Read urhobo 2 Samuẹl 13 Bible Online

2 Samuẹl 13 - urhobo bible

2 Samuẹl 13

¹Asakiephana Absalọm, rẹ ọmọ ri Devid de vwo oniọvo rẹ ọmọtẹ oyoyovwi re se odẹ rọye Tama; ọke ọvo vwo te, Amnọn rẹ ọmọ ri Devid, de vwo ivuẹvwerhọ kẹ.

²Ivuẹvwerhọ na de rhi kpokpo gangan, o de rhi fovwo phihọ ọga fiki rẹ ọmọsẹ rọye na Tama; kidie Tama na ọmọtobẹ, ọ da mrẹ nẹ ọganre vwọ kẹ Amnọn ro vwo nene ru emu.

³Ẹkẹvuọvo Amnọn vwo ugbeyan ọvo, re se Jonadab, ọmọ ri Shimeah rẹ oniọvo ri Devid; Jonadab na ohwo vẹ ẹghwanre.

⁴Ọye ọ da ta kẹ, E ọmọ rẹ ovie, die wọ vwọ dọn kirhiọke kirhiọke? Ta obo re sorọ kẹ vwẹ. Amnọn da ta kẹ, Me guọnọ Tama, rẹ oniọvo rẹ ọmọsẹ mẹ Absalọm.

⁵Jonadab da ta kẹ, Sherhẹ ehwa wẹn, wo mi ru kerẹ ohwo rọ mwọga; ọke rẹ ọsẹ wẹn da rhe mrẹ wẹn, wọ me ta kẹ, biko jẹn ọmọsẹ mẹ rẹ ọmọtẹ Tama rhe, rọ kẹ vwẹ emu re, ro chere emu na vwẹ irharo mẹ, re me mrẹ, re me riọ vwẹ obọ rọye.

⁶Ọye Amnọn de sherhẹ, kerẹ ohwo rọ mwọga; ọke rẹ ovie vwọ rhe mrẹ, Amnọn da ta kẹ ovie, Me rẹ wẹ, jẹn Tama rẹ ọmọsẹ mẹ rẹ ọmọtẹ rhe, ro ru ikara ivẹ vwẹ irharo mẹ, re me riọ vwẹ obọ rọye.

⁷Etiyin Devid de ji ohwo re se Tama nẹ o bru omoni rọye Amnọn kpo uwevwi rọye re ru emu kẹ.

⁸Etiyin Tama de bro omoni rọye kpo uwevwi rọye; vwẹ asan ro sherhẹ na. Ọ da reyọ frawa ọ da nọ, o de vwo ru ikara vwẹ irharo rọye, ọ da kakọ.

⁹Ọ da reyọ ọmọze, o de kuo phihọ vwẹ irharo rọye, ẹkẹvuọvo Amnọn rhọvwe re-e. Amnọn da ta, Jẹn ihwo na ejobi nẹ etiyin ayen ejobi de nẹ asan rọ epha.

¹⁰Amnọn da ta kẹ Tama, Vwẹ emu na rhe obo uvun rere me riọ vwẹ obọ wẹn. Tama de mu ikara na kpo uvnn bru Amnọn ra.

¹¹Ẹkẹvuọvo ọke ro vwo mu emu na kẹrẹ nọ gba riọ, ọ da yọnrọn ọ da ta kẹ, Yanrhe, nene uvwe sherhẹ, omoni mẹ rẹ ọmọtẹ.

¹²Ọ da kpahe kẹ, Ẹjo, omoni mẹ, wọ gba vwẹ-ẹ, kidie a mrẹ emu ọtiọye vwẹ Izrẹl dẹvo-o, wo ru emu ugheghẹ nana-a.

¹³Vwọ kẹ vwẹ, tivọ me ghwa omẹvuọ nana ra? Rha vwọ kẹ wẹ, ko wọ dia kerẹ ọvo rẹ ẹkpa vwẹ Izrẹl. Fiki rẹ ọtiọye na, Me rẹ wẹ, gba ta kẹ ovie; fikiridie o se si vwe nẹ obọ wẹ-ẹn.

¹⁴Ẹkẹvuọvo ọ kerhọn rọye-e, Amnọn rha vwọ gan nọ Tama na, ọ da gba, ọ vọye de sherhẹ.

¹⁵Oma ri Tama de rhi ru Amnọn gangan; ivuemiovwo ro vwo kẹ da rhe rho nọ ivuẹvwerhọ ro vwo kẹ. Amnọn da ta kẹ, Vrẹn wọ yanran,

¹⁶Ẹkẹvuọvo Tama da ta kẹ, Ẹjo, omoni mẹ; umwemwu ru wọ vwọ tanẹ me yanran rho nọ obo wo ru vwe na. Ẹkẹvuọvo ọ davwerhọ rọye-e.

¹⁷O de se odibo rọye rọ vwẹ ẹro te, ọ da ta, Phi aye nana phihọ otafe nẹ obaro mẹ, wọ kare ẹchẹ gbe.

¹⁸Asakiephana Tama ku adagba ro grotọ phihọ; kidie oka rẹ adagba ọtiọye emetẹ rẹ ovie re je riẹn ọshare kuẹ phihọ. Odibo ri Amnọn de phi Tama phihọ otafe, ọ da kare ẹchẹ gbe.

¹⁹Tama da ghwẹ iwurhie ku uyovwi rọye, ọ da bẹrẹ ewun rọye ro ku phihọ, o de mu obọ kpahe uyovwi ọ da viẹ yanran.

²⁰Oniọvo rọye Absalọm da ta kẹ, wọ vẹ omoni wẹn rẹ ọshare gba mroma? Ẹkẹvuọvo gbe rhurhu unu wẹn omoni mẹ; omoni wẹn ọye oruẹ; wo ghwe roro gangan. Tama ọvo sogoio kọye dia uwevwi rẹ oniọvo rọye Absalọm.

²¹Ọke rẹ ovie Devid vwo nyo ena ejobi, ophu de muo gangan.

²²Ẹkẹvuọvo Absalọm rha kpahe ota ọbrabra yẹrẹ oyoyovwi kẹ Amnọn rẹ omoni rọye-e. Kidie oma ri Amnọn ko tu Absalọm, fikiridie ọ gba oniọvo rọye Tama du.

²³Ẹgbukpe ivẹ vwọ wan nu, Absalọm de rhi vwo ihwo re wanre igodẹ vwi Baalhazo, rọ kẹrẹ Ifrem, Absalọm de se emọ rẹ ovie ejobi.

²⁴Absalọm de bru ovie rhe, ọ da ta, Nighere, odibo wẹn vwo ihwo re wanre igodẹ, biko jẹn ovie vẹ idibo rọye vẹ ovwẹ ra.

²⁵Ẹkẹvuọvo ovie da ta kẹ, Absalọm, Ẹjo, ọmọ mẹ, avwanre ejobi vẹ owẹ sa ra-a, avwanre da rha dia oghwa kẹ wẹ. Absalọm da rẹ gangan, ẹkẹvuọvo ọ rhọvwe kẹ-ẹ. Ọ da vwẹ ẹrhovwo kẹ Absalọm.

²⁶Absalọm da ta, Wọ rha rhọvwe-e na, biko gbe jẹn omoni mẹ Amnọn nene avwanre. Ovie da ta kẹ, Die sorọ o vwo nene uwe ra?

²⁷Ẹkẹvuọvo Absalọm de sun muo bẹsiẹ rẹ ovie rhe vwọ rhọvwe nẹ Amnọn vẹ emọ rẹ ovie ejobi vọye ra.

²⁸Etiyin Absalọm da ta kẹ idibo rọye nẹ, Wa rhẹrẹ vwẹ ọke rẹ udi de mu Amnọn, me da ta kẹ ovwan nẹ, ghwiẹ Amnọn; we mi hwe, wo jẹn oshọ mu ovwa-an. ọ dia omẹvwẹ ri ji ovwa-an? Yivwaro, goma.

²⁹Ọtiọye idibo rẹ Absalọm ru ki Amnọn kirobo rẹ Absalọm ta kẹ ayen. Etiyin emọ rẹ ovie na ejobi de vrẹn dohwo dekẹtẹkẹtẹ rọye da ro ayen da djẹ kpo.

³⁰Rẹ ayen vwọ hẹ idjerhe re, usi de rhi duvwu Devid nẹ, Absalọm hwe emọ rẹ ovie ejobi ọvuọvo rọye gbi chekọ-ọ.

³¹Devid vrẹnri ọ da bẹrẹ iwun rọye o de sherhẹ otọ; idibo rọye ejobi de mudia riariẹ vẹ iwun rayen re bẹrẹ.

³²Ẹkẹvuọvo Jonadab rẹ ọmọ ri Shimeah rẹ oniọvo ri Devid da ta, E jẹn ọrovwovwe roro nẹ ehwe emọ rẹ ovie ejobi na-a; Amnọn ọvo ri ghwuru; Absalọm ri ru ọnana fiki ri Amnọn gba Tama du ọye ọ vwọ jẹn iroro nana.

³³Fiki rẹ ọtiọye na e gbe jẹn ọrovwovwe, roro nẹ emọ rẹ ovie ejobi ri ghwuru-u; kidie Amnọn ọvo ri ghwuru.

³⁴Ẹkẹvuọvo Absalọm da djẹ. Emeghene rọ rhẹrẹ otọ vwọ kpare opharo, ọ da mrẹ ihwo re wan idjerhe ri Horonaim rọ hẹ oma rẹ ugbenu cha.

³⁵Jonadab da ta kẹ ovie, Nighere, emọ rẹ ovie rhire; kirobo rẹ odibo wẹn tare, ọtiọye ọ wanre na.

³⁶Ri Jonadab ghwe vwo fun ota nu na, nighe, emọ rẹ ovie da rhe, ayen da kpare urhuru ayen da viẹ, te ovie vẹ idibo rọye da viẹ gangan.

³⁷Ẹkẹvuọvo Absalọm da djẹ o de bru Talmai ọmọ rẹ Amihud, ovie ri Gẹsho. Devid de muoma rẹ emọ rọye phihọ nẹ ẹdẹ ra ro ẹdẹ.

³⁸Etiyin Absalọm da djẹ ọ da yanran kpo Gẹsho, ọ da dia oboyi ikpe erha.

³⁹Ẹwẹn rẹ ovie da guọnọ nẹ ọye mrẹ Absalọm; kidie e bruro uche fiki ri Amnọn, rọ vwọ mrẹ nẹ o ghwu nure.