Read urhobo Jẹnẹsis 21 Bible Online

Jẹnẹsis 21 - urhobo bible

Jẹnẹsis 21

¹Ọrovwohwo de bru Sera rhe kirobo rọ ta kẹ jovwo, Ọrovwohwo de ru kẹ Sera kirobo ro vẹ kẹ.

²Sera da mrevun, o de vwiẹ ọmọshare kẹ Ebraham vwẹ uyovwi esha na vwẹ ọke rẹ Ọghẹnẹ vẹ phihọ kẹ na.

³Ebraham de se odẹ rẹ ọmọ na re vwiẹ kẹ na, ri Sera vwiẹ kẹ na Aizik.

⁴Ebraham da yanvwọ ọmọ rọye Aizik rọ vwọ gba ẹdẹ ẹrenren, kiri urhi rẹ Ọghẹnẹ ji kẹ

⁵Ebraham da dia ikpe ujori vwẹ ọke re vwo vwiẹ ọmọ rọye Aizik kẹ.

⁶Etiyin Sera da ta, Ọghẹnẹ ma ehwẹ kẹ vwẹ; kohwo kohwo ro nyori ejobi kọ cha hwẹ vwẹ.

⁷Ọ da ta, Kono re ata kẹ Ebraham nẹ Sera cha vwẹ evie kẹ ọmọ? Dede na yi mi vwiẹ ọmọ kẹ vwẹ uyovwi esha na.

⁸Ọmọ na da rhe rho, o de rhi bro evie; Ebraham de rhi chere emu buebu vwẹ ẹdẹ rẹ Aizik vwo bru evie nu.

⁹Ẹkẹvuọvo Sera da mrẹ ọmọ ri Hagar rẹ ohwo rẹ Ijipt na, ro vwiẹ vwọ kẹ Ebraham na, rọ vẹ Aizik rẹ ọmọ rọye gba ha eha.

¹⁰Ọ da ta kẹ Ebraham, Djẹ aye na ọviẹn na vẹ ọmọ rọye kufia, kidie ọmọ rẹ aye nana rẹ ọviẹn na vẹ ọmọ mẹ Aizik se koko re uku-u.

¹¹Emu nana de tun Ebraham oma vwi fiki rẹ ọmọ rọye.

¹²Ẹkẹvuọvo Ọghẹnẹ da ta kẹ Ebraham, Wo jẹ Ọnana tun we oma vwi fiki rẹ ọmọ na vẹ aye na rẹ ọviẹn na-a; obo ri Sera ta kẹ wẹ ejobi, ru kirobo rọ tare kidie oma rẹ Aizik ọye uvwiẹ wẹn de che vwo odẹ.

¹³Ki mi ji ru rere ẹgborho vwo nẹ oma rẹ ọmọ rẹ aye rẹ ọviẹn na rhe, fikiridie ọmọ obọ wẹn oruẹ.

¹⁴Kọye Ebraham de vrẹn vwẹ irhiọke ride, ọ da reyọ ikara vẹ ophiẹn rẹ ame, ọ da vwọ kẹ Hagar, ọ da vwọ ya igabọ, kugbe ọmọ na, o de ji ayen yanran. O de vrẹn yanran ko di muẹ yan vwẹ aghwa ri Bẹẹrsheba.

¹⁵Ọke rẹ ame rọ evun rẹ ophiẹn na vwo re nu, o de mu ọmọ na phihọ otọ rẹ etu.

¹⁶Ọ da yanran re tidia tephe vwẹ ogboko kẹ ọmọ na vwẹ uvwre rẹ asan rẹ umurhabọ sa yan te, kidie ọ tare ne, E ju vwe mrẹ orivwi rẹ ọmọ na-a. Ọke ro vwo tidia oboyi ro vwo no re, ọmọ na da teye ugoroviẹ.

¹⁷Ọghẹnẹ de nyo oviẹ rẹ ọmọ na, Etiyin amakashe rẹ Ọghẹnẹ de se Hagar nẹ obo odjuvwu rhe, ọ da ta kẹ, Die ri kpokpo uwe, Hagar? Wọ djẹ oshọ-ọ, kidie Ọghẹnẹ nyo urhuru rẹ ọmọ na vwẹ asan rọ epha.

¹⁸Vrẹn wọ kpare ọmọ na, ru wọ yọnrọn kokoroko vwẹ obọ wẹn, kidie mi che ruo phihọ ẹgborho rode

¹⁹Etiyin Ọghẹnẹ de rhie ẹro rọye, ọ da mrẹ orhare rẹ ame, ọ da yanran, re vo ame vọn ophiẹn rọye, ọ da vwọ kẹ ọmọ na da.

²⁰Ọghẹnẹ vẹ ọmọ na da herọ, ọ da rhe rho, ọ dia evun rẹ aghwa, o de rhi hirhe ọsedada.

²¹Ọ da dia aghwa ri Paran, oni rọye da reyọ ọmọtẹ rẹ Ijipt vwọ kẹ vwọ rọvwọ

²²Vwẹ ọke yena, Abimẹlẹk vi Fikol rẹ onotu rẹ ofovwi rọye da ta kẹ Ebraham, Ọghẹnẹ vẹ owẹ herọ vwẹ emu kemu ri wo ruẹ ejobi,

²³Vwẹ etinẹ na gba vwẹ Ọghẹnẹ duvwu iyori nẹ wo shenyẹ vwẹ ekueku eyẹ ọmọ mẹ eyẹ uvwiẹ mẹ, ẹkẹvuọvo obo re Me vwẹ obo tete uwe na, eriyin wo ji ru kẹ vwẹ kugbe otọ nana ru wọ diare jovwo na.

²⁴Ebraham da ta, Mi duvwo.

²⁵Ọke rẹ Ebraham vwo gu kẹ Abimẹlẹk kpahe orhare rẹ ame rẹ idibo rẹ Abimẹlẹk gborhori.

²⁶Abimẹlẹk da ta, Me riẹn ohwo ro ru emu nana-a; wọ ta kẹ vwẹ jovwo-o, mi ji nyo ota nana rhi te nonẹ na-a.

²⁷Etiyin Ebraham da reyọ ogodẹ kugbe erhuẹn ọ da vwẹ ayen kẹ Abimẹlẹk, ayen ihwo ivẹ na da re ọphọ.

²⁸Ebraham da reyọ upene rẹ igodẹ rẹ eya ighwrẹ vwẹ ohri rẹ uchuru rọye na phihọ orhọ.

²⁹Abimẹlẹk da ta kẹ Ebraham, Kidie otọ rẹ upene rẹ igodẹ rẹ eya ighwrẹ ru wọ vwọ orhọ na?

³⁰O da ta, Igodẹ rẹ eya nana ighwrẹ na gba reyọ ayen mie vwe, rere e dia iseri nẹ mẹvwẹ ri ghine tọn orhare na.

³¹Fiki rẹ ọtiọye na e de se asan na Bẹẹrsheba, fikiridie Etiyin ayen ihwo ivẹ na da re ọphọ.

³²Etiyin ayen da re ọphọ vwi Bẹẹrsheba Abimẹlẹk vẹ Fikol rẹ onotu rẹ ofovwi rọye de vrẹn ayen da rhoma rhivwi kpo otọ ri Filistia.

³³Ebraham da kọn oghriki phihọ Bẹẹrsheba, o de se odẹ rẹ Ọrovwohwo vwẹ Etiyin, Ọghẹnẹ ri bẹvwẹdẹ na.

³⁴Ebraham da dia otọ ri Filistia na krekri.