Read urhobo Jẹnẹsis 32 Bible Online

Jẹnẹsis 32 - urhobo bible

Jẹnẹsis 32

¹Jekọp vwọ yanran vwẹ idjerhe emakashe rẹ Ọghẹnẹ da vwa;

²ri Jekọp vwọ mrẹ ayen ọ da ta, Ọnana unuofovwi rẹ Ọghẹnẹ; Kọye o de se asan na Mahanaim.

³Jekọp de ji ikọ bru Isọ rẹ oniọvo rọye ra vwẹ otọ ri Seir rẹ orho rẹ Idọm,

⁴ọ da vuẹ ayen nẹ, Enẹ wa ta kẹ ọrovwovwe Isọ: Enẹ odibo wẹn Jekọp tare, Mi suosuo bru Laban, Me vẹ ọye da dia rhi te ọke na,

⁵mi vwo irhuẹn, ekẹtẹkẹtẹ, uchuru, idibo rẹ eshare, idibo rẹ emetẹ, ki mi ji ihwo rhe ta kẹ ọrovwovwe, se Me sa mrẹ aruesiri vwẹ obọ wẹn.

⁶Ikọ na de rhivwi bru Jekọp rhe tanẹ, Avwanre te asan rẹ oniọvo wẹn Isọ, okpuyovwi rọye cha vwa wẹ, kugbe ihwo uri ivẹ ri nenire.

⁷Oshọ de mu Jekọp oma de ron, ọ da ghare ihwo ri rhere, te uchuru na te iyesi na, ẹko ivẹ,

⁸ko roro nẹ, O da dianẹ Isọ rhi te ẹko rẹ ẹsosuọ rọ da ghwọrọ, ẹko ro chekọ obuko na kọ djẹ vabọ.

⁹Jekọp da ta, E Ọghẹnẹ rẹ ọsẹ mẹ Ebraham kugbe Ọghẹnẹ rẹ ọsẹ mẹ Aizik, E Ọrovwohwo rọ ta kẹ vwẹ nẹ, Rhivwi kpo orho wẹn bru uvwiẹ wẹn, ki mi ru we yovwi,

¹⁰mi fo ohwo rọ sa mrẹ ivuavwerhe wẹ-ẹn kugbe ọvwata wẹ-ẹn ru wo dje phia kẹ odibo wẹn na, fikiridie ku ovwẹ ku ugbọphogho nana Me vwọ wan Jọdan vrẹn, vwẹ ọke nana mẹvwẹ kẹ usun ivẹ.

¹¹Sivwe, Me rẹ wẹ, nẹ obọ rẹ oniọvo mẹ, vwo nẹ obọ rẹ Isọ, kidie oshọ rọye mu vwẹ, o de rhi hwe avwanre ejobi, te ini te emọ.

¹²Ẹkẹvuọvo wọ tare nẹ, Mi ru we yovwi, ki mi ru uvwiẹ wẹn kiri ehavwo rẹ urhie, re je se kere fikiridie o bunọ.

¹³Kọye o de mu erhọ phihọ Etiyin ason yena, ọ da phare ọko vwo rhe Isọ rẹ oniọvo rọye,

¹⁴ẹkpro uje kugbe ẹvwe-eya uri, igodẹ rẹ eya uri kugbe egbo uje,

¹⁵ini rẹ iyesi ọgban kugbe upene rayen, erhuẹn rẹ eya ujuvẹ kugbe erẹ eshare ihwe, esi rẹ eya uje kugbe eshare ihwe.

¹⁶Ọ da ghwẹ ayen ejobi kẹ idibo rọye, ku eranvwe ku usun rọye, ọ da ta kẹ idibo rọye, Wa ka obaro kẹ vwẹ, rere we phi uvwre phihọ usun na.

¹⁷O de yono ọ rọ ka obaro ejobi, Ọke re Isọ oniọvo mẹ da vwa wẹ, ọ da nọ wẹ nẹ, Wẹ ekru rẹ ono? Tivọ wọ ra? Kẹ ono vwo enana ri obaro wẹ na?

¹⁸Ku wọ ta kẹ nẹ, Erẹ odibo wẹn Jekọp, ena ọko ra phare rhe ọrovwovwe Isọ, okpuyovwi rọye je cha vwẹ obuko.

¹⁹Eriyin o ji yono ọrivẹ kugbe ọrerha kugbe ayen ihwo ejobi ri nene usun rẹ eranvwe na nẹ, Wa Me ta ota ọvuọvo na kẹ Isọ ọke rọ da vwa ovwan,

²⁰Wa Me je tanẹ, Jekọp odibo wẹn ọ cha vwẹ obuko. Kidie o rori nẹ, Me sa vwẹ ọko rọ ka obaro kẹ vwẹ na vwo phoro aro, kọye Me sa vwọ mrẹ opharo rọye, ọkeọvo ọ Me reyọ ovwẹ.

²¹Kọye ọko na da ka obaro kẹ, okpuyovwi rọye de mu erhọn vwẹ Etiyin ason yena.

²²Vwe ason yena ovuọvo na o de vrẹn o da reyọ eya rọye ive, kugbe esarobọ rọye ivẹ, kugbe emọ rọye uhwọvo na, ọ da wan uto ri Jabọk vrẹn.

²³Ọ da reyọ ayen vwọ wan uto na vrẹn, kugbe kemu kemu ro vwori ejobi.

²⁴Jekọp ọvo kọye ri chekọ obuko, ọshare ọvo de nene muabọ bẹsiẹ rẹ ọke vwo rhie.

²⁵Ọke rẹ ọshare na vwọ mrẹ nẹ ọye sa marọ Jekọpu-u, ọ da vwe obo si ekpogho owọ rọye; ekpogho owọ ri Jekọp da rhoghra rẹ ayen vwo muabọ na.

²⁶Etiyin ọ da ta, Ju vwe kpo, kidie ọke ro rhie. Ẹkẹvuọvo Jekọp da ta, Mi se siobọ nu wẹ-ẹ, jokpa nẹ wọ nẹ ẹrhovwo kẹ vwẹ.

²⁷Ọ da ta kẹ, Didi odẹ wẹn? Ọ da ta, Jekọp.

²⁸Etiyin ọ da ta, E gbi se odẹ wẹn Jekọp ọfaa, ẹkẹvuọvo kẹ Izrẹl, fikiridie wọ vẹ Ọghẹnẹ kugbe ihwo rẹ akpọ muabọ, yi wo sheri-i.

²⁹Etiyin Jekọp da no, Ta kẹ vwẹ, Me rẹ wẹ, odẹ wẹn rhọ? Ẹkẹvuọvo ọ da ta, Die wọ vwọ nọ ekpẹn rẹ odẹ mẹ? Etiyin ọ da nẹ ẹrhovwo kẹ.

³⁰Jekọp de se odẹ rẹ asan na Peniel, nẹ, Fikiridie Me mrẹ Ọghẹnẹ opharo ye emuọvo ru vwee.

³¹Yẹ ọnre na ghwa vacha rọ vwọ wan Peniel, yọ sẹghrẹ owọ fiki rẹ ekpogho owọ rọye rọ rhoghrare na.

³²Fiki rẹ ọtiọye na emọ rẹ Izrẹl gbe re uriẹn rẹ ekpogho owọ-ọ rhi te nonẹ, kidie ọ vwẹ obọ te uriẹn rẹ ekpogho owọ ri Jekọp