọnana-a.

⁸Nighe, mi vwo emetẹ ivẹ re je riẹn ọshare-e, ju vwe vwẹ ayen kẹ ovwan, ru we ru ayen obo ri je ovwan, ẹkẹvuọvo wa vwẹ obọ te erhorha mẹ na-a, kidie uwevwi mẹ ayen rhi wo.

⁹Ẹkẹvuọvo ayen da ta, Si te obuko, Ayen da tanẹ, Ohwo nana ro suosuo rhe na, kọye cha vwẹ oma ru obrorhiẹ, Avwanre vwẹ ẹro wẹn mrẹ oja nọ obo ri Me ru kẹ ihwo nana. Etiyin ayen de keke Lọt mu egba, kẹ ayen nyẹ ẹchẹ na re ọbẹre.

¹⁰Ẹkẹvuọvo ihwo na da riẹn obọ vwo kpono Lọt ro uwevwi, ayen de huhu ẹchẹ.

¹¹Ayen da vwẹ egho rhurhu ihwo ri bi koko anurhoro na ẹro, te emọ te ekpako, ki ruẹ rhurhu vwẹ abọ guọnọ anurhoro.

¹²Etiyin ihwo na da ta ki Lọt Wo ji vwo ohwo ọfa vwẹ etinẹ? Egọ, emeshare, emetẹ eyẹ ohwo ọfa vwẹ orere na, sio nẹ asan na,

¹³fikiridie avwanre cha ghwọrọ etinẹ na, kidie edo rẹ orukuruku rẹ ihwo nana rhi duvwu erhọ rẹ Ọrovwohwo, Ọrovwohwo kọye ri ji avwanre rhe re ghwọrọ na.

¹⁴Etiyin Lọt da yan phia ra vuẹ egọ rọye nẹ, We vrẹn jọphẹre, ru we vrẹn nẹ etinẹ na, kidie Ọrovwohwo cha ghwọrọ orere na. Ẹkẹvuọvo egọ rọye da vwẹ ota na roro ehwẹjẹ.

¹⁵Rẹ ọke rhi vwo rhie re, emakashe na ki bru Lọt okpakpa nẹ, Vrẹn, reyọ aye wẹn kugbe emetẹ wẹn ivẹ na ri etinẹ na, ayen da rha ghwọrọ vwẹ evun rẹ ẹguọghọ rẹ orere na.

¹⁶Ẹkẹvuọvo ko gbe eghẹrẹ, kọye ihwo na de shabọ vwọ kugbe aye rọye kugbe emetẹ rọye ive na, ọ da yọnrọn ayen obọ, Ọrovwohwo ki nẹ aruẹdọ rọye, ayen da reyọ kpono nẹ evun rẹ orere na.

¹⁷Ọke rẹ ayen vwọ reyọ ayen phihọ uphephẹ nu, ayen da ta, Djẹ kẹ arhọ wẹn, we nẹ obuko-o eyẹ we mudia vwẹ ukpotọ na-a, djẹ kpo obo ugbenu na, wa da ghwọrọ.

¹⁸Lọt da ta kẹ ayen, E, ẹjo, irivwovwe,

¹⁹nighe, ọviẹn wẹn mrẹ aruesiri vwẹ obọ wẹn nure, we ni aruẹdọn mẹ gangan ri we vwo sivwi arhọ mẹ, yẹ ẹkẹvuọvo Me sa djẹ kpo obo igbenu na-a, ughwu de ke vwe phihọ, mi de rhe ghwu.

²⁰Nighe, orere rọ oboyi na kẹrobọ ra dje ra, o ke je havwe. Ju vwe djẹ kpo Etiyin — ọ dia ọhahavwe? — erhi mẹ kọ rhọ;

²¹Ọ da ta kẹ, Nighe, Me je rhọvwe oyare nana kẹ wẹ rhe, Me gbe ghwọrọ orere na ro wọ tare na-a.

²²Jọphẹre, djẹ kpo Etiyin, kidie Me che ru emuọvo-o bẹsiẹ ru wo vwo te Etiyin. Fiki rẹ ọtiọye na e de se odẹ rẹ orere na Zoar.

²³Ọnre ghwa vacha vwẹ ọke ri Lọt vwo te Zoar.

²⁴Etiyin Ọrovwohwo da rhọ osio rẹ ibieragha vẹ erhanre phihọ Sodọm vi Gomora nẹ obo odjuvwu rhe,

²⁵ọ da ghwọrọ irere yena ejobi, vẹ ishekpotọ na ejobi, kugbe ẹbe re djẹ vwẹ otọ na ejobi.

²⁶Ẹkẹvuọvo aye ri Lọt rọ ka obuko de ni obuko, o de hirhe phihọ ẹrhẹnre rẹ ughweraka.

²⁷Ebraham da yan vwẹ irhiọke ride vwo kpo asan ro de mudia vwẹ obaro rẹ Ọrovwohwo na,

²⁸ọ da kpare opharo ni Sodọm vi Gomora kugbe ishekpotọ na, nighe, o vwo ni, ivwirhi rẹ orho na de bru kpenu kerẹ erhanre re etu.

²⁹Ke eriyin ọ epha, vwẹ ọke rẹ Ọghẹnẹ vwọ guọghọ irere rẹ ishekpotọ na, Ọghẹnẹ da karohọ Ebraham, o de si Lọt nu uherevie rẹ erhanre na, vwẹ ọke ra vwọ torhẹ orere ri Lọt diare.

³⁰Ọke yena Lọt de vrẹn ni Zoar, vwo kpo enu rẹ ugbenu ọ vẹ emetẹ rọye ivẹ na, fiki rẹ oshọ rọ vwọ dia Zoar muro; evun rẹ emwa kọye ọ vẹ emetẹ rọye ivẹ na diare.

³¹Ọ rẹ ọkpako da ta kẹ ọ rẹ otete, Ọsẹ rẹ avwanre ghwo re, yẹ o vwo ohwo ọvuọvo vwẹ akpọ na ro bru avwanre rhe kirobo re ruẹ vwẹ akpọ na-a.

³²Yanrhe, re avwanre vwẹ idi kẹ da, rere avwanre wan oma rẹ ọsẹ rẹ avwanre vwo emọ.

³³Etiyin ayen da vwẹ idi kẹ ọsẹ rayen da ason yena; oro ọkpako de bru ọsẹ rọye kpo ovwerhẹ, ọ riẹn ọke ro vwo sherhẹẹ ọ je riẹn ọke ro vwo vrẹ-ẹn.

³⁴Vwẹ ẹdẹ rivẹ, oro ọkpako da ta kẹ ọ rẹ otete, Nighe, Me vẹ ọsẹ Me ri gbe sherhẹ ason rọ wanre na, jẹ a je vwẹ udi kẹ da vwẹ ason na rhe, rere wọ vẹ ọye je vwerhẹ rhe, rere vwẹ oma rọye uvwiẹ rẹ avwanre vwo je fue.

³⁵Etiyin ayen da je vwẹ udi kẹ ọsẹ rayen da vwẹ ason yena rhe, ọ rẹ otete vrẹnri, ọ vẹ ọye de shevwerhẹ, ọ riẹn ọke ro vwo sherhẹ-ẹ ọ je riẹn ọke ro vwo vrẹ-ẹn.

³⁶Enẹ kọye emetẹ ri Lọt ivẹ na wan oma rẹ ọsẹ rayen mrevun.

³⁷Ọ rẹ ọkpako na de vwiẹ ọmọshare, o de se odẹ rọye Moab, kọye ọsẹ rẹ ihwo ri Moab rhi te nonẹ na.

³⁸Ọ rẹ otete de ji vwiẹ ọmọshare, o de se odẹ rọye Ben-ammi, kọye ọsẹ rẹ ihwo rẹ Ammọn rhi te nonẹ na.