Read urhobo Jẹnẹsis 46 Bible Online

Jẹnẹsis 46 - urhobo bible

Jẹnẹsis 46

¹Etiyin Izrẹl de mu oyan te ọye te emu ro vwori ejobi, o de rhi te Bẹẹrsheba, o de ze izobo kẹ Ọghẹnẹ rẹ ọsẹ rọye Aizik.

²Ọghẹnẹ da ta ota kẹ Izrẹl vwẹ evwerhẹ vwẹ ason, ọ da ta, Jekọp, Jekọp o de nyo nẹ, Mẹvwẹ na.

³Etiyin ọ da ta, Mẹvwẹ Ọghẹnẹ, Ọghẹnẹ rẹ ọsẹ wẹn, wọ djẹ oshọ ri wo vwo kpo Ijipt na-a, kidie Me dia oboyin ru we phihọ ẹgborho rode.

⁴Me yan nene uwe kpo Ijipt na, Me je vwo we rhivwi rhe, abọ ri Josẹf ki rhurhu we ẹro.

⁵Etiyin Jekọp de vrẹn ni Bẹẹrsheba, emọ rẹ Izrẹl de mu Jekọp rẹ ọsẹ rayen, imitete rayen, kugbe eya rayen, phihọ ekpẹrẹ ri Fero vwọ rhe nẹ vwo muo rhe.

⁶Ayen de ji mu uchuru rayen kugbe eyere rayen, re ayen vwori vwẹ otọ ri Kenan, ayen da rhe Ijipt, ti Jekọp vẹ uvwiẹ rọye ejobi,

⁷emọ rọye rẹ emeshare, kugbe emọ rẹ emọ rọye, emetẹ rọye kugbe emọ rẹ emetẹ rọye ejobi, uvwiẹ rọye ejobi vẹ ọye usun re gba rhe Ijipt.

⁸Enana keye edẹ rẹ uvwiẹ rẹ Izrẹl, re rhe otọ rẹ Ijipt, Jekọp vẹ emọ rọye. Rubẹn rẹ ọwanra,

⁹kugbe emọ ri Rubẹn: Hanọk, Pallu, Hezron, vi Karmi.

¹⁰Emọ ri Simiọn Jemuel, Jamin, Ohad, Jakin, Zohar, vi Shaul ọmọ rẹ aye rẹ ohwo ri Kenan.

¹¹Emọ ri Livae; Gẹrshọn, Kohat, vi Merari.

¹²Emọ ri Juda: Ẹr, Ọnan, Shelah, Pẹrẹz, vi Zerah (ẹkẹvuọvo Ẹr vẹ Ọnan de ghwu vwẹ otọ ri Kenan); emọ ri Pẹrẹz ke rha Hezron vi Hamul.

¹³Emọ rẹ Isaka: Tola, Puvah, Jashub, kugbe Shimrọn.

¹⁴Emọ ri Zẹbulọn: Serẹd, Elọn, vi Jahleel

¹⁵(enana emọ ri Leah, ro vwiẹ ki Jekọp vwi Padanaram, vi Dinah rẹ ọmọtẹ rọye; ayen ejobi te emeshare vẹ emetẹ rọye da dia ọgban gbẹ erha).

¹⁶Emọ ri Gad: Zifion, Haggi, Shuni, Ezbon, Eri, Arodi, vi Areli.

¹⁷Emọ ri Asha; Imnah, Ishvah, Ishvi, Beriah, vi Serah rẹ oniọvo rọye. Emọ ri Beriah Heber vi Malkiel.

¹⁸(Enana emọ ri Zilpah, ri Laban vwọ kẹ Leah rẹ ọmọtẹ rọye, enana keye o vwiẹ ki Jekọp ihwe gbẹ esan).

¹⁹Emọ ri Rachel, rẹ aye ri Jekọp: Josẹf kugbe Bẹnjamin.

²⁰Vwẹ obo otọ rẹ Ijipt Josẹf de vwiẹ Manasse kugbe Ifrem, rẹ Asenath, rẹ ọmọtẹ ri Potifera re orherẹn ri On, vwiẹ kẹ.

²¹Emọ ri Bẹnjamin: Bẹla, Becher, Ashbel, Gera, Naaman, Ehi, Rosh, Muppim, Huppim, vẹ Ard

²²(enana emọ ri Rachel, ro vwiẹ ki Jekọp — ayen ejobi ihwo ihwẹne).

²³Emọ ri Dan: Hushim.

²⁴Emọ ri Naftali Jahzeel, Guni, Jezer, vi Shillem

²⁵(enana emọ ri Bilhah, ri Laban vwọ ki Rachel ọmọtẹ rọye, enana keye o rhe vwiẹ ki Jekọp — ayen ihwo ighwrẹ).

²⁶Ihwo ejobi ri Jekọp vwori re rhe otọ rẹ Ijipt, re dia emọ rẹ orhẹn rọye, e kere eya rẹ emọ ri Jekọp kugbe-e, ayen ejobi da dia ujorha gbẹ esan;

²⁷emọ ri Josẹf, ro vwiẹri vwẹ Ijipt, da dia ivẹ, ihwo rẹ uwevwi ri Jekọp ejobi re rhe otọ rẹ Ijipt da dia ujorha gbẹ ihwe.

²⁸O de ji Juda ka obaro bru Josẹf, rere o re dje idjerhe ri Goshẹn ke ayen, ayen de rhi te otọ ri Goshẹn.

²⁹Etiyin Josẹf da rhuẹrẹ idjighere rọye ọ da ra vwa Izrẹl ọsẹ rọye vwi Goshẹn: ọ da vwẹ oma nẹ, o da gbanọ ohọre, ọ da viẹ kuo ohọre krekri.

³⁰Izrẹl da ta ki Josẹf, Asakiephana gbe ju vwe ghwu, re Me vwọ mrẹ opharo wẹn nure na, Me ke rha riẹn nẹ wọ je akpọ.

³¹Josẹf da ta kẹ emesẹ rọye, kugbe evwruwevwi rayen, Me yanran re Me ra vuẹ Fero, re Me ta kẹ nẹ, Ọsẹ mẹ vẹ emesẹ mẹ vẹ evwruwevwi rayen ejobi, re otọ ri Kenan bru vwe rhe,

³²ihwo na ichuru igodẹ ayen ruẹ, kidie uchuru ayen churẹ, ayen je ghwa uchuru rayen rhe, te eranvwe rayen, kugbe obo rẹ ayen vwori ejobi.

³³Ọke ri Fero de se we, rọ da tanẹ, Didi iruo ovwan ruẹ?

³⁴ku wo tanẹ, Idibo wẹn eranvwe ichurẹ nẹ ọke-emọ rhe ri te ọke na, te avwanre te ese rẹ avwanre, rere wa mrasa dia otọ ri Goshẹn na, kidie osuigodẹ kosuigodẹ ẹgua kẹ ihwo rẹ Ijipt.