Read urhobo Jẹnẹsis 24 Bible Online

Jẹnẹsis 24 - urhobo bible

Jẹnẹsis 24

¹Asakiephana Ebraham ghworo, ọ tọnre gangan; Ọrovwohwo de bruphihọ kẹ Ebraham vwẹ emu buebu

²Ebraham da ta kẹ odibo rọye, rọ dia ọkpako vwẹ uwevwi rọye, rọ vwẹ ẹro te emu ro vwori ejobi, Phi obọ wẹn phihọ obotọ rẹ ekpoghowọ mẹ,

³ke Me vwo owẹ duvwu iyori vwẹ odẹ rẹ Ọrovwohwo Ọghẹnẹ rẹ odjuvwu vẹ akpọ, ne wọ sa reyọ aye rọ dia ọmọtẹ rẹ ihwo ri Kenan, re Me dia uherevie ayen na, vwọ kẹ ọmọ mẹ-ẹ,

⁴ẹkẹvuọvo ku wo kpo orho mẹ kpo uvwiẹ mẹ, kẹ Etiyin wọ da reyọ aye kẹ ọmọ mẹ Aizik.

⁵Odibo na da ta kẹ, Kẹ ọke rẹ aye na gbe rha rhọvwe nene uvwe rhe otọ nana-a, ke Me rha rhoma reyọ ọmọ wẹn rhivwi kpo otọ ru wo nurhe na?

⁶Ebraham da ta kẹ nẹ, E ja mrẹ nẹ wọ rhoma reyọ ọmọ mẹ kpo oboyi-i.

⁷Ọrovwohwo Ọghẹnẹ rẹ odjuvwu, rọ reyọ ovwẹ nẹ uwevwi rẹ ọsẹ mẹ rhe kugbe otọ re de vwiẹ vwẹ na, ọ rọ ta ota kẹ vwẹ na nẹ, Uvwiẹ wẹn Me vwẹ otọ nana kẹ, o che ji amakashe rọye karo kẹ wẹ, kẹ oboyi wọ da reyọ aye kẹ ọmọ mẹ.

⁸Ẹkẹvuọvo aye na gbe rhọvwe nene uwe-e, yẹ iyori mẹ na gbi se mu we-e; ẹkẹvuọvo wọ reyọ ọmọ mẹ vwo rhivwi kpo oboyi kakaka-a.

⁹Etiyin odibo na de phi obọ phihọ ekpoghowọ rẹ Ebraham rẹ onini rọye o de duvwu iyori fiki rẹ ota nana.

¹⁰Etiyin odibo na da reyọ iyesi ihwe rẹ onini rọye ọ da yanran, ọ da reyọ oghoghẹre rẹ ekuakua ra vwọ phare ọkon mie onini rọye, o de vrẹn ọ da yanran kpo Mẹsopotemia, vwo kpo orere ri Nahọr.

¹¹Ọ da vwẹ iyesi na shevwerhẹ otọ vwẹ ughere rẹ orere na vwẹ orhoma rẹ orhare vwẹ ọke rẹ ovwọnvwọn, rẹ eya vwo kpo ame evo.

¹²Ọ da ta, E Ọrovwohwo, Ọghẹnẹ rẹ onini mẹ Ebraham, ju vwe phi kparobọ nonẹ, Me rẹ wẹ, re wọ vwẹ evuesiri wẹn na vwọ nẹ onini mẹ Ebraham.

¹³Nighere, Mi re mudia asan ogbugbu rẹ ame na re, rẹ emetẹ rẹ ihwo rẹ orere na de che vo ame.

¹⁴Gbe jẹ ọmọtẹ re Me cha ta kẹ nẹ, Biko vo ame kẹ vwẹ re Me da, rọ rha wene unu tanẹ, Da, ri mi ji vo kẹ iyesi na — dia aye ru wọ rhuẹrẹ phihọ kẹ odibo wẹn Aizik. Ọnana kọye o vwo mu vwe ẹro nẹ evuesiri wẹn na vẹ onini mẹ herọ

¹⁵Ọ je ghwa ta ota nẹ unu na, nighe, Rebeka, ọmọtẹ ri Bẹtuẹl ọmọ ri Milka, rẹ aye rẹ Nahọr rẹ oniọvo rẹ Ebraham, ọ rọ yan cha vẹ ochẹ rẹ ame vwẹ igabọ.

¹⁶Ọmọtẹ na vwo erhuvwu gangan, ọmọtobe, rọ je riẹn ọshare-e. Kọ yanran kpo obo ogbugbu na, o de vo ame vọn ochẹ na, kọ yan cha.

¹⁷Eriyin odibo na da djẹ bro, ọ da ta, Biko kẹ vwẹ ama ame rẹ ochẹ wẹn na da.

¹⁸Ọ da ta, Da, ọrovwovwe; o de wo ochẹ na kpata kpata, ọ da vwẹ ame kẹ da.

¹⁹Ọke rọ vwọ ke da nu, ọ da ta, Mi ji vo kẹ iyesi wẹn na rere ayen je da.

²⁰Kpata kpata na o de ghwe rhurie ame na phihọ odo, ọ da ghwa djẹ yanran re vo vwọ kẹ iyesi na.

²¹Ọshare na da fọ ko di no rọ vwọ riẹn se Ọghẹnẹ phi erhuvwu phihọ oyan rọye na eyẹ ẹjo.

²²Ọke rẹ iyesi na vwọ da ame nu, ọshare na da reyọ isa rẹ oro rọ họhọ te ubro ri shikẹl, kugbe umuobọ ivẹ re họhọ te shikẹl rẹ oro ihwe,

²³ọ da ta, Ta kẹ vwẹ, wẹ ọmọtẹ rẹ ono. Uwevwi herọ vwẹ egodo rẹ ọsẹ wẹn re wo phihọ?

²⁴Ọ da ta kẹ, Mẹvwẹ ọmọtẹ ri Bẹtuẹl rẹ ọmọ ri Milka, ro vwiẹ ki Nahọr.

²⁵Ọ da rhoma ta, Avwanre vwo egbri kugbe ẹbe eyaya buebu, kugbe uwevwi re wo phihọ.

²⁶Ọshare na de gbe uyovwi otọ ọ da ga Ọrovwohwo,

²⁷ọ da ta, Ebruphihọ kẹ Ọrovwohwo Ọghẹnẹ rẹ onini mẹ Ebraham, ro se siobọ nẹ ẹguọnọ ro jẹrhẹriẹ kugbe evuesiri ro vwo kpahe onini mẹ. Vwọ kẹ vwẹ, Ọrovwohwo ri sun vwe vwẹ idjerhe rhi te uwevwi rẹ omoni rẹ onini mẹ.

²⁸Etiyin ọmọtẹ na da djẹ re gbe ikun rẹ emu nana ejobi kẹ ihwo rẹ uwevwi rẹ oni rọye.

²⁹Rebeka vwo oniọvo re se Laban; Laban da djẹ bru ohwo na, vwẹ obo ogbugbu na.

³⁰Ọke rọ rhe vwọ mrẹ isa na kugbe umuobọ na vwẹ obọ rẹ oniọvo rọye, o ki rhe ji nyo ikun ri Rebeka gberi nẹ, Enẹ ohwo na ta kẹ vwẹ, o da yan bru ohwo na; o vwo ni, ọ da mrẹ ohwo na ro mudia kẹrẹ iyesi na vwẹ akakọ rẹ ogbugbu na.

³¹Ọ da ta kẹ, Ro uwevwi, wẹ rẹ Ọrovwohwo bruba kẹ na die wo vwo mudia ughere? Kidie Me rhuẹrẹ uwevwi nure kugbe asan vwọ kẹ iyesi wẹn.

³²Etiyin ohwo na da rhe uwevwi; Laban da rhan iyesi na, ọ da vwọ egbri vẹ ẹbe eyaya vwọ kẹ ayen, ọ da vwẹ ame kẹ vwọ hworhẹ awọ kugbe awọ rẹ ihwo ri nenire.

³³O de mu emu kẹ nọ re, ẹkẹvuọvo ọ da ta, Me sa re emu re bẹsiẹ Me vwọ yan uwevwi mẹ nu. O da ta, Gba ta.

³⁴Etiyin ọ da ta, Mẹvwẹ odibo rẹ Ebraham.

³⁵Ọrovwohwo nabọ bruphihọ kẹ onini mẹ gangan, kẹ okpohwo rode, ọ vwẹ uchuru kẹ vẹ ekru rẹ eranvwe, idọnọ efuanfon vẹ iro, idibo rẹ eshare kugbe erẹ eya, iyesi kugbe ekẹtẹkẹtẹ.

³⁶Sera rẹ aye rẹ onini mẹ de rhi vwiẹ ọmọ kẹ vwẹ uyovwi esha na, ọmọ na kọye ọ ghwẹ efe rọye ejobi kẹ.

³⁷Onini mẹ da tanẹ mi duvwu iyori, tanẹ, Wọ reyọ aye kẹ ọmọ mẹ na vwẹ usun rẹ emetẹ ri Kenan na-a, re Me dia otọ rayen na,

³⁸ẹkẹvuọvo kpo uwevwi rẹ ọsẹ mẹ kugbe ekru mẹ, ra reyọ aye kẹ ọmọ mẹ.

³⁹Me da ta kẹ onini mẹ, Kẹ ọke rẹ aye na gbi nene uvwe-e, komavọ?

⁴⁰Ẹkẹvuọvo ọ da ta kẹ vwẹ, Ọrovwohwo na re Me yan nene na, ko ji amakashe rọye nene uwe kọ kẹ wẹ aruesiri rọye vwẹ idjerhe wẹn ejobi, ku wọ reyọ aye kẹ ọmọ mẹ vwẹ evun rẹ ekru mẹ kugbe uwevwi rẹ ọsẹ mẹ;

⁴¹kọye iyori na vwo ju we emuo, wo de te ekru mẹ re ayen gbe mrẹ aye vwọ kẹ wẹ-ẹ, ye iyori mẹ na gbi mu we-e.

⁴²Nonẹ na ki mi rhi te ogbugbu na, Me da ta, Ọrovwohwo, Ọghẹnẹ rẹ onini mẹ Ebraham, vwẹ enẹ na aruesiri wẹn de se nene uvwe vwẹ idjerhe re Me ra na,

⁴³nighe, mi re mudia vwẹ oma rẹ ogbugbu rẹ ame na; gbe jẹ ọmọtẹ ro rhi vo ame, re Me cha ta kẹ nẹ, Biko kẹ vwẹ ame rẹ ochẹ wẹn na da,

⁴⁴rọ wẹnẹ unu kẹ vwẹ nẹ, Da, re mi ji vo kẹ iyesi wẹn rhe, gbe jẹ ọyena dia aye rẹ Ọrovwohwo rhuẹrẹ phihọ kẹ ọmọ rẹ onini mẹ.

⁴⁵Me je ghwa ta nẹ unu na-a, nighe, Rebeka da ghwa yanrhe vẹ ochẹ vwẹ igabọ, ọ da yan kpo obo ogbugbu na re vo ame. Me da ta kẹ, Biko kẹ vwẹ ame da.

⁴⁶Kpata kpata na o de ghwe wo ochẹ na nẹ igabọ rọye, ọ da ta, Da, re Me je kẹ iyesi wẹn na da rhe. Kọye Me da da, ọ da je kẹ iyesi na rhe.

⁴⁷Me da nọ nẹ, Wẹ ọmọtẹ rẹ ono? Ọ da ta, Ọmọtẹ ri Bẹtuẹl, ọmọ ri Nahọr ri Milka vwiẹ kẹ. Kọye mi de ku isa na phihọ abọ.

⁴⁸Etiyin mi de gbe uyovwi kpotọ Me da ga Ọrovwohwo, mi de bruphihọ kẹ Ọrovwohwo, Ọghẹnẹ rẹ onini mẹ Ebraham, ro sun vwe wan idjerhe esiri ra reyọ ọmọtẹ rẹ uwevwi rẹ onini mẹ vwọ kẹ ọmọ rọye.

⁴⁹Vwẹ etinẹ na, ọ da dianẹ wo ghine mu ọghọ kẹ onini mẹ gba ta kẹ vwẹ, ọ rha dia eriyi-in, ta kẹ vwẹ, rere mi ghwe kpo obọrhe eyẹ obọhwẹre.

⁵⁰Etiyin Laban vi Bẹtuẹl da kpahe, Emu na obọ rẹ Ọrovwohwo o nurhe; avwanre sa kpahe ota ọbrabra eyẹ ọresiri kẹ wẹ-ẹ.

⁵¹Nighe, Rebeka ọye obaro wẹ na, reyọ re re wọ yanran, re ọ dia aye rẹ ọmọ rẹ onini wẹn, kirobo rẹ Ọrovwohwo tare.

⁵²Ọke rẹ odibo rẹ Ebraham vwo nyo eta nana, ọ da vwẹ uyovwi te otọ vwọ kẹ Ọrovwohwo.

⁵³Odibo rọye da ghwẹ ejọrọ rẹ idọnọ kugbe oro, kugbe emwa, vwọ kẹ Rebeka; ọ da je kẹ iniọvo rọye kugbe oni rọye ekuakua rẹ osẹvwe ghaghare.

⁵⁴Te ọye te ihwo rọye ke re e ke da, ayen da vwerhẹ ason yena vwẹ Etiyin. Rẹ ayen vwo vrẹn vwẹ irhiọke ọ da ta, Gbe jẹ avwanre kpo bru onini mẹ.

⁵⁵Oniọvo rọye kugbe oni rọye da tanẹ, Jẹn ọmọ na hẹrhẹ tavwe, kiri emu rẹ ason ihwe; rẹ ẹdẹ na da wan nu ro ki kpo.

⁵⁶Ẹkẹvuọvo ọ da ta kẹ ayen, Wa da vwẹ jẹ-ẹ, rẹ Ọrovwohwo vwo ru oyan mẹ yovwi nure na, ju vwe kpo bru onini mẹ.

⁵⁷Ayen da ta, Avwanre se ọmọtẹ na rere a nọ.

⁵⁸Ayen de se Rebeka, ayen da ta kẹ, Wọ vẹ ohwo nana kpo? Ọ da tanẹ, Me vẹ ọye kpo.

⁵⁹Etiyin ayen de siobọ ni Rebeka ọ vẹ ọmọtẹ rọye, te odibo rẹ Ebraham vẹ ihwo rọye.

⁶⁰Ayen da nẹ ẹrhovwo kẹ Rebeka tanẹ, Oniọvo rẹ avwanre, gba dia oni rẹ emọ uriori asako uriori ihwe, rere uvwiẹ wẹn vwẹ anurhoro rẹ ivwighrẹ rayen vwọ riuku.

⁶¹Etiyin Rebeka vẹ ikọpha rọye de vrẹn ayen da gua iyesi rayen eshare na da vwọ kpahe ayen; kẹnẹ odibo na reyọ Rebeka, ayen de kpo.

⁶²Vwẹ ọke nana Aizik rhoma nẹ Beer-lahai-roi rhire, kọ dia obi Nẹgẹb.

⁶³Aizik ko kpo umẹ ese vwẹ asan ofuefu vwẹ ovwọnvwọn yena, ọ vwọ kpare opharo, nighe usun rẹ iyesi ra gua cha.

⁶⁴Rebeka vwọ kpararo, kọ mrẹ Aizik, o de wotọ rhe,

⁶⁵ọ da ta kẹ idibo na nẹ, Didi ọshare oboyi na, ro yan bru avwanre cha na? Odibo na da ta, Onini mẹ. Etiyin ọ da reyọ oga rọye vwo rhurhu.

⁶⁶Odibo na da ta kẹ Aizik emu ejobi ro ruru.

⁶⁷Etiyin Aizik da reyọ Rebeka kpo uwevwi rọye, o da rhe dia aye rọye, evun rọye da vwerhọ, oma rẹ Aizik da rhe sasa rẹ oni rọye vwo ghwu nu.