Read urhobo Jẹnẹsis 48 Bible Online

Jẹnẹsis 48 - urhobo bible

Jẹnẹsis 48

¹Rẹ Ọnana vwọ wan nu ka ta ki Josẹf nẹ, Nighe, ọsẹ wẹn herọ mwa, Etiyin ọ da reyọ emọ rọye ivẹ, Manasse vẹ Ifrem

²Ka vuẹ Jekọp nẹ, Ọmọ wẹn Josẹf rhe mrẹ wẹ; Etiyin Izrẹl da vwẹ ẹgbẹgba vrẹn, o de Tidia ehwa.

³Jekọp da ta ki Josẹf, Ọghẹnẹ ro vwo Ẹgba vwẹ oma phia kẹ vwẹ vwi Luz vwẹ otọ ri Kenan o da nẹ ẹrhovwo kẹ vwẹ,

⁴ọ da ta kẹ vwẹ, Nighe, mi ru we ogbaọmiovwọ, ki mi ru we bu, ki mi ru we urogho rẹ ihwo, ke Me vwẹ otọ na kẹ uvwiẹ wẹn rọ cha vwẹ obuko wẹ re ọ dia ẹkẹn rayen bẹdẹ.

⁵Asakiephana emọ wẹn ivẹ na, ru wo vwẹriẹ vwẹ otọ rẹ Ijipt na tavwe re Me ke rhe Ijipt na, e mẹ; Ifrem vi Manasse ke dia e mẹ, kirobo ri Rubẹn vi Simiọn epha.

⁶Emọ rẹ ayen che vwiẹ ejobi ke dia ewẹn; ka vwẹ odẹ rẹ emesẹ rayen vwo se ayen vwẹ ẹdia rẹ uku rayen.

⁷Kidie ọke mi vwo nẹ Padan cha, Rachel da va vwẹ abọ ghwu vwẹ otọ ri Kenan vwẹ idjerhe, yẹ asan na vẹ Ephrat ji oshesheri, mi de sho vwẹ idjerhe rẹ Ephrat (kọye Bẹtlẹhẹm).

⁸Ọke rẹ Izrẹl vwọ mrẹ emọ ri Josẹf, ọ da ta, Ena amono?

⁹Josẹf da ta kẹ ọsẹ rọye, Ena emọ mẹ, rẹ Ọghẹnẹ vwọ kẹ vwẹ etinẹ. Ọ da ta kẹ, Reyọ ayen rhe vwe, Me rẹ wẹ, rere Me nẹ ẹrhovwo kẹ ayen.

¹⁰Asakiephana ẹro rẹ Izrẹl djeri fiki rẹ oghwo, o gbi jọ mrẹrẹ-ẹ. Etiyin Josẹf da reyọ ayen kẹrẹ; ọ da fiọnfiọn ayen unu ọ da gbanọ ayen.

¹¹Izrẹl da ta ki Josẹf, Mi gbi roro jovwo nẹ Me mrẹ opharo wẹn vẹrhe-e, gbe nighere, Ọghẹnẹ kọye jabọ Me sa vwọ mrẹ emọ wẹn rhe.

¹²Etiyin Josẹf de mu ayen nẹ igbo rọye, o de diguẹ bọvwọ opharo rhu otọ.

¹³Josẹf da reyọ ayen ivẹ na, Ifrem da obọrhe rọye kọye obọhwẹre rẹ Izrẹl, Manasse da obọhwẹre rọye kọye obọrhe rẹ Izrẹl, o de si ayen kẹrẹ.

¹⁴Izrẹl da riẹn obọrhe rọye vwọ kpahe Ifrem uyovwi, rọ dia omotete, ọ da ghwẹ obọhwẹre rọye kpahe uyovwi ri Manasse ọ da vwẹ obọ wan ohwohwo, kidie Manasse ọye ọwanra.

¹⁵Ọ nẹ ẹrhovwo ki Josẹf, ọ da ta, Ọghẹnẹ rẹ Ebraham vẹ Aizik rẹ esẹ mẹ yan nene, Ọghẹnẹ ro sun vwe vwẹ akpọ mẹ rhi te nonẹ,

¹⁶amakashe rọ tan vwẹ nẹ idẹbono ejobi, bruphihọ kẹ emọ nana; jẹn odẹ mẹ wan oma rayen va phia, kugbe odẹ rẹ esẹ mẹ Ebraham vẹ Aizik; jẹn ayen bu phihọ ẹgborho vwẹ enu rẹ akpọ na.

¹⁷Ọke ri Josẹf vwọ mrẹ ọsẹ rọye rọ ghwẹ obọrhe rọye kpahe uyovwi rẹ Ifrem, o rhe je-e, ọ da kpare obọ rẹ ọsẹ rọye, nẹ uyovwi rẹ Ifrem re phihọ ọ ri Manasse.

¹⁸Josẹf da ta kẹ ọsẹ rọye, Ọ dia ọtiọye-e, baba, fikiridie Ọnana ọye ọmọkpako, Ghwẹ obọrhe wẹn kpahe uyovwi rọye.

¹⁹Ẹkẹvuọvo ọsẹ rọye da sen tanẹ, Me riẹnre mọmẹ, Me riẹnre, okpuyovwi rọye je cha dia ohwo rhe, ọ je cha rho; dede na oniọvo rọye rẹ otete na cha rhonọ, uvwiẹ rọye che hirhe ẹgborho rode.

²⁰Ọtiọye kọye ọ nẹ ẹrhovwo kẹ ayen vwẹ ẹdẹ yena tanẹ, Oma wẹ yẹ Izrẹl wan nẹ ẹrhovwo tanẹ, Ọghẹnẹ ru we kiri Ifrem vi Manasse; kẹ etiọye ọ vwẹ Ifrem ka obaro ki Manasse.

²¹Etiyin Izrẹl da ta ki Josẹf, Nighe, mi muegbe rẹ ughwu re, ẹkẹvuọvo Ọghẹnẹ nene uwe dia, rọ je vwo wẹ rhivwi rhi te otọ rẹ esẹ wẹn.

²²Ọ rọ ma rho ejobi Me vwọ kẹ wẹ ọ dia emesẹ wẹ-ẹn, ọghwrọrọ ọvo re Me vwẹ ọlọkọ vẹ umurhabọ mẹ vwọ reyọ mie ihwo rẹ Amọr.