Read urhobo 2 Samuẹl 2 Bible Online

2 Samuẹl 2 - urhobo bible

2 Samuẹl 2

¹Ọna vwọ wan na, Devid da nọ mie Ọrovwohwo, Me yanran kpo orho ọvo vwi Juda? Etiyin Ọrovwohwo da ta kẹ, Yanran. Devid da ta, Kọvọ me ra? Ọ da ta, Kpo Hebrọn.

²Devid da yanran kpo etiyin ọ vẹ eya rọye ivẹ, Ahinoam ri Jẹzreel kugbe Abigail rẹ ayeuku ri Nabal ohwo ri Kamẹl.

³Devid da reyọ ihwo re vọye gba herọ, ohwo ọvuọvo vẹ evwrnwevwi rọye, ayen da dia irere ri Hebrọn.

⁴Etiyin ihwo ri Juda da rhe, ayen da vwi Devid mu ovie vwọ kẹ uwevwi ri Juda. Ayen da ta kẹ Devid, Ihwo ri Jabẹsh Giliad ri shi Sọl.

⁵Devid de ji ikọn bru ihwo ri Jabẹsh Giliad ra ọ da ta kẹ ayen, E jẹn Ọrovwohwo bruphihọ kẹ ovwan, kidie we ru ẹse nana vwọ kẹ ọrovwovwan, Sọl ri we vwo sho.

⁶Asakiephana Ọrovwohwo vwẹ ivuẹvwerhọ ro jẹrhẹriẹ vẹ uyota vwọ kẹ ovwan ki mi ru emu esiri kẹ ovwan kidie we ru emu nana.

⁷Fiki rẹ ọtiọye gbe jẹn abọ rẹ ovwan gan, we yivwaro, kidie ọrovwovwan Sọl o ghwu nure, uwevwi ri Juda vwo vwẹ mu ovie kẹ ayen.

⁸Asakiephana Abner rẹ ọmọ ri Ner, onotu rẹ ofovwi ri Sọl, da reyọ Ishboshet ọmọ ri Sọl, ọ da vwọ rhe Mahanaim,

⁹ọ da vwọ ma ovie vwọ kẹ Giliad kugbe Ashur vẹ Jẹzreel vẹ Ifrem, Bẹnjamin kugbe Izrẹl ejobi.

¹⁰Ishboshet, ọmọ ri Sọl ikpe ujuvẹ vwẹ ọke ro mu Izrẹl phihọ esuo, o de sun ikpe ivẹ vwẹ Izrẹl. Ẹkẹvuọvo uwevwi ri Juda de nene Devid.

¹¹Ọke ri Devid vwọ hẹ ovie vwi Hebrọn vwọ kẹ uwevwi ri Juda da dia ikpe ighwrẹ kugbe emeranvwe esan.

¹²Abner ọmọ ri Ner, kugbe idibo rẹ Ishboshet ọmọ ri Sọl, de nẹ Mahanaim rhe kpo Gibiọn.

¹³Joab rẹ ọmọ ri Zeruyah, kugbe idibo ri Devid, da yanran ayen da vwa oma vwẹ etẹrhe ri Gibiọn; ayen de tidia te otọ ebru ọvo ẹbẹre ọvo, ebru rivẹ rha ẹbẹre rivẹ rẹ ẹtẹrhe na.

¹⁴Abner da ta kẹ Joab, Jẹn imighele na vrẹn rere ayen heha kẹ avwanre. Joab da ta, E jẹn ayen vrẹn.

¹⁵Etiyin ayen de vrẹn ayen da wan usunsun, ihwivẹ ri Bẹnjamin vẹ Ishboshet ọmọ ri Sọl, kugbe ihwivẹ rẹ idibo ri Devid.

¹⁶Ayen da gbanọ ohwohwo uyovwi, ayen de duvwu ohwohwo ibiedada, ayen de she teye otọ. kọye e de se etiyin Helkat-hazzurim kọye Gibeọn.

¹⁷Ofovwi na ganre ẹdẹ yena gangan; idibo ri Devid de phi Abner vẹ ihwo rẹ Izrẹl kparobọ.

¹⁸Emọ erha ri Zeruyah hẹ etiyin, Joab, Abishai, kugbe Asahẹl. Asahẹl djonẹ kerẹ uzo;

¹⁹Asahei da vwọ tua Abner, rọ vwọ rua na ọ rhẹriẹ oma kpo obọrhe eyẹ obọhwẹre-e.

²⁰Abner vwo nẹ obuko ọ da ta, Ọye owẹ, Asahẹl? Ọ da kpahe, Mẹvwẹ.

²¹Abner da ta kẹ, Vwẹriẹ obọrhe wẹn yẹrẹ obọhwẹre wẹn, wọ yọnrọn emeghele ọvo wọ reyọ ekuakua rọye. Ẹkẹvuọvo Asahẹl rhọvwe kuoma rhẹriẹ-ẹ.

²²Abner da rhoma ta kẹ Asahẹl, rhivwi, wo gbi nene uvwe-e; die, me ghwiẹ wẹn sheọ! Didi ẹro mi vwo ni oniọvo wẹn Joab?

²³Ẹkẹvuọvo ọ je rhọvwe phi oma phihọ akakọ-ọ, etiyin Abner da vwẹ oshuẹ rọye duvwo evun fi obuko, o de she phihọ otọ, o de ghwu phihọ etiyin. Ihwo ejobi re djẹ te asan rẹ Asahẹl ghwu phihọ de mudia kein.

²⁴Ẹkẹvuọvo Joab kugbe Abishai da vwọ tua Abner. rẹ ọnre vwo kpotọ rẹ ayen de rhi te ugbenu rẹ Ammah, rọ hẹ obaro ri Giah vwẹ idjerhe rẹ wan kpo aghwa ri Gibiọn.

²⁵Emọ ri Bẹnjamin da ghwẹ oma koko vwọ cha Abner, ayen de mudia enu rẹ ugbenu.

²⁶Abner de se Joab, ọ da ta, kẹ ọlọkọ a vwọ ghwọrọ bẹdẹ? Wọ rha riẹn nẹ oba rọye muenu? Mavọ okrite wọ vwọ ta kẹ ihwo wẹn nẹ irhivwi, re ayen vwo jẹn imoni rayen ẹvwọ tua?

²⁷Joab da ta, Tiobo rẹ Ọghẹnẹ herọ, ọ dianẹ wọ ta ota-a, uyota manẹ ihwo na jẹn imoni rayen vwọ ẹvwọ tua rhawe irhiọke rhe.

²⁸Ọye Joab de hworo owanre ihwo ejobi de mudia gbiei, ayen gbe vwọ tua Izrẹl ọfa-a yẹrẹ ayen gbe họnre ọfa-a.

²⁹Abner vẹ ihwo rọye da yan vwẹ ason yena ejobi wan Araba; ayen da shariẹ Jọdan vrẹn, ayen da rha yan oghẹruvo yena tavwe ayen ki rhi te Mahanaim.

³⁰Joab de rhivwi ọ gbe vwọ tua Abner ọfa-a; ọke rọ vwọ ghwẹ ihwo na koko nu, o da rhe mrẹ nẹ ihwo ihwe gbe irhiri kugbe Asahẹl nẹ ihwo ri Devid.

³¹Ihwo rẹ idibo ri Devid hwe mie Bẹnjamin kugbe ihwo rẹ Abner da dia uri kugbe ujọrenre.

³²Ayen de mu Asahẹl ayen de sho phihọ ushi rẹ ọsẹ rọye, vwi Bẹtlẹhẹm. Joab vẹ ihwo rọye da yan ason yena ejobi, ayen de rhi te Hebrọn vwẹ irhiọke ride.