Read urhobo Jẹnẹsis 26 Bible Online

Jẹnẹsis 26 - urhobo bible

Jẹnẹsis 26

¹Asakiephana owẹvwe de rhi fi vwẹ otọ na, rọ rho nọ owẹvwe ro firi vwẹ ọke rẹ Ebraham. Aizik de kpo Gẹra, bru Abimẹlẹk ovie ri Filistia.

²Orvwohwo da vwẹ oma phia kẹ, ọ da ta, Wo kpo Ijipti-i; dia otọ re Me ta kẹ wẹ na.

³Dia ukane wẹn vwe otọ nana, ki mi nene uwe dia, ki mi bruba kẹ wẹ; kidie vwọ kẹ wẹ vẹ uvwiẹ wẹn Me cha vwẹ etọ nana kẹ, ki mi ru ive ri mi veri kẹ Ebraham rẹ ọsẹ wẹn gba.

⁴Ki mi ru uvwiẹ wẹn bu kiri isio ri obenu, ke Me vwẹ etọ nana ejobi na vwọ kẹ uvwiẹ wẹn; vwẹ oma rẹ uvwiẹ wẹn ọye ẹgborho rẹ akpọ na ejobi de vwo ebruphihọ kẹ oma rayen:

⁵fikiridie Ebraham mu ọghọ kẹ urhuru mẹ, iji mẹ, kugbe ẹgha mẹ, kugbe irhi Me.

⁶Kọye Aizik da dia Gẹra.

⁷Ọke rẹ ihwo rẹ asan na vwọ nọ ekpẹn rẹ aye rọye, ọ da ta, Oniọvo mẹ oruẹ; kidie oshọ muro rọ vwọ ta nẹ, Aye mẹ, ko roro nẹ ihwo rẹ asan na che hwe ọye fiki ri Rebeka, kidie oyovwiri gangan.

⁸Rọ vwọ dia Etiyin krekri re, Abimẹlẹk ovie ri Filistia vwo nẹ evakpo ọ da mrẹ Aizik rọ vẹ Rebeka bẹnẹ.

⁹Etiyin Abimẹlẹk de se Aizik, ọ da ta, Nighe, aye wẹn oruẹ, komavọ wọ rha vwọ tanẹ oniọvo mẹ? Aizik da ta kẹ, Kidie mi rori nẹ, e che hwe vwe fiki rọye.

¹⁰Abimẹlẹk da ta, Ọna didi emu wo ru avwanre na? Ọ dianẹ kẹ ọvo vwẹ usu rẹ avwanre na vwẹ oma te, yọ nẹrhẹ avwanre riabe.

¹¹Kọye Abimẹlẹk da kpa okpa kẹ ihwo rọye, tanẹ, Kohwo kohwo rọ vwẹ obo te aye rọye ko ghwu.

¹²Aizik de voro udju ukpe yena vwẹ otọ na, o de vun ujori. Ọrovwohwo de bruphihọ kẹ,

¹³ohwo na de rhi fe, efe na kẹ ebuebuo bẹsiẹ rọ ke rhe dia ọdafe rode.

¹⁴O de vwo uchuru vẹ eranvwe buebu, kugbe ikru, ihwo ri Filistia na ke rioma kpahọ.

¹⁵(Vwẹ ọke nana ihwo ri Filistia de gbe erhare ejobi rẹ idibo rẹ ọsẹ rọye tọnre vwẹ ọke rẹ Ebraham ọsẹ rọye.)

¹⁶Abimẹlẹk da ta kẹ Aizik, Kpo nẹ orho rẹ avwanre, kidie wọ goma nọ avwanre.

¹⁷Etiyin Aizik de vrẹn nẹ Etiyin, o de mu erhọn phihọ ushekpotọ ri Gẹra kẹ Etiyin ọ diare.

¹⁸Aizik da rhoma tọn erhare ra tọnre vwẹ ọke rẹ Ebraham ọsẹ rọye, fikiridie ihwo ri Filistia gbe ayen vwẹ ọke rẹ Ebraham vwo ghwu nu, o de mu edẹ rẹ ọsẹ rọye mu kẹ ayen jovwo na kẹ ayen.

¹⁹Ẹkẹvuọvo ọke rẹ idibo rẹ Aizik vwọ tọn ushekpotọ na ayen da mrẹ orhare rẹ ogbugbu rẹ ame,

²⁰isuigodẹ rẹ ihwo ri Gẹra vẹ erẹ Aizik ke ghwọ, tanẹ, Ame na ọ rẹ avwanre. Kọye o de se odẹ rẹ orhare na Esek, kidie ayen ghwọ gbe.

²¹Ayen da tọn ọfa ayen da je ghwọ gbe; Etiyin o de se odẹ Sitnah.

²²O de vrẹn nẹ Etiyin ọ da ra tọn orhare ọfa, ayen gbe ghwọ vwẹ ọyena-a, Etiyin o de se odẹ rọye Rehobọth, tanẹ, Fikiridie Ọrovwohwo kẹ avwanre asan dia, otọ na ko yovwi kẹ avwanre.

²³O vrẹn nẹ Etiyin ọ da yan kpo Bẹẹrsheba.

²⁴Ọrovwohwo da vwẹ oma phia kẹ vwẹ ason yena ọ da ta, Mẹvwẹ Ọghẹnẹ rẹ Ebraham rẹ ọsẹ wẹn, wọ djoshọ-ọ, kidie Me vẹ owẹ herọ ki mi bruphihọ kẹ wẹ uvwiẹ wẹn ko bu phihọ fiki rẹ odibo mẹ Ebraham.

²⁵Etiyin ọ da so agbada o de se odẹ rẹ Ọrovwohwo, ọ da ghwa fa ọko phihọ Etiyin. Idibo rẹ Aizik da tọn orhare vwọ asan na.

²⁶Abimẹlẹk da yan ni Gẹra bro ra ọ vẹ Ahuzath re ọbuiroro rọye kugbe Fikol rẹ onotu rẹ ofovwi rọye.

²⁷Aizik da ta kẹ, Die wo rhe vwo bru rhire, yẹ ivun mẹ vwerha owẹ-ẹ, wọ ke rha djẹ vwẹ nẹ oma?

²⁸Ayen da ta, Avwanre mrẹre phẹphẹ nẹ Ọrovwohwo vẹ owẹ herọ, kọye avwanre vwọ tanẹ, e jẹ avwanre duvwu iyori kẹ oma, rere avwanre vẹ owẹ re ọphọ,

²⁹nẹ wo kpokpo avwanre-e, kirobo rẹ avwanre vwẹ obọ te we-e, Me ji ru we emuọvo-o jokpa rẹ uyoyovwi avwanre ki rhe siobọ nẹ uwe kpo egberhẹnẹdẹ. Asakiephana wẹ kẹ ohwo rẹ Ọrovwohwo bruphihọ kẹ.

³⁰O de chere emu kẹ ayen, ayen da re ayen da da.

³¹Irhiọke ride ayen de vrẹn ayen da re ọphọ; Aizik de siobọ nẹ ayen, ayen de kpo egberhẹnẹdẹ.

³²Ẹdẹ yena vuọvo na idibo rẹ Aizik da rhe vuẹ kpahe orhare rẹ ayen tọnre, ayen da ta ke, Avwanre mrẹ ame re.

³³O de se Shibah, fiki rẹ ọtiọye na e de se odẹ rẹ orere na Bẹẹrsheba rhi te nonẹ na.

³⁴Ọke rẹ Isọ vwo te ikpe ujuvẹ re, ọ da reyọ aye re se Judith rẹ ọmọ ri Beeri rẹ ohwo ri Hẹt vwọ rọvwọ, kugbe Basemath ọmọtẹ rẹ Elọn rẹ ohwo ri Hẹt,

³⁵ayen da lagha Aizik kugbe Rebeka gangan.