Read urhobo 2 Samuẹl 17 Bible Online

2 Samuẹl 17 - urhobo bible

2 Samuẹl 17

¹Ọ rọ vwọ kpahọ Ahitofẹl da ta kẹ Absalọm, Ju vwe sanọ ihwo uriori ihwivẹ, ki mi vrẹn vwọ tua Devid ason na.

²Ke me vwa vwẹ ọke rẹ oma vwọ ghwọrọ na, rẹ ọfu vwo dje na, ki mi re guegue, ihwo re vọye gba herọ ke djẹ; ke me ghwiẹ ovie she;

³ke me ghwẹ ihwo na ejobi hirhe rhe kirobo rẹ ọpha bru ọshare rọye cha. Arhọ rẹ ohwọvo wọ guọnọre, ihwo ejobi ke dia vwẹ ufuoma.

⁴Iroro nana de je Absalọm vẹ ekpako rẹ Izrẹl na ejobi.

⁵Etiyin Absalọm da ta, Se Hushai rẹ ohwo rẹ Archit na rhe, rere mi ji nyo obo rọ cha ta rhe.

⁶Ọke ri Hushai vwo bru Absalọm rhe, Absalọm da ta kẹ, ọtiọna Ahitofẹl tare; me ru obo rọ tare na? Ọ rha dia ọtiọye-e gba ta ọwẹn.

⁷Etiyin Hushai da ta kẹ Absalọm, Vwẹ ọke nana iroro rẹ Ahitofẹl jẹre ghwe yovwi te-e.

⁸Hushai da je kpahọ, Wọ riẹnre nẹ ọsẹ wẹn vẹ ihwo rọye na egba, gangan, yẹ ivun dja ayen kerẹ okpohrokpo re mie ọmọ; ọ rọ vwọ kpahọ, ọsẹ wẹn ọwena rẹ ofovwi gangan; ọ vẹ ihwo na che wo phihọ asan ọvo vwẹ ason na-a.

⁹Ọke ọvo yo si oma na vwẹ ọgọdọ ọvo yẹrẹ asan ọfa. Ọ da dianẹ ihwo na ẹvo sheri vwẹ imu rẹ ẹsosuọ, kohwo kohwo ro nyoro kọ tanẹ, E hwe ihwo ri nene Absalọm buebu.

¹⁰Ọnana ihwo re rori ni yivwaro, rẹ udu rayen họhọ udu rẹ okpohrokpo ke wran vẹ oshọ; kidie Izrẹl ejobi riẹnre nẹ ọsẹ wẹn ọgba rode, ihwo ri ji nene na je vwẹ ẹgba rhe.

¹¹Ẹkẹvuọvo iroro re me jẹre kọ na, jẹn Izrẹl ejobi wo koko kẹ wẹ nẹ Dan re te Bẹẹrsheba, kerẹ ehavwo rọ hẹ oma rẹ urhie vwẹ ebuo; ekpuyovwi wẹn ji kpo ofovwi na rhe.

¹²Etiọye kẹ avwanre cha vwa vwẹ asan asan ọvo ra da sa mrẹ; kẹ avwanre che pho muo kerẹ asan rẹ evwru e de she phihọ enu rẹ otọ; te ọye te ihwo ejobi re vọye gba herọ a gbe mrẹ ohwo ọvo ro che chekọ-ọ.

¹³Ọ da dianẹ ọ djẹ ro evun rẹ orere, ihwo ri Izrẹl ejobi ka vwẹ ufi rhe gba orere na, kẹ avwanre kpono kpo iyara bẹsiẹ re vwo ji ubioragha ẹmrẹ vwẹ etiyin.

¹⁴Absalọm vẹ ihwo rẹ Izrẹl ejobi da ta, Iroro ri Hushai rẹ Archit ri me yovwi nọ rẹ Ahitofẹl. Kidie Ọrovwohwo ruro rere a vwọ sen iroro esiri rẹ Ahitofẹl jẹre rere Ọrovwohwo mrasan hwa osa rẹ umwemwu rẹ Absalọm kẹ.

¹⁵Etiyin Hushai da ta kẹ Zadọk kugbe Abiata rẹ irherẹn, Etiọna vẹ etiọna Ahitofẹl jẹn iroro kẹ Absalọm kugbe ekpako rẹ Izrẹl; etiọna vẹ etiọna me rha jẹn iroro kẹ.

¹⁶Fiki rẹ etiọye, Asakiephana gbe ji ohwo phẹrẹphẹrẹ ra ta kẹ Devid nẹ, we wo phihọ uphephẹ rẹ asan ushuame na vwẹ ason na-a, ẹkẹvuọvo ayen wanvrẹn phẹre; a da rhe vwa ovie vẹ ihwo ri nenire, a da rọ ayen nu.

¹⁷Asakiephana Jonatan kugbe Ahimaaz ra hẹrhẹ vwẹ Ẹnrogẹl, odibo rẹ ọmọtẹ ọvo ọye ra vuẹ ayen, ayen me rha yanran ra ta kẹ ovie Devid, fikiridie a guọnọ ayen mrẹ vwẹ orere na kaka-a.

¹⁸Ẹkẹvuọvo ọmọshare ọvo mrẹ ayen; ọ da ra ta kẹ Absalọm; ayen ivẹ yanran phẹrephẹre, ayen de rhi te uwevwi rẹ ohwo ọvo vwi Bahurim, ro vwo orhare vwẹ otegodo, rọye, ayen da ro evun rọye.

¹⁹Aye na da reyọ orọvwọ vwọ hwa enu rẹ orhare na, ọ da hrahre eka phihọ enu rọye, a gbe riẹn emuọvo kpahọ-ọ.

²⁰Ọke rẹ idibo rẹ Absalọm vwo te uwevwi rẹ aye na, ayen. da ta, Tivọ Ahimaaz vi Jonatan epha? Aye na da ta kẹ ayen nẹ, Ayen shariẹ urhẹn vrẹn. Ọke rẹ ayen vwọ guọnọ ayen gbe rha mrẹ aye-en, ayen de rhivwi kpo Jerusalẹm.

²¹Ayen vwọ yanran nu, ayen de vrẹn nẹ orhare na rhe, ayen da yanran, ra ta kẹ ovie Devid, Ayen da ta kẹ Devid, Vrẹn wọ shariẹ ame na vrẹn, fikiridie etiọna vẹ etiọna Ahitofẹl jẹn iroro kpahọ owẹ.

²²Etiyin Devid de vrẹn, kugbe ihwo ejobi re vọye gba herọ, ayen da wan Jọdan vrẹn; bẹsiẹ rẹ ọke vwo rhie o gbi vwo ohwo ọvuọvo ro chekọ ro ji Jọdan ẹ wanvrẹ-ẹn.

²³Ọke rẹ Ahitofẹl rhe vwọ mrẹ nẹ iroro rọ jẹre e vwi ro ru emu-u, ọ da rhuẹrẹ ekẹtẹkẹtẹ rọye, o de vrẹn o de kpo uwevwi rọye, vwẹ obo orere rọye, ọ da rhuẹrẹ uwevwi rọye phihọ o de churu ghwu, e de sho phihọ ushi rẹ ọsẹ rọye.

²⁴Etiyin Devid de rhi te Mahanaim; Absalọm da wan Jọdan vrẹn te ọye te ihwo rẹ Izrẹl ejobi.

²⁵Asakiephana Absalọm da vwẹ Amasa ru onotu rẹ ofovwi vwẹ ẹdia ri Joab. Amasa da dia ọmọ rẹ ọshare ọvo re se Itra ohwo ri Ishmael rọ rọvwọ Abigail rẹ ọmọtẹ ri Nahash, oniọvo rẹ ọmọtẹ ri Zeruiah, oni ri Joab.

²⁶Izrẹl kugbe Absalọm de wo phihọ otọ ri Gilead.

²⁷Ọke ri Devid rhi vwo te Mahanaim, Shohi rẹ ọmọ ri Nahash ro nẹ Rabbah rẹ ihwo rẹ Ammọn rhe, kugbe Machir ọmọ rẹ Ammiel ro nẹ Lodebar rhe, kugbe Bazillai ri Gilead ro nẹ Rogeeim rhe,

²⁸da vwẹ ehwa, ize, ichẹ, eka, bali, emuọre, eka eyaya, isha kugbe ukodo rẹ eran

²⁹ọnyọn kugbe evwri kugbe igegede vẹ ame rẹ ivie nẹ e re; fikiridie ayen tare, nẹ, owẹvwe hwe ihwo na, oma ghwọrọ ayen urhuru rẹ ame hwe ayen vwẹ aghwa na.