Read urhobo Jẹnẹsis 2 Bible Online

Jẹnẹsis 2 - urhobo bible

Jẹnẹsis 2

¹Kẹnẹ a ma odjuvwu vẹ akpọ kugbe obo re vọnrọ ejobi wan.

²Vwẹ ẹdẹ rẹ ighwrẹ iruo rẹ emama rẹ Ọghẹnẹ ruru ejobi de rhi re, o de rovwoma vwẹ ẹdẹ rẹ ighwrẹ na vwẹ enu rẹ iruo ro ruru.

³Ọtiọye Ọghẹnẹ de bruphihọ ẹdẹ rẹ ighwrẹ na, ọ da vwẹ ọghọ kẹ, fikiridie ẹdẹ yena Ọghẹnẹ vwo rovwoma vwẹ enu rẹ iruo ro ruru vwẹ emama rọye.

⁴Enana keye uvwiẹ rẹ odjuvwu vẹ akpọ vwẹ ọke ra vwọ ma ayen. Vwẹ ẹdẹ rẹ Ọrovwohwo Ọghẹnẹ vwọ ma akpọ vẹ odjuvwu nu,

⁵Vwẹ ọke rẹ okankọn vuọvo je djẹ vwẹ aghwa na eyẹ odi vuọvo je djẹ phiaa — kidie Ọrovwohwo Ọghẹnẹ je rhọ osio phihọ akpọ na-a, yẹ ohwo je dia ro voro otọ na-a;

⁶ẹkẹvuọvo evwru kọye di muẹ nẹ otọ na kpenu ọ Me rhe kpọrhọ otọ na ejobi —

⁷kọye Ọrovwohwo Ọghẹnẹ da vwẹ ekpẹn rẹ otọ na vwọ ma ohwo, ọ da wẹn ẹwẹn rẹ arhọ na phihọ iwen rọye, ohwo de hirhe ohwo ọkpokpọ.

⁸Ọrovwohwo Ọghẹnẹ de voro udju phihọ Idẹn vwẹ ẹbẹre rẹ ọnre da vacha, kẹ Etiyin o phi ohwo rọ mare na phihọ.

⁹Vwẹ evun rẹ otọ na kọye Ọrovwohwo Ọghẹnẹ tare nẹ urhe kurhe ro yovwiri, fẹro ji fẹriọ gba djẹrhe, urhe rẹ arhọ na rọ ji uherevie rẹ udju na, kugbe urhe rẹ erianriẹn rẹ erhuvwu vẹ umiovwo.

¹⁰Urhie da va phia vwẹ Idẹn rere ọrhuọrhuọ udju na, Etiyin ọ da jẹn eghọn ẹne.

¹¹Odẹ rẹ ọrẹsosuọ Pishọn, ọna re djẹ nene ubrotọ ri Havila, ra da mrẹ oro;

¹²oro rẹ otọ na pha yoyovwi; bideliọm vẹ oragha rẹ oniks; je otọ na rhe.

¹³Odẹ rẹ urhie rivẹ ki Gihọn, urhie nana re djẹ wan ubrotọ ri Kush.

¹⁴Odẹ rẹ urhie rerha ki Tigris, rọ djẹ nene obọrhe rẹ Asira. Urhie rẹne ki Yufretis.

¹⁵Ọrovwohwo Ọghẹnẹ da reyọ ohwo na o de phio phihọ udju rẹ Idẹn na rere ọ sẹro rọye.

¹⁶Ọrovwohwo Ọghẹnẹ de ji urhi kẹ ohwo na, nẹ, Wọ sa re omamọ komamọ rẹ udju na obo ri jẹn we;

¹⁷ẹkẹvuọvo urhe rẹ erianriẹn rẹ erhuvwu vẹ umiovwo na wọ riọọ, kidie ẹdẹ re wọ rerọ ku wo ghwu.

¹⁸Ọrovwohwo Ọghẹnẹ da ta, Oyoma rere ọshare ọvo vwọ dia sogono-o, Me ma ọchuko ro fori vwọ kẹ.

¹⁹Kọye vwẹ evun rẹ otọ na re, Ọrovwohwo Ọghẹnẹ da ma eranvwe keranvwe rẹ aghwa na kugbe ọphran kọphran rẹ enu na, ọ da ghwẹ ayen vwọ kẹ ohwo na sọsa mrẹ obo ro se ayen; obo rẹ ohwo na se eranvwe keranvwe ekpokpọ na, kẹ odẹ yena ese.

²⁰Ohwo na de mu odẹ kẹ uchuru ejobi, vwọ kẹ ephran rẹ obenu na, ji te eranvwe rẹ aghwa na, ẹkẹvuọvo vwọ kẹ ekpuyovwi rẹ ohwo na a gbe mrẹ ọchuko ro fori vwọ kẹ-ẹ.

²¹Kọye Ọrovwohwo Ọghẹnẹ da vwẹ ovwerhe rode vwo mu ohwo na, rọ vwọ vwerhẹ re ọ da reyọ ubiedada rọye ode ko di;

²²ubiedada rẹ Ọrovwohwo Ọghẹnẹ reyọre nẹ oma rẹ ọshare rhe na o da vwọ ma aye ọ da reyọ vwọ kẹ ọshare na.

²³Etiyin ọshare na da ta, Ọnana ubeku mẹ kugbe uvwo rẹ uvwo mẹ, ke se nẹ Aye, fikiridie oma rẹ ọshare esiro nurhe.

²⁴Fiki rẹ ọtiọye na ọshare vwọ yan jẹn ọsẹ rọye vẹ oni rọye vwo kọ rhe gbanọ aye rọye, ayen ke dia oma ọvo.

²⁵Te ọshare na ve aye rọye da ban phihọ, yẹ oma vo aye-en.