Read urhobo Jẹnẹsis 8 Bible Online

Jẹnẹsis 8 - urhobo bible

Jẹnẹsis 8

¹Ẹkẹvuọvo Ọghẹnẹ da rhe karohọ Noa vẹ eranvwe rẹ aghwa na ejobi kugbe uchuru ejobi re vẹ ọye gba ro evun rẹ okọ na Ọghẹnẹ da vwẹ odju rhe nẹ o gbe dju enu rẹ akpọ na, ame na de rhi rhirẹn,

²ogbugbu rẹ ame na da tangbe, evakpo rẹ obo odjuvwu na ejobi de rhurhu, osio rọ rhọ nẹ enu cha da daji,

³ame na de si reyọ kọke kọke. Vwẹ oba rẹ ẹdẹ ujori gbẹ ujuvẹ gbẹ ihwe re, ame na da rhe kpọ;

⁴vwẹ emeranvwe rẹ ighwrẹ, vwẹ ẹdẹ rẹ ihwe gbẹ ighwrẹ rẹ emeranvwe na, okọ na da rhe kpọ muotọ vwẹ enu rẹ ugbenu ri Ararat.

⁵Ame na kẹ ẹkpọ ẹkpọ bẹsiẹ ro rhi vwo te emeranvwe rẹ ihwe vwẹ ẹdẹ rẹ ẹsosuọ rẹ emeranvwe na, enu rẹ igbenu na ejobi da rhe kpọ phia.

⁶Vwẹ ẹdẹ ujuvẹ vwọ wan nu Noa de rhie evakpo rẹ okọ na rọ kare na,

⁷o de siobọ nẹ okpemu, o da rha kpenẹ kpenẹ bẹsiẹ rẹ ame na rhe vwọ kpọ nẹ akpọ na.

⁸Ọ da rhoma siobọ nẹ inekuku ro re ni sẹ ame na kpọ nẹ otọ na re;

⁹ẹkẹvuọvo inekuku na mrẹ asan rọ rhan mu-u, ọ da rhoma rhan bro rhe vwẹ evun rẹ okọ na, kidie yẹ ame na ji phoro enu rẹ otọ na ejobi. Etiyin ọ da riẹn obọ rọye vwọ reyọ phihọ evun rẹ okọ na.

¹⁰Ọ da rha hẹrhẹ ẹdẹ ighwrẹ efa, ọ ke rhoma siobọ nẹ inekuku na nẹ evun rẹ okọ na;

¹¹inekuku na da rha bro rhe vwẹ ovwọnvwọn, e vwo no, o mu ọbe rẹ olive ọkpokpọ vwọ hwunu, Noa ke rhe riẹn nẹ ame na kpọ nẹ akpọ na re.

¹²Ọ ke je rhoma hẹrhẹ ẹdẹ ighwrẹ efa, ọ da rhoma siobọ nẹ inekuku na, ọ gbe rhoma rhan bro rhe ọfa-a.

¹³Vwẹ evun rẹ ikpe uri erha gbẹ ọvo, vwẹ emeranvwe rẹ ẹsosuọ, ẹdẹ rẹ ẹsosuọ rẹ emeranvwe na, ame na da kpọ nẹ otọ na kakare; Noa da fan uwevwi rẹ okọ na nu, o vwo ni, nighe, enu rẹ otọ na ejobi kpọre.

¹⁴Vwẹ emeranvwe rivẹ, vwẹ ẹdẹ ujuvẹ gbẹ ighwrẹ rẹ emeranvwe na, otọ na da kpọre.

¹⁵Ọghẹnẹ da ta ki Noa,

¹⁶Gba yan phia nẹ evun rẹ okọ na, wẹ te aye wẹn, vẹ emọ wẹn te eya rẹ emọ wẹn

¹⁷Reyọ kemu kemu ejobi ro vwo arhọ re vẹ owẹ gba herọ vwẹ evun rẹ okọ na ejobi — ephra kugbe eranvwe kugbe emu kemu ri kpono vwẹ enu rẹ otọ na rere ayen mrẹ asan vwiẹ buebu vwẹ enu rẹ akpọ na, re ayen mo re ayen bu phihọ vwẹ enu rẹ akpọ na.

¹⁸Kọye Noa da yan phia, ọ vẹ emọ rọye te aye rọye te eya rẹ emọ rọye

¹⁹Keranvwe keranvwe, kemu kemu ro kpono, kọphra kọphra, kemu kemu ro yan vwẹ akpọ na, e da yan otuotu nẹ evun rẹ okọ na rhe.

²⁰Noa da so agbada kẹ Ọrovwohwo, ọ da reyọ eranvwe keranvwe ro tete oma, kugbe kọphra kọphra ro tete oma, o de ze izobo rẹ ẹtorhẹ vwẹ enu rẹ agbada na.

²¹Ọke rẹ Ọrovwohwo vwo nyo ọnrhe ghwoghwo rẹ izobo na, Ọrovwohwo da ta vwẹ udu rọye, Me gbe harhe otọ na ọfa vwi fiki rẹ ohwo-o, kidie iroro rẹ evun rọye nẹ ọke-emọ rhe pha brabra, eyẹ Me gbe ghwọrọ emu kemu ro vwo arhọ re Me mare ọfa-a.

²²Ọke rẹ akpọ na dia krite na, ọke ekankọn kugbe ọke orhọ ekpae kugbe oheri, ọkeuvo kugbe ohwahwa, uvo kugbe ason se re bẹdẹ-ẹ.