Read urhobo 2 Samuẹl 14 Bible Online

2 Samuẹl 14 - urhobo bible

2 Samuẹl 14

¹Joab rẹ ọmọ ri Zeruiah vwọ mrẹ nẹ udu rẹ ovie kẹ obo rẹ Absalọm ọ ra.

²Joab de ji ohwo kpo Tekoa ra guọnọ aye ọvo ro vwo ẹghwanre nẹ oboyi rhe, ọ da ta kẹ, Ru kerẹ ohwo ro vwerẹ uvweri, wo ku ewun rẹ uvweri phihọ, wọ vwẹ evwri ghworo oma wẹ-ẹn, ru kerẹ aye ro vwerẹ ohwo ro ghwu krire;

³wo bru ovie ra, ru wọ ta enẹ kẹ. Joab de djẹ obo rọ ta kẹ.

⁴Ọke rẹ aye ri Tekoa na vwo bru ovie rhe, o de she bọvwọn opharo rhuotọ o de yere ovie, ọ da ta, chuko, E ovie, ovie da ta kẹ,

⁵Die da wẹ rhe? Ọ da kpahe, Nighe, mẹvwẹ ayeuku, ọshare mẹ oghwuru.

⁶Ọmọtẹ wẹn vwo emọ ivẹ, ayen vwọ họnra vwẹ aghwa, a rha mrẹ ohwo ro vwrẹ aye-en, ọvo de hwe ọrivẹ,

⁷Asakiephana orua ejobi de rhi gbe kpahọ odibo wẹn, ayen da ra, A vwẹ o ro hwe ohwo na rhe re ehwe fikiridie o hwe omoni rọye, e gbe ji hwe oreuku na rhe; kẹ ayen furhie umwerhanre mẹ ro chekọ, ọ gbe jẹn odẹ rẹ ọshare mẹ yẹrẹ ẹkarophihọ rọye dia akpọ-ọ.

⁸Etiyin ovie na da ta kẹ aye na, Kpo uwevwi wẹn, ki mi ji ohwo rhe vwẹ ẹro te we.

⁹Aye ri Tekoa na da ta kẹ ovie, Ọrovwovwe, E ovie, oruku rọye dia enu mẹ, vẹ enu rẹ uwevwi rẹ ọsẹ mẹ; abe rọye dia euu rẹ ovie vẹ ekete rọye-e.

¹⁰Ovie na da ta, Kohwo kohwo rọ ta ota kẹ wẹ, reyọ rhe vwe, ọ gbe vwẹ obọ te we ọfa-a.

¹¹Etiyin aye na da ta, Me rẹ wẹ, jẹn ovie kperi se Ọrovwohwo rẹ Ọghẹnẹ wẹn rere Ọreihri rẹ ọbara nana vwọ da obọ ji, o gbi hwe ọfa-a, ayen da rha ghwọrọ ọmọ mẹ. Ọ da ta, Ọtiobọ rẹ Ọghẹnẹ herọ na, ogẹto rẹ ọmọ wẹn ọvuọvo che she te otọ-ọ.

¹²Etiyin aye na da ta, Jẹn ọmọtẹ wẹn je ta ota ọvo kẹ ọrovwovwe ovie tavwe, me rẹ wẹ, Ovie da ta, Gba ta,

¹³Aye na da ta, kemavọ wo rhe vwo roro iroro tiọye kpahe ihwo rẹ Ọghẹnẹ? Kidie wo vwo brorhiẹ nana na, yẹ ovie ọvo rhe brehwe omaobọ rọye; kidie ovie rha reyọ ọmọ rọ djẹ nẹ uwevwi rọye hirhe kpo-o.

¹⁴Avwanre ejobi che ghwu, avwanre họhọ ame re ku phihọ otọ, a gbe sa banọ koko ọfa-a, Ẹkẹvuọvo Ọghẹnẹ nẹ ohwo ruẹ-ẹ; jẹ Ọghẹnẹ gbi se hwe ohwo rọ gbẹn idjerhe ọfa, rere ọmọ ro djere mrasan bro rhe-e.

¹⁵Asakiephana me rhere rhe ta ota nana kẹ ọrovwovwe ovie, kidie ihwo na djẹ oshọ mu vwe; odibo wẹn rẹ ọmọtẹ da ta, me ta ota nana kẹ ovie; a riẹnre-e ovie mi ru obo rẹ ọmọtẹ rọye yanre na.

¹⁶Kidie ovie se nyo, ro de si ọmọtẹ rọye nẹ obọ rẹ ohwo ro che hwe vwe vẹ ọmọ mẹ kugbe nẹ ukuẹriọ rẹ Ọghẹnẹ.

¹⁷Ọmọtẹ wẹn de roro nẹ, Ota rẹ ọrovwovwe ovie kọ nẹrhẹ oma fuvwe; kidie ọrovwovwe ovie họhọ amakashe rẹ Ọghẹnẹ ro vughe emuesiri vẹ obrabra; Ọrovwohwo rẹ Ọghẹnẹ nene uwe dia.

¹⁸Etiyin ovie da kpahe kẹ aye na, Wo siẹ obo me cha nọ wẹ na nẹ kẹ vwẹ-ẹ. Aye na da ta, Jẹn ọrovwovwe ovie ta.

¹⁹Ovie na da ta, Obo ri Joab hẹ enana ru wọ ta na? Aye na da kpahe ọ da ta, kerẹ ọtiobo wọ herọ na, ovie rovwovwe, ohwo se kpo obọrhe yẹrẹ obọhwẹre-e no obo rẹ ovie tare na-a; fiki rẹ odibo wẹn Joab, ri ji vwe, o de phi efa nana phihọ unu rẹ ọmọtẹ wẹn.

²⁰Rere ọ vwọ rhẹriẹ obo re emu na cha dia ọye odibo wẹn Joab vwo ru emu nana; ọrovwovwe de rhe vwo ọhọ kerẹ ọhọ rẹ amakashe rẹ Ọghẹnẹ rọ vwọ riẹn emu rẹ akpọ na ejobi.

²¹Etiyin ovie da ta kẹ Joab, Nighere asakiephana, me rhọvwe ọnana kẹ wẹ, reyọ Absalọm rẹ emeghene na hirhe rhe.

²²Joab de sherhẹ bọvwọn opharo rhuotọ, o da vwẹ ọghọ vẹ ẹkpẹvwẹ kẹ ovie. Joab da ta, Nonẹ odibo wẹn vwọ riẹn ni mi vwo ẹroesiri vwẹ obaro wẹn, ọrovwovwe, E Ovie, rẹ ovie vwo ru oyare rẹ odibo rọye gba.

²³Etiyin Joab de vrẹn ọ da yanran kpo Gẹshọ, ọ da reyọ Absalọm rhe Jerusalẹm

²⁴ovie da ta, jọ dia uwevwi rọye san, e gbi jọ mrẹ opharo mẹ-ẹ; Etiyin Absalọm da dia uwevwi rọye san, o gbe mrẹ opharo rọye-e.

²⁵Vwẹ evun rẹ Izrẹl na ejobi, ohwo ọvuọvo re jirẹ kerẹ Absalọm vwẹ erhuvwu ọ herọ-ọ; nẹ owọ re te uyovwi, o vwo asan ra vwọ harhọ-ọ.

²⁶Ọke ro de bru ẹto rọye kidie oba rẹ ukpe ọye o vwo bru ẹto. fiki rẹ ẹto na họhọ nọ kẹ, ko bro; ovwanvwọn rẹ ẹto rẹ uyovwi rọye na da dia shekẹl uri vwẹ ẹhọhọ rẹ ovie.

²⁷Ọ de vwiẹ emeshare erha vẹ ọmọtẹ ọvo re se Tamar; aye na vwo erhuvwu gangan.

²⁸Absalọm da dia Jerusalẹm ikpe ivẹ jẹn ọ mrẹ opharo rẹ ọsẹ rọye-e.

²⁹Absalọm de ji ohwo re se Joab, re o vwo jo bru ovie, o de ji ikọn rivẹ, ẹkẹvuọvo o bru ro rhe-e.

³⁰Etiyin ọ da ta kẹ idibo rọye, Nighere, udju ri Joab kerẹ ọmẹ ọ je kọn bali phihọ, wa yanran re phi erhanre phihọ. Etiyin idibo rẹ Absalọm de phi erhanre phihọ.

³¹Etiyin Joab vrẹnri o de bru Absalọm rhe uwevwi rhe da ta kẹ, Die sorọ rẹ idibo wẹn vwo phi erhanre phihọ udju mẹ?

³²Absalọm da kpahe kẹ Joab, Nighere, mi ji ohwo re se we, re mi ji we bru ovie, re wọ nọ, Die sorọ mi vwo nẹ Gesho rhe? Oyoma kẹ vwẹ me vwọ daji oboyi, Asakiephana gbe ju vwe mrẹ opharo rẹ ovie; ọ da dianẹ orukuruku hẹ oma mẹ, gbe jo hwe vwe.

³³Etiyin Joab de bru ovie, ọ da ta kẹ; o de se Absalọm, Etiyin o de bru ovie rhe, o de sherhẹ bọvwọn opharo rhuotọ kẹ ovie, ovie da fiọnfiọn unu.