Read urhobo Jẹnẹsis 27 Bible Online

Jẹnẹsis 27 - urhobo bible

Jẹnẹsis 27

¹Ọke rẹ Aizik vwọ ghwọ re rẹ ẹro rọye vwo dje rọ gbe mrẹ orẹ-ẹ, o de se Isọ rẹ ọmọkpako rọye, ọ da ta kẹ, Mọmẹ, ọ da kpahe kẹ, Mẹvwẹ na.

²O da ta, Nighe, Me ghwore; Me riẹn ẹdẹ rẹ ughwu mẹ-ẹ.

³Vwẹ enẹna, gba reyọ ekuakua wẹn, ekpo rẹ edada wẹn, kugbe umurhabọ wẹn, ru wo kpo aghwa, ra bẹre ibefi ru wo hwe eranvwe rhe vwe,

⁴ru wo chere emu ọvwevwerhe kẹ vwẹ, emu rọ vwerhe ovwẹ, ru wo muo rhe vwe re Me re, rere Me nẹ ẹrhovwo kẹ wẹ mi ki ghwu.

⁵Vwẹ ọke yena Rebeka ra kerhọ rẹ Aizik vwọ ta kẹ Isọ rẹ ọmọ rọye. Kọye ọke rẹ Isọ vwo kpo aghwa re hwe eranvwe rhe,

⁶Rebeka da ta kẹ ọmọ rọye Jekọp, Mi nyo umri rẹ ọsẹ wẹn rọ ta kẹ oniọvo wẹn Isọ nẹ,

⁷Hwe eranvwe rhe vwe, rere wo vwo chere emu ọvwevwerhe, rere Me riọ, re Me nẹ ẹrhovwo kẹ wẹ vwẹ irharo rẹ Ọrovwohwo tavwe mi ki ghwu.

⁸Fiki rẹ ọtiọye na ọmọ mẹ, gbe nyo ota na re Me ta kẹ wẹ na.

⁹Kpo obo uchuru na, re wo mu emọ rẹ ẹkpro ivẹ rhe, rere mi vwo chere emu ọvwevwerhe kẹ ọsẹ wẹn, ọtiẹ emu rọ vwerhọ;

¹⁰ku wo muo rhe ọsẹ wẹn rọ re, rere ọ nẹ ẹrhovwo kẹ wẹ ro ki ghwu.

¹¹Ẹkẹvuọvo Jekọp da ta kẹ Rebeka rẹ oni rọye, Nighe, oniọvo mẹ Isọ ọ pha ẹtuẹnto, ye Me pha bọbọbọ.

¹²Ọkeọvo ọsẹ mẹ cha vwẹ obọ te vwe, ke Me họhọ ohwo rọ vwọ jehwẹ, ke Me vwo eka kẹ oma mẹ ọ rha dia ẹrhovwo-o.

¹³Oni rọye da ta kẹ, Jẹn eka ra harhe owẹ dia uyovwi mẹ, ọmọ mẹ, takpi nyo ota mẹ ru wọ yanran, re mu eranvwe na rhe vwe.

¹⁴Etiyin ọ da yanran re mu ayen rhe oni rọye, oni rọye de chere emu ọvwevwerhe, ọtiẹ emu rọ vwerhọ.

¹⁵Etiyin Rebeka da reyọ ewu rẹ Isọ rẹ ọmọkpako rọye na, rọ evun rẹ uwevwi jovwo, o de kuo phihọ Jekọp rẹ omotete na,

¹⁶ọ da reyọ, ophiẹn rẹ ẹmẹvwe na vwọ phare abọ vẹ edigbo ohọre rọye;

¹⁷o de mu emu ọvwevwerhe na kugbe ikara rọ nabọ kaka na, vwọ kẹ ọmọ rọye Jekọp.

¹⁸O de mu emu na rhe ọsẹ rọye, ọ da ta, Baba; o de nyo kẹ nẹ, Mẹvwẹ na, wẹ ono vwo mọmẹ?

¹⁹Jekọp da ta kẹ ọsẹ rọye, Mẹvwẹ Isọ rẹ ọmọkpako wẹn. Mi ruru kirobo re wọ ta kẹ vwẹ nure, gbe vrẹn tidia re wọ re eranvwe mẹ, rere wọ nẹ ẹrhovwo kẹ vwẹ.

²⁰Ẹkẹvuọvo, Aizik da ta kẹ ọmọ rọye, Mavọ wọ ghwa fobọ mrẹ eranvwe na phẹrẹkpẹ ọtiọye, ọmọ Me? Ọ da kpahe, Kidie Ọrovwohwo rẹ Ọghẹnẹ wẹn vwe rọ kẹ vwẹ. Aizik da ta ke Jekọp,

²¹Bi te vwe oma te, rere Me vwẹ obọ te we, ọmọ mẹ, rere mi vughe uwe se owẹ Isọ eyẹ ohwo ọfa.

²²Etiyin Jekọp de si kẹrẹ Aizik rẹ ọsẹ rọye, ọ da vwẹ obọ gbe ọ da ta, Urhuru na urhuru ri Jekọp, ẹkẹvuọvo abọ na kiri abọ rẹ Isọ.

²³O gbi se vughe-e, kidie abọ rọye pha ẹtuẹnto kiri abọ rẹ oniọvo rọye Isọ, Etiyin ọ da nẹ ẹrhovwo kẹ.

²⁴Ọ da ta kẹ, Wẹ ghine ọmọ mẹ Isọ? Ọ da kpahe, Mẹvwẹ ọye.

²⁵Etiyin ọ da ta, Gbe muo rhe vwe, rere Me re eranvwe rẹ ọmọ mẹ re Me nẹ ẹrhovwo kẹ wẹ, o de mu emu na rhe, ọ da re; ọ da vwẹ udi kẹ, ọ da da.

²⁶Etiyin ọsẹ rọye Aizik da ta kẹ, Gbe si kẹrẹ ovwẹ re wọ fiọnfiọn ovwẹ, ọmọ mẹ.

²⁷O de si kẹrẹ ọ da fiọnfiọn, ọ da vwẹ ewu rọye gbọrhe ọ da nẹ ẹrhovwo kẹ, ọ da ta, No, ọnrhẹn rẹ ọmọ mẹ kiri ọnrhe rẹ okogbe rẹ Ọrovwohwo bruphihọ kẹ,

²⁸Ọghẹnẹ kẹ wẹ evwru rẹ obo odjuvwu, kugbe ivwri rẹ otọ na, vẹ ọka buebu kugbe udi.

²⁹Jẹn ihwo ga wẹ, irere ki shiguẹ kẹ wẹ. Ku wọ dia olori vwẹ enu rẹ iniọvo wẹn Jẹn emọ rẹ oni wẹn vwẹ uyovwi te otọ kẹ wẹ. Eka kẹ ohwo rọ harha owẹ Ẹrhovwo kẹ ohwo rọ nẹ ẹrhovwo kẹ wẹ.

³⁰Rẹ Aizik ghwa vwọ nẹ ẹrhovwo kẹ Jekọp nu, ri Jekọp ghwa vwọ ro otafe nẹ obaro rẹ ọsẹ rọye nu, Isọ rẹ oniọvo rọye na de ghwe nẹ ibefi rhe.

³¹O de ji chere emu ọvwevwerhe, o de muo rhe ọsẹ rọye, Ọ da ta kẹ ọsẹ rọye, Gbe ji Baba vrẹn, re ọ re eranvwe rẹ ọmọ rọye, re wọ nẹ ẹrhovwo kẹ vwẹ.

³²Ọsẹ rọye Aizik da ta kẹ, Wẹ ono vwo? Ọ da kpahe, Mẹvwẹ ọmọ wẹn, ọmọkpako wẹn Isọ.

³³Etiyin Aizik kọ phariẹ guegue, ọ da ta, Kono ri hwe eranvwe ro de muo rhe vwe, Me rerọ ejobi nu tavwe wọ ke rhe, Me je vwẹ ẹrhovwo kẹ nureọ? uyota ke bruphihọ kẹ.

³⁴Ọke rẹ Isọ vwo nyo ota rẹ ọsẹ rọye, o de shugo rẹ oviẹ ọ da viẹ oviẹ rọ yara, ọ da ta kẹ ọsẹ rọye, Nẹ ẹrhovwo kẹ vwẹ, ji te omẹvwẹ rhe, E ọsẹ mẹ;

³⁵Ẹkẹvuọvo ọ da ta kẹ, Oniọvo wẹn ọ vwẹ ophiẹvwe rhe, ọ da reyọ ẹrhovwo wẹn mie we.

³⁶Isọ da ta, Oteri re vwo se Jekọp? Kidie Etiyin asiava ọ vwẹ ona ru vwe re. O mie vwe ọkpako mẹ, gbe rhe nighe ọ rha je reyọ ẹrhovwo Me re. O da rhoma ta kẹ, Wo rhe ji ẹmẹ ẹrhovwo kẹ vwẹ-ẹ?

³⁷Aizik da ta kẹ Isọ, Nighe, mi vwi ro ru olori vwẹ enu wẹn nure, Me je vwẹ iniọvo wẹn ejobi kẹ ne dia idibo kẹ nure, te ọka te udi Me vwọ ba kẹ. Kidie ọfa mi ji ru kẹ wẹ, ọmọ mẹ?

³⁸Isọ da ta kẹ ọsẹ rọye, Kaka ẹmẹ ẹrhovwo ọvo gbe herọ, ọsẹ mẹ? Nẹ ẹrhovwo kẹ vwẹ, ji te omẹvwẹ rhe, E ọsẹ mẹ. Isọ de kuenu rẹ oviẹ.

³⁹Etiyin Aizik rẹ ọsẹ rọye da kpahe kẹ: Nighe, asan ro tephe kẹ ivwri rẹ otọ na ọye cha dia ẹdia wẹn, ro ji tephe kẹ evwru rẹ odjuvwu.

⁴⁰Odan wẹ wọ vwọ riemu, ku wọ ga oniọvo wẹn; ẹkẹvuọvo wọ da pharhe vabọ ku wo vwirhi ọghrọrọ nẹ ohọre wẹn.

⁴¹Kẹ ọke nana yanran oma ri Jekọp ko tuẹ Isọ fiki rẹ ẹrhovwo rẹ ọsẹ rọye nẹ kẹ, Isọ da ta kẹ omoma rọye, Ẹdẹ rẹ ughwu ri Baba kẹrire, ke Me teye oniọvo mẹ na Jekọp hwe.

⁴²Ẹkẹvuọvo eta rẹ Isọ na rẹ ọmọkpako rọye na e de rhi gbe ayen kẹ Rebeka; o de ji ohwo re se Jekọp rẹ omotete rọye na, ọ da vuẹ nẹ, Nighe, Isọ rẹ oniọvo wẹn ọ rọ jẹn iroro ro vwo hwe we, ọke o di nẹ na.

⁴³Wẹ ọmọ mẹ, kerhọ mẹ, vrẹn, wọ djẹ bru Laban rẹ oniọvo mẹ vwi Haran,

⁴⁴re wọ vọye dia oboyi emerha, bẹsiẹ rẹ ophun rẹ oniọvo wẹn vwo fue;

⁴⁵bẹsiẹ rẹ ophun rẹ oniọvo wẹn vwo fue, rẹ obo ri wo ruro vwọ choẹro, ki mi ji ohwo ra reyọ owẹ nẹ oboyi rhe. Mavọ emọ rẹ ọmiọvwọ ivẹ ghwẹ ukpẹdọke?

⁴⁶Rebeka da ta kẹ Aizik, Ofu rẹ akpọ mẹ dje vwe vwi fiki rẹ eya ri Hit. Ọ da dianẹ Jekọp rọvwọ aye ri Hit tiọnana, usun rẹ eya rẹ otọ na, ki didi akpọ mi yeri?