Read urhobo 2 Samuẹl 18 Bible Online

2 Samuẹl 18 - urhobo bible

2 Samuẹl 18

¹''Etiyin Devid da ghwẹ ihwo re vọye gba herọ koko, ọ da vwẹ onotu mu vwẹ enu rẹ uriori kugbe enu rẹ ujori.

²Devid de ji utuofovwi yanran, ẹkẹ erha rọye nene Joab ẹkẹ erha nene Abishai ọmọ ri Zeruiah, oniọvo ri Joab, ẹkẹ erha nene Ittai ohwo ri Git. Ovie da ta kẹ ihwo na, Ekpuyovwi mẹ ji nene ovwan ra.

³Ẹkẹvuọvo ihwo na da ta, Wo nene avwanre-e, kidie avwanre da djẹ, ayen cha sa kerhọn rẹ avwanre-e. Ọ da dianẹ ẹbẹreọvo rẹ avwanre ghwuru, ayen je davwerhọn rẹ avwanre-ẹ, ẹkẹvuọvo wọ nọ ihwo uriori ihwe rẹ avwanre. Ọtiọye na ofori wọ daji obo orere wọ vwẹ ọchuko rhe avwanre.

⁴Ovie de ta kẹ ayen, Obo ri je ovwan ọye mi ru, Kọye ovie de mudia vwẹ oma rẹ anurhoro rẹ orere na, rẹ ihwo na ejobi vwọ wan vwẹ ujori, vẹ uriori

⁵Ovie da ta kẹ Joab kugbe Abishai kugbe Ittai nẹ, Ovwan me jomatọ kẹ Absalọm fiki mẹ. Ihwo ejobi de nyo obo rẹ ovie tare kẹ inotu rẹ ofovwi na kpahe Absalọm.

⁶Ihwo rẹ ofovwi na da ro uphephe vwọ so ihwo rẹ Izrẹl; aghwa rẹ Ifrem a da họnre ofovwi na.

⁷Idibo ri Devid de hwe ihwo rẹ Izrẹl, ihwo re hweri da dia uriori uje.

⁸Ofovwi na da hẹre nene aghwa ejobi. ihwo ri ghwu phihọ aghwa de bunọ ihwo rẹ ọlọkọ hweri.

⁹Absalọm da rhe yan ro idibo ri Devid. Absalọm gua ekẹtẹkẹtẹ, ekẹtẹkẹtẹ na da djẹ rọ otọ rẹ aghọ rẹ ọhahe rode ọvo, ẹto rọye da jẹn phihọ aghọ rẹ urhe na, ekẹtẹkẹtẹ na de fiotọ rọye wan, ko phieghe vwẹ irharheghe.

¹⁰Ohwo ọvo da mrẹ, ọ da ta kẹ Joab, Nighere, me mrẹ Absalọm rọ gba phihọ aghọ rẹ ọhahe, ko phieghe.

¹¹Joab da ta kẹ ọ rọ ta kẹ na, Die, wọ mrẹ re? Die wọ gbe teyọ she-e? Manẹ oma vwerhe ovwẹ me da vwẹ ikori rẹ idọnọ ihwe kẹ wẹ kugbe umwuamwa.

¹²Ọshare na da ta kẹ Joab, Ọ da dianẹ a ghwẹ ovwanvwọn uriori rẹ idọnọ phihọ obọ mẹ, me sa vwẹ obọ mẹ hwe ọmọ rẹ ovie-e, mi nyori rẹ ovie vwọ ta kẹ wẹ, Abishai kugbe Ittai nẹ wan sẹro rẹ emeghene na Absalọm fiki mẹ.

¹³Ọrivẹ mi de ru obo re brare vwọ kpahọ erhi rọye je vwo emu ọvuọvo rọ djahere kẹ ovie-e; okpuyovwi wẹn ko tephe kẹ vwẹ.

¹⁴Joab da ta, Mi rhe se nene uwe ku ọke kufia ọtiọna-a. Ọ da reyọ ubiri erha vwẹ obọ rọye, o de vwo duvwu ubiudu rẹ Absalọm, ọke rọ je vwọ ọkpokpo vwẹ enu rẹ ohahe na.

¹⁵Imighene ihwe re ghwa ekuakua rẹ ofovwi ri Joab, da gba riariẹ Absalọm ayen de hwe, o de ghwu.

¹⁶Etiyin Joab de hworo owanre ihwo re vwọ tua ihwo rẹ Izrẹl jovwo de rhivwi rhe, Joab da da ihwo na ji.

¹⁷Ayen de mu Absalọm phihọ ọgọdọ rode vwẹ evun rẹ egbo, ayen da vwẹ eragha ma osusu rhurhu, Ihwo rẹ Izrẹl ejobi dohwo duwevwi rọye da djẹ ra.

¹⁸Absalọm ọke rọ vwọ hẹ akpọ ọ da ma osusu rẹ oragha kẹ oma rọye vwẹ ushokpotọ rẹ ovie, fikiridie ọ tare, nẹ, Mi vwo ọmọ ra vwọ karophihọ odẹ mẹ-ẹ, e de se nẹ ẹkarophihọ rẹ Absalọm rhi te nonẹ na.

¹⁹Etiyin Ahimaaz rẹ ọmọ ri Zadọk da ta, ju vwe djẹ, Me ra ghwẹ ikun nana rhe ovie, nẹ Ọrovwohwo sivwi ro nẹ obọ rẹ ivwighrẹ rọye.

²⁰Joab da ta kẹ, Wọ ghwẹ ikun nonẹ na-a, wo se ru etiọye vwẹ ẹdẹ ọfa; ẹkẹvuọvo nonẹ na wọ sa ghwẹ ikun-n. Kidie ọmọ rẹ ovie ghwuru.

²¹Etiyin Joab da ta kẹ ohwo ri Kush yanran ra ta kẹ ovie obo wọ mrẹre. Ohwo ri Kush na yere Joab nu, ọ da djẹ yanran.

²²Etiyin Ahimaaz rẹ ọmọ ri Zadọk da rhoma ta kẹ Joab, Obo rọ epha ejobi, ju vwe je djẹ kpahe ohwo ri Kush na. Joab da ta, Die wọ vwọ djẹ, ọmọ mẹ a cha hwa ọsa kẹ wẹ vwẹ iyẹnrẹn na-a?

²³Obo re phiare ejobi me je djẹ. Etiyin ọ da ta kẹ, Gba djẹ. Ahimaaz da djẹ wan idjerhe rẹ aghwa na, ọ da djẹ vrẹn ohwo ri Kush.

²⁴Devid tidia uvwre rẹ anurhoro ivẹ; Ọrherotọ na de yeri kpenu rẹ uwevwi rọ hẹ igbẹhẹ vwẹ anurhoro na, rọ vwọ kparo ni nighere ohwo ọvo ra djẹ cha, ọye ọvo usun.

²⁵Ọrhẹrotọ na de kperi ọ da ta kẹ ovie, Ovie da ta. Ọ da dia ọye ọvo, yo vwo iyẹnrẹn vwẹ unu rọye. Ọ da djẹ rhe, o de si kẹrẹ.

²⁶Ọrhẹrotọ na da rha mrẹ ọshare ọfa rọ djẹ cha, Ọrhẹrotọ na de kpo anurhoro ọ da ta, Nighere, ọshare ọfa ọye ọvo je djẹ cba! Ovie na da ta o ji vwo iyẹnrẹn rhe.

²⁷Ọrhẹrotọ na da ta, Mi rori nẹ ọ rọ ka obaro na họhọ Ahimaaz rẹ ọmọ ri Zadọk. Ovie da ta, Ohwo esiri oruẹ, mi rori nẹ o vwo iyẹnrẹn esiri.

²⁸Ahimaaz de kperi ta kẹ ovie, Emu ejobi yoma. O de diguẹ bọvwọn opharo rhuotọ kẹ ovie, ọ da ta, Ebruba kẹ Ọrovwohwo rẹ Ọghẹnẹ wẹn, ro phi ihwo ri gbe kpahọ ọrovwovwe ovie phihọ obọ rẹ avwanre.

²⁹Ovie da ta, Kẹ emeghene na Absalọm herọ gberhẹnedẹ? Ahimaaz da kpahe Ọke ri Joab vwo ji odibo wẹn, Me mrẹ ihwo buebu ri kokori, je me riẹn otọ rọye-e.

³⁰Ovie da ta kẹ, Ro akakọ, wo mudia etinẹ, Ọ ro akakọ o de mudia gbiei.

³¹Nighere ohwo ri Kush na da rhe, ọ da ta, iyẹnrẹn esiri vwọ kẹ ọrovwọvwe ovie fikiridie Ọrovwohwo sivwi we vwẹ ẹdẹ ri nonẹ nẹ ogangan rẹ ihwo ri gbe kpahọ owẹ.

³²Ovie da ta kẹ ohwo ri Kush na, oma rẹ emeghene na Absalọm dori? Kush da kpahe, E je ivwighrẹ rẹ ọrọvwovwe ovie kugbe iri gbe kpahọ ejobi je ghwa dia kere emeghene yena.

³³Ota na da kpare ovie Devid, o de yeri kpo uvun rọ obenu rẹ anurhoro na ọ da viẹ, jọ yanran, ọ da ta E ọmọ mẹ Absalọm, ọmọ mẹ, ọmọ mẹ Absalọm, Mane mẹvwẹ eghwu vwẹ ẹdia wẹn, E Absalọm, ọmọ mẹ, ọmọ mẹ.