Read urhobo Jẹnẹsis 22 Bible Online

Jẹnẹsis 22 - urhobo bible

Jẹnẹsis 22

¹Rẹ imu nana ejobi vwọ wan nu Ọghẹnẹ da davwe Ebraham ni, ọ da ta kẹ, Ebraham; O de nyo nẹ, Mẹvwẹ na.

²Ọ da ta, Reyọ ọmọ wẹn ọmọ wẹn ọvuọvo na Aizik, rẹ ivun rọye vwerha owẹ na, re wọ yanran kpo otọ ri Moriah, rẹ wọ dia Etiyin de vwo ze izobo rẹ ẹtorhẹ vwẹ enu rẹ ugbenu ọvo na ri mi che dje kẹ wẹ.

³Etiyin Ebraham de vrẹn vwẹ irhiọke ride, ọ da jẹn ufi phihọ ekẹtẹkẹtẹ rọye, ọ da reyọ emeshare rọye ivẹ vwọ boma, kugbe ọmọ rọye Aizik, o de kru ekrirhe re ze izobo rẹ ẹtorhẹ na, o de vrẹn vwo kpo asan rẹ Ọghẹnẹ dje kẹ na.

⁴Vwẹ ẹdẹ rẹ erha Ebraham da kparo ọ da mrẹ asan na vwẹ ogboko.

⁵Etiyin Ebraham da ta kẹ emeshare rọye na, We mudia etinẹ kẹrẹ ekẹtẹkẹtẹ na, mẹvwẹ vẹ ọmọ na ke yanran kpo oboyi kpo ẹga rere avwanre ki rhivwi bru ovwan rhe.

⁶Ebraham da reyọ ekrirhe re vọ izobo rẹ ẹtorhẹ na, o de muo kpahọ ọmọ rọye Aizik, ọ da yọnrọn utuerhanre kugbe aphia vwẹ obọ. Kọye ayen ivẹ na de ku usun phihọ.

⁷Aizik da ta kẹ Ebraham rẹ ọsẹ rọye, Ọsẹ mẹ; O de nyo nẹ, Mẹvwẹ na mọmẹ, Ọ da ta, Nighe, erhanre kugbe irhe, ẹkẹvuọvo kẹ egbo rẹ izobo rẹ ẹtorhẹ na kẹ ọrhọ?

⁸Ebraham da ta, Ọghẹnẹ ọvo che bibi egbo rẹ izobo rẹ ẹtorhẹ na rhe ọmọ mẹ. Kọye ayen ivẹ na de ku usun họ.

⁹Ọke rẹ ayen rhi vwo te asan rẹ Ọghẹnẹ ta kẹ na, Ebraham da so agbada vwẹ Etiyin, ọ da rhuẹrẹ irhe na phihọ, ọ da gba Aizik rẹ ọmọ rọye na o de muo kpahe enu rẹ agbada na, rọ enu rẹ irhe na.

¹⁰Etiyin Ebraham da kpare obọ, ọ da reyọ aphia ro che vwo bru ọmọ rọye na.

¹¹Ẹkẹvuọvo amakashe rẹ Ọrovwohwo de se nẹ obo odjuvwu rhe, ọ da ta, Ebraham! Ebraham! O de nyo nẹ, Mẹvwẹ na.

¹²Ọ da ta, Wọ ghwe obọ kpahe ọmọ na eyẹ wo ru emuọvo kẹ-ẹ, kidie Ọnana Me vwọ riẹn nu wọ djẹ oshọ rẹ Ọghẹnẹ, ru wọ vwẹ ọmọ wẹn na, ọmọ vuọvo wẹn na vwọ djahe obuko kẹ vwẹ-ẹ.

¹³Ebraham da kpare opharo, o vwo ni, obuko rọye ọ da mrẹ egbo, rẹ ighoro rọye gbahọ etu, Ebraham da yanran ra reyọ egbo na, kọye o vwo ze izobo rẹ ẹtorhẹ vwẹ ẹdia rẹ ọmọ rọye.

¹⁴Kọye Ebraham de se odẹ rẹ asan na Ọrovwohwo re sa kẹ: eriyin ọ epha rhi te nonẹ na, Vwẹ enu rẹ ugbenu rẹ Ọrovwohwo Etiyin a da mrẹ.

¹⁵Amakashe rẹ Ọrovwohwo da rhoma se obọ rivẹ nẹ obo odjuvwu rhe,

¹⁶ọ da ta, Me vwẹ oma mẹ duvwu iyori, eriyin Ọrovwohwo tare, fikiridie wo ru Ọnana, wọ sa vwẹ ọmọ wẹn, ọmọ vuọvo wẹn na vwọ djahe obuko kẹ vwẹ-ẹ,

¹⁷Ki mi bruphihọ kẹ wẹ, ki mi ru uvwiẹ wẹn buphihọ kiri isio rẹ obo odjuvwu kiri ibiekpẹn re orhoma rẹ urhie. Uvwiẹ wẹn ke cha vwẹ anurhoro rẹ ivwighrẹ rayen riuku,

¹⁸vwẹ oma rẹ uvwiẹ wẹn ọye ẹgborho rẹ akpọ na ejobi wan vwo ebruphihọ kẹ oma rẹ ayen, fikiridie wo mu ọghọ kẹ urhuru mẹ.

¹⁹Etiyin Ebraham de rhivwi bru emeshare rọye ra, ayen da yan usun kpo Bẹẹrsheba; Ebraham da dia Bẹẹrsheba.

²⁰Ọke rẹ imu nana ejobi vwọ wan nu, a da ta kẹ Ebraham, Nighe, Milkah rhoma rhi vwiẹ emọ kẹ Nahọr rẹ oniọvo wẹn,

²¹Uz rẹ ọmọkpako, Buz rẹ oniọvo rọye, Kemuẹl ọsẹ rẹ Aram,

²²Kesed, Hazo, Pildash, Jidlaf, kugbe Bẹtuẹl.

²³Bẹtuẹl kọye ọsẹ ri Rebeka. Enana ẹrenren na Milkah vwiẹ kẹ Nahọr oniọvo rẹ Ebraham.

²⁴Ọsẹ rọye re se Reumah de rhe vwiẹ Teban, Gaham Tahash, kugbe Maʼakah.