Read urhobo Jẹnẹsis 9 Bible Online

Jẹnẹsis 9 - urhobo bible

Jẹnẹsis 9

¹Ọghẹnẹ de bruphihọ kẹ Noa vẹ emọ rọye, ọ da ta kẹ ayen, We vwiẹ ri we bu phihọ, ru wa vọn akpọ na.

²Oshọ wẹn kugbe udidi wẹn ko mu eranvwe keranvwe rẹ akpọ na, ji te ọphra kọphra rọ obenu na, emu kemu ejobi ro kpono vwẹ otọ na kugbe erin rẹ ame; mi phi ayen ejobi phihọ obọ wẹn,

³emu kemu ejobi rọ yan ro vwo arhọ kọ dia emuọre kẹ wẹ, kirobo Me vwẹ ifọn kẹ wẹ na, Me je kẹ wẹ emu ejobi.

⁴Ẹkẹvuọvo wọ ria uvwo vẹ arhọ rọye-e, kọye ọbara rọye.

⁵Fiki rẹ ọbara rẹ arhọ wẹn na ke Me ghene nekpẹn rẹ osa rọye, vwẹ obọ rẹ eranvwe keranvwe Me da nekpẹn rọye Etiyin ji te ohwo rẹ akpọ, vwẹ obọ rẹ oniọvo rọye.

⁶Ohwo ro sun ọbara rẹ ohwo te otọ, ohwo ọfa ji sun ọbara rọye te otọ, kidie Ọghẹnẹ ma ohwo vwẹ uhoho rọye.

⁷Vwọ kẹ ovwan, we vwiẹ ri we bu phihọ, we vwiẹ buebu vwẹ akpọ na ru we bu phihọ.

⁸Etiyin Ọghẹnẹ da ta kẹ Noa vẹ emọ rọye,

⁹Nighe, ke Me vẹ owẹ cha re ọphọ kugbe uvwiẹ wẹn rọ cha vwẹ obuko wẹn,

¹⁰kugbe eranvwe keranvwe ekpokpọ re vẹ owẹ gba herọ, uche ri nene uwe nẹ evun rẹ okọ na rhe.

¹¹Me vẹ owẹ ke re ọphọ, ne Me gbe cha vwẹ ame rẹ oghwe vwo hwe uvwo ejobi ọfa eyẹ vwọ vwẹ oghwe vwọ ghwọrọ akpọ na ọfa-a.

¹²Ọghẹnẹ da ta, Ọnana kọ cha dia oka rọ ọphọ na re Me vẹ owẹ kugbe eranvwe keranvwe rọ herọ re Me mare na cha re, kugbe uvwiẹ rọ cha vwẹ obaro wẹ;

¹³Me cha vwẹ aphoro mẹ vwo mu vwẹ enu rẹ ikoro na, kọ cha dia oka rẹ ọphọ vwẹ uvwre mẹ kugbe akpọ na.

¹⁴Ọke rẹ ikoro de mu vwẹ enu rẹ akpọ na re a da mrẹ aphoro vwẹ enu rẹ ikoro na,

¹⁵ke Me karohọ ọphọ rọ herọ vwẹ uvwre mẹ vẹ owẹ kugbe eranvwe keranvwe rọ herọ re Me mare ejobi, ame na gbi che hirhe oma phihọ oghwe rọ ghwọrọ ohwo ọfa-a.

¹⁶Ọke rẹ aphoro na da obenu, ki mi no ke Me karohọ ọphọ ri bẹdẹ rọ uvwre rẹ Ọghẹnẹ kugbe eranvwe keranvwe ekpokpọ rọ herọ re Me mare vwẹ akpọ na.

¹⁷Ọghẹnẹ da ta ki Noa, Ọnana kẹ oka rẹ ọphọ na ri mi vwo mu vwẹ uvwre mẹ kugbe uvwo ejobi rọ enu rẹ akpọ na.

¹⁸Emeshare ri Noa ri nẹ evun rẹ okọ na rhe da dia Shẹm, Ham, kugbe Jafẹt, Ham kọye ọsẹ ri Kenan.

¹⁹Enana erha na keye emọ ri Noa; enana erha na keye ri vwiẹ akpọ na soso.

²⁰Noa kọye ọghwẹrẹ rẹ ẹsosuọ rọ tu voro otọ na. Ọ da kọn ogba ri vain,

²¹ọ da da udi ri vain na, udi de muo, o de shevwerhẹ otọ rẹ utughẹ rọye vẹ ẹbẹba.

²²Ham, rẹ ọsẹ ri Kenan, da mrẹ ẹba rẹ ọsẹ rọye, o de rhi gbe ikun kẹ iniọvo rọye vwẹ otafe.

²³Shẹm vẹ Jafẹt da reyọ ewun, ayen da vwọ kpahe igabọ, ayen da vwẹ ukuko re rhurhu ẹba rẹ ọsẹ rayen ayen de ku opharo fia, ayen gbe rha mrẹ ẹba rẹ ọsẹ raye-en.

²⁴Ri Noa vwo gbunie rhọvwọ rhe o de vughe obo rẹ emọ rọye rẹ itete ivẹ na ru kẹ,

²⁵ọ da ta, Eka ki Kenan, ọviẹn rẹ ọviẹn wọ dia kẹ iniọvo wẹn.

²⁶Ọ da je ta, Ọrovwohwo rẹ Ọghẹnẹ mẹ bruba kẹ Shẹm, gbe ji Kenan dia ọviẹn rọye.

²⁷Ọghẹnẹ hẹre ishamwa ri Jafẹt, e jọ dia itughẹ ri Shẹm, e je Kenan dia ọviẹn rọye.

²⁸Noa da rhoma dia akpọ na ikpe uri gbẹ ujughwrẹ gbẹ ihwe, vwẹ ọke rẹ oghwe na vwo kunu.

²⁹Ẹdẹ rẹ akpọ ri Noa ejobi da dia ikpe uri ẹne gbẹ ujughwrẹ gbẹ ihwe o de ghwu.