Read urhobo Jẹnẹsis 49 Bible Online

Jẹnẹsis 49 - urhobo bible

Jẹnẹsis 49

¹Etiyin Jekọp de se emọ rọye, ọ da ta, Wa ghwẹ oma koko, re Me ta kẹ ovwan obo re cha phia kẹ ovwan vwẹ ẹdẹ rọ cha.

²Aghwe oma koko re we nyo, E emọ ri Jekọp, kerhọ rẹ ọsẹ rẹ ovwan.

³Rubẹn, wẹ ọwanra mẹ, ẹgba mẹ, vẹ omamọ rẹ ẹsosuọ rẹ ogangan mẹ, ro titiri vwẹ eheri, ro kperi usi vwẹ ogangan.

⁴Ragha ragha kiri ame, wo rhe kperi usi-i kidie wo kpo ehwa rẹ ọsẹ wẹn; wo de miovwo wo de kpo asan Me da rioma.

⁵Simiọn vi Livae iniọvo ivẹ, emu gbrigbri ayen vwẹ elọkọ rayen ruẹ

⁶E, erhi mẹ, wọ vwẹriẹ umẹ raye-en, E, erhi mẹ, wo te ukoko raye-en, kidie vwẹ ophu rayen ayen hwe ihwo, vwẹ ẹro hrehre rayen ayen yoro uriẹn nẹ awọ rẹ erhuẹn.

⁷Eka kẹ ophu rayen, kidie ọ ganọ, kẹ ivuemiovwo rayen, kidie ọ branọ; Me ghare ayen phihọ Jekọp ke Me hra ayen vwẹ Izrẹl.

⁸Juda, imoni wẹn ejobi ki jiri uwe; obọ wẹn kọ yọnrọn ubiupho rẹ ivwighrẹ wẹn; Emọ rẹ ọsẹ wẹn ki diguẹ te otọ kẹ wẹ.

⁹Juda ọmọ rẹ okpohrokpo; vwẹ eranvwe emuo, ọmọ mẹ, wo de vrẹn kpenu. Orhuẹri, o fiọnko kiri okpohrokpo, kiri okpohrokpo rẹ aye, kono ri se guegue?

¹⁰Ọkpọ na rhe se ni Juda-a, eye ọkpọ rẹ osun na rhe se nẹ agada rọyee, bẹsiẹ ro che vwo te obọ rẹ ohwo ro viri, kọye ihwo na ejobi che mu ọghọ ke.

¹¹Kọ gba upene rẹ ekẹtẹkẹtẹ mui vain ekẹtẹkẹtẹ na ke churo mui vain ro fori, kọ hworhẹ ewun rọye vwẹ udi ri vain adagba rọye vwe ọbara ri otiẹ;

¹²ẹro rọye kọ vwara gbae fiki ri wain, ako rọye kọ fon toto fiki rẹ ameivie.

¹³Zẹbulọn obo erhuru ọ cha dia, Etiyin eko che gbo phihọ, ughwru rọye ki Zidon ọ dia.

¹⁴Isaka kọ họhọ ekẹtẹkẹtẹ, ro fiọnko phihọ uvwre rẹ ogba rẹ igegede,

¹⁵ọ mrẹre nẹ ẹdia rẹ urovwoma yovwiri, nẹ otọ na ji vwo erhuvwu, ọtiọye o de gbe igabọ otọ mu, ọ da rhe dia ọviẹn rẹ owian.

¹⁶Dan kọ dia oguẹdjọ re ihwo rọye kiri ẹgborho ọvo vwẹ Izrẹl na.

¹⁷Dan kọ dia ọrọdekọ vwe ugbo idjerhe, ọrobiebi vwẹ orhaghwa, rọ rhọvwe iyesi ukowọ ohwo rọ gua mi she kpuko.

¹⁸Me hẹrhẹ esivwo wẹn, E Ọrovwohwo.

¹⁹Ofru ki che gborho Gad, ẹkẹvuọvo ko bresi rẹ ichiyin rayen.

²⁰Emu rẹ ọdafe ọye Asher cha re, emu rọ vwerhere rẹ ovie na ọye rhere.

²¹Naftali ọye uzo rọ rha nẹ ufi, rọ djẹ etọ dorie dorie.

²²Josẹf abọ rẹ urhe rọ riẹmọ, abọ re urhe rọ riẹmọ vwẹ orhoma rẹ urhie, abọ rọye de gro vrẹn enu rẹ ogba.

²³A da vwẹ ibige bro ra, e siro phihọ a sarọ gangan,

²⁴dede na umurhabọ rọye yegherii, Etiyin abọ rọye ke tua vwẹ obọ rẹ Ogangan ọvuọvo ri Jekọp (vwẹ odẹ rẹ Osuigodẹ, Orhaga rẹ Izrẹl).

²⁵vwẹ obọ rẹ Ọghẹnẹ rẹ ọsẹ wẹn rọ cha wẹ uko, vwẹ obo rẹ Ọghẹnẹ ro vwo Ẹgba ko bruphihọ kẹ wẹ rọ kẹ wẹ ebruphihọ rẹ odjuvwu, ebruphihọ rẹ urhie rọ nọhọ otọ, ebruphihọ re evie kugbe eyenre.

²⁶Ebruphihọ rẹ ọsẹ wẹn i vwo ẹgba no ebruphihọ rẹ igbenu ri bẹdẹ na, oburhubu rẹ igbenu ri bẹdẹ, e dia uyovwi ri Josẹf, o dia arhare rẹ ohwo ra hẹriẹre nẹ oma rẹ emesẹ rọye.

²⁷Bẹnjamin okpohrokpo rọ chẹghẹ emu, irhiọke ọ Me savwọ eranvwe rọye vwẹ ovwọnvwọn kọ ghara ibu rọye.

²⁸Enana ejobi na eye orua ihwivẹ rẹ Izrẹl; Ọnana kọye obo rẹ ọsẹ rayen ta kẹ ayen rọ vwọ nẹ ẹrhovwo kẹ ayen, dohwo dẹrhovwo ro foro.

²⁹Etiyin o de ji urhi kẹ ayen ọ da ta kẹ ayen, Mi che kpo bru ihwo mẹ rare, we shi vwe kugbe esẹ mẹ vwẹ ẹmwa rọ ẹghwa rẹ Efrọn ohwo ri Hẹt na,

³⁰ẹmwa rẹ ẹghwa vwi Mak-pela, rọ obọhwere ri Mamre, vwẹ otọ ri Kenan, re Ebraham dẹ kugbe ẹghwa mie Efrọn ohwo ri Hẹt, rere ọ dia ogbe.

³¹Etiyin e shi Ebraham phihọ kugbe Sera rẹ aye rọye, Etiyin e shi Aizik phihọ kugbe Rebeka rẹ aye rọye, Etiyin mi ji shi Leah phihọ

³²ẹghwa na kugbe ẹmwa na rọ herọ na a de ayen mie ohwo ri Hẹt.

³³Ri Jekọp vwọ ta eta enana ejobi nu kẹ emọ rọye, o de si awọ rọye ro ehwa, o de phi ẹnwẹn họ, e de sho kugbe ihwo rọye.