Read urhobo Jẹnẹsis 28 Bible Online

Jẹnẹsis 28 - urhobo bible

Jẹnẹsis 28

¹Aizik de se Jekọp ọ da nẹ ẹrhovwo kẹ, o de ji iji kẹ nẹ, Wọ reyọ aye rẹ ihwo ri Kenan-i.

²Vrẹn, kpo Padanaram kpo uwevwi ri Bẹtuẹl ọsẹ rẹ oni wẹn, ru wọ dia oboyi da reyọ aye ọvo vwẹ usun rẹ emetẹ ri Laban oniọvo rẹ oni wẹn.

³Ọghẹnẹ ro vwo Ẹgba o bruphihọ kẹ wẹ ro ru we ogbaọmiọvwọ ru wo bu, ru wọ rhe dia egbotu.

⁴Jọ vwẹ ebruphihọ rẹ Ebraham kẹ wẹ kugbe uvwiẹ wẹn ejobi, rere wọ vwọ sa reyọ otọ rẹ ihwo ru wọ kua bru na, re Ọghẹnẹ vwọ kẹ Ebraham na vwọ riuku.

⁵Enẹ kọye Aizik ji Jekọp yanran, ọ da yan kpo Padanaram bru Laban, rẹ ọmọ ri Bẹtuẹl ohwo ri Aram, rẹ oniọvo ri Rebeka, rẹ oni ri Jekọp kugbe Isọ.

⁶Asakiephana Isọ da mrẹ nẹ Aizik nẹ ẹrhovwo ki Jekọp nure o de jo kpo Padanaram ra reyọ aye vwẹ oboyi, kọye rọ vwọ nẹ ẹrhovwo kẹ na o de ji iji kẹ nẹ, Wọ rọvwọ aye ri Kenan rẹ.

⁷Jekọp de nyo ota rẹ ọsẹ rọye kugbe oni rọye ọ da yanran kpo Padanaram.

⁸Rẹ Isọ vwọ mrẹ nẹ aye ri Kenan je Aizik rẹ ọsẹ rọye-e,

⁹Isọ da yanran bru Ishmael ra reyọ aye, vwọ ba eya ro vwori jovwo, Mahalat ọmọtẹ rẹ Ishmael ọmọ rẹ Ebraham, rẹ oniọvo ri Ne-baiot.

¹⁰Jekọp da yan ni Bẹẹrsheba, o de hirhe aro ku Haran.

¹¹O de rhi te oghẹre asan ọvo, o de wo phihọ Etiyin, kidie ọnre na shẹre. Rọ vwọ reyọ ubioragha ọvo vwẹ asan na, ọ da vwọ cha uyovwi ro ki shevwerhẹ.

¹²O da vwerhẹ evwerhẹ mrẹ ugbaghala ro nẹ otọ re te odjuvwu, o vwo ni emakashe rẹ Ọghẹnẹ ki yere kpotọ kpenu vwọ.

¹³O vwo ni, Ọrovwohwo de mudia obenu rọye ọ da ta, Mẹvwẹ Ọrovwohwo na, Ọghẹnẹ rẹ Ebraham na rẹ ọsẹ wẹn kugbe Ọghẹnẹ rẹ Aizik, otọ ru wo shevwerhẹ phihọ na Me vwọ kẹ wẹ kugbe uvwiẹ wẹn ejobi,

¹⁴uvwiẹ wẹn ko che bu kiri ibiekpẹn rẹ otọ na, ku wọ hrabọ kpo obọrhe vẹ obọhwẹre kpo obaro vẹ obuko; oma wẹn vẹ oma rẹ uvwiẹ wẹn ọye uvwiẹ rẹ akpọ na ejobi de vwo ebruphihọ kẹ oma rayen.

¹⁵Nighe, Me vẹ owẹ herọ ke Me sẹro wẹ vwi kasan kasan wọ rare ejobi, ke Me vwẹ owẹ rhe otọ nana, kidie Me sa yan ju we vwo-o bẹsiẹ mi vwo ru eta nana re Me ta kẹ wẹ na ejobi gba.

¹⁶Etiyin Jekọp de gbunie rhọvwọ nẹ ovwerhẹ rhe ọ da ta, Omuẹro nẹ Ọrovwohwo etinẹ na, ye Me gbe riẹ-ẹn.

¹⁷Oshọ de muo, ọ da ta, Mavọ etinẹ na mu udidi te; Etinẹ na dia asan ọfa-a da yẹ uwevwi rẹ Ọghẹnẹ, Ọnana kẹ anurhoro rẹ odjuvwu.

¹⁸Etiyin Jekọp de vrẹn vwẹ irhiọke ride, ọ da reyọ ubioragha na rọ vwọ cha uyovwi jovwo na vwo viotọ o de ku evwri ku enu rọye.

¹⁹O de se odẹ rẹ asan na Bẹtẹl, ẹkẹvuọvo odẹ rẹ orere na vẹrhe Luz e sere.

²⁰Etiyin Jekọp de vẹ ive tanẹ, O da dianẹ Ọghẹnẹ vẹ ovwẹ da dia, rọ da sẹro mẹ vwẹ idjerhe re Me cha wan na, rọ da kẹ vwẹ emuọre kugbe amwa vwo rhuo,

²¹ri mi de rhivwi te uwevwi rẹ ọsẹ mẹ egberhẹnẹdẹ, Ọrovwohwo kọ dia Ọghẹnẹ mẹ,

²²ubioragha nana, ri mi vwo vi na, kọ dia uwevwi rẹ Ọghẹnẹ, kemu kemu ejobi ru wọ vwọ kẹ vwẹ ke Me reyọ ẹkihwe vwọ kẹ wẹ.