Read urhobo Jẹnẹsis 20 Bible Online

Jẹnẹsis 20 - urhobo bible

Jẹnẹsis 20

¹Nẹ Etiyin Ebraham de mu oyan ọ da garo ni ẹbẹre ri Nẹgẹb, ọ da ra dia uvwre ri Kadẹsh vi Shur, ubrakpọ ri Gẹra kọye o de di muẹ yan.

²Ebraham da ta kẹ Sera rẹ aye rọye, Wẹ oniọvo mẹ, Abimẹlẹk ovie ri Gẹra de ji ukọ ra reyọ Sera.

³Ẹkẹvuọvo Ọghẹnẹ de bru Abimẹlẹk rhe vwẹ evwerhẹ vwẹ ason, ọ da ta kẹ, Nighe, orivwi wọ epha na, fiki rẹ aye ru wọ reyọre na, kidie aye rẹ ohwo ọfa o ruẹ.

⁴Vwẹ ọke yena yẹ Abimẹlẹk ji si kẹrẹ-ẹ, Etiyin ọ da ta Ọrovwohwo, ku wo di hwe ohwo ekueku?

⁵Ọ dianẹ ọye ọvo re ta kẹ vwẹ nẹ, Oniọvo mẹ? Okpuyovwi rẹ aye na da je tanẹ, Oniọvo mẹ. Vwẹ ọvwata rẹ udu mẹ kugbe abọ ọfuanfon mẹ ọye mi vwo ru ọna.

⁶Etiyin Ọghẹnẹ da ta kẹ vwẹ evun rẹ evwerhẹ, Uyota, Me riẹnre nẹ evun ọfuanfon wo vwo ru Ọnana, yẹ omẹvwẹ re sorọ ru wo vwo jẹ umwemwu eruo kpahọ ovwẹ, fiki rẹ ọtiọye na mi gbi ji wọ vwẹ obọ te-e.

⁷Gba vwẹ aye rẹ ohwo na vwọ kẹ; fikiridie ọmraro o ruẹ, kọ nẹ ẹrhovwo kẹ wẹ, kọye wọ rhọre. Ẹkẹvuọvo wọ rha vwọ kẹ-ẹ, gba riẹn tanẹ ughwu kọye wo ghwu, wẹ kugbe ekru wẹn ejobi.

⁸Kọye Abimẹlẹk de vrẹn vwẹ irhiọke ride, o de se idibo rọye, o de gbe ikun nana ejobi kẹ ayen, oshọ de mu ayen gangan.

⁹Etiyin Abimẹlẹk de se Ebraham, ọ da ta kẹ, Die wo ru kẹ avwanre na? Kidie mi ru we, ru wọ vwọ nẹrhẹ ovwẹ vẹ uvie mẹ ru umwemwu rode tiọnana? Wo ru obo rẹ ohwo e ru-u vwọ kẹ vwẹ.

¹⁰Abimẹlẹk da ta kẹ Ebraham, Die wo rori vwo ru emu nana?

¹¹Ebraham da ta, Mi ruro fikiridie mi rori nẹ, Oshọ ẹdjẹ rẹ Ọghẹnẹ ọ etinẹ-ẹ, ayen de rhe hwe vwe fiki rẹ aye mẹ.

¹²Uyota oniọvo mẹ o ghine ruẹ, ọmọtẹ rẹ ọsẹ mẹ ẹkẹvuọvo ọ dia ọmọ rẹ oni mẹ-ẹ, kọye mi de vwo ru aye.

¹³Vwẹ ọke rẹ Ọghẹnẹ vwọ tani mi suosuo nẹ uwevwi rẹ ọsẹ mẹ, Me da ta kẹ, Ọnana kọye ẹse ri wo ru kẹ vwẹ, kasan kasan rẹ avwanre yan te, gba ta kpahọ vwẹ nẹ, Oniọvo mẹ o ruẹ.

¹⁴Kọye Abimẹlẹk da reyọ ogodẹ vẹ irhuẹn kugbe eviẹn rẹ eshare vẹ erẹ eya, ọ da vwẹ ayen kẹ Ebraham, o de siobọ nẹ Sera rẹ aye rọye na vwọ kẹ.

¹⁵Etiyin Abimẹlẹk da ta, Nighe, otọ mẹ na rhie phihọ kẹ wẹ, asan ro je we vwọ gba dia.

¹⁶Ọ da ta kẹ Sera nẹ, Nighe, Me vwẹ ikpahọ ujori ihwe rẹ idọnọ efuanfon vwọ kẹ oniọvo wẹn re, Ọnana igho rẹ arhuẹrẹ wẹn vwọ kẹ ihwo rẹ ovwan, kohwo kohwo rẹ oma wẹn ejobi Me vẹ ayen rhuẹrẹ kugbe.

¹⁷Etiyin Ebraham da nẹ ẹrhovwo kẹ Ọghẹnẹ, Ọghẹnẹ de sivwi Abimẹlẹk, o de ji sivwi aye rọye kugbe eviẹn rẹ eya ro vwori ejobi, kọye ayen de vwiẹ emọ.

¹⁸Fikiridie Ọrovwohwo bru eya rẹ uwevwi rẹ Abimẹlẹk uvwiẹ fiki ri Sera rẹ aye rẹ Ebraham rọ reyọre.