Read urhobo 2 Samuẹl 23 Bible Online

2 Samuẹl 23 - urhobo bible

2 Samuẹl 23

¹Asakiephana enana eta re ka oba ri Devid tare Epha ri Devid, ọmọ ri Jesse, Epha rẹ ohwo ra kpare kpenu, ọ rọ Ọghẹnẹ ri Jekọp vwẹ evwri ghworo ọboine vwevwerhe rẹ Izrẹl.

²Erhi rẹ Ọrovwohwo wan oma mẹ ta ota rọye hẹ ẹrevwe mẹ.

³Ọghẹnẹ rẹ Izrẹl ta nure, oragha rẹ Izrẹl ra kẹ vwẹ. ọke rẹ ọvo de suẹn ihwo vwẹ ọ rẹ ọsoso ro de suẹn vwẹ oshọ rẹ Ọghẹnẹ,

⁴Kọ bẹrẹ mu ayen kerẹ uvo rẹ irhiọke, Kerẹ ọnre ro lo muẹ enu ro pheri vwẹ irhiọke kerẹ osio rọ nẹrhẹ odi djẹ nẹ otọ cha.

⁵E ọ dia ọtiọye uwevwi mẹ vẹ Ọghẹnẹ gbe mudia? Kidie ọ vẹ ovwẹ re ọphọ ri bẹdẹ, ra nabọ ru ro rhuẹrẹ mu kokoroko. Fikiridie o se ru idjerhe mẹ yovwi-i Ọchuko mẹ ejobi kugbe ẹguọnọ mẹ.

⁶Ẹkẹvuọvo ihwo ri vwo Ọghẹnẹ-ẹ họhọ inwe ra kpare kufia; Kidie a sa vwe obo mu aye-en.

⁷Ẹkẹvuọvo ohwo rẹ ọ vwẹ obọ te ayen kọ vwẹ utehru vẹ udje rẹ ubiri choma erhanre kọye a vwọ torhẹ ayen ejobi.

⁸Enana edẹ re egba ri Devid vwori. Joshibbasshebẹt ri Tahkemon; ọye yọnrọn oshuẹ rọye vwo hwe ihwo uri ẹne ẹsiẹvo.

⁹Ọ rọ rha vwọ kpahọ ọyena vwẹ ohri rẹ ihwo erha na re ganre na ọye Eleazer, ọmọ ri Dodo, ọmọ rẹ Ahohi; ọ vẹ Devid gba herọ vwẹ ọke rẹ ayen vwo dede ihwo ri Filistia ri koko otuofovwi vwẹ etiyin, ihwo rẹ Izrẹl de sioma reyọ.

¹⁰O vrẹnri o de hwe ihwo ri Filistia bẹsiẹ rẹ obọ rhe vwọ rhọ, rẹ obọ rọye rhi vwo ghwu mu ọlọkọ; Ọrovwohwo da kẹ ayen ephio kparobọ rode vwẹ ẹdẹ yena; ihwo na de nene ra ghwẹ ekuakua rẹ ihwo re hweri reyọ.

¹¹Ohwo rọ vwọ kpahọ ọye Shammah ọmọ rẹ Agee ohwo ri Harar. Ihwo ri Filistia na de bi koko vwi Lẹhi, rọ kẹrẹ ugbo rẹ eran; ihwo na da djẹ kẹ ihwo ri Filistia.

¹²Ẹkẹvuọvo o de mudia vwẹ uherevie rẹ udju na, ọ da gbara ayen; o de hwe Filistia Ọrovwohwo da kẹ ephio kparobọ rode na.

¹³Erha rẹ ihwo ọgban re ganre na da yanran bru Devid vwẹ ọke orhọ vwẹ ẹmwa rọ hẹ evun rẹ oragha ri Adullam; otuofovwi ri Filistia de wo phihọ iyara ri Rephaim.

¹⁴Yi Devid hẹ evun rẹ ẹmwa vwẹ ọke yena, otuofovwi ri Filistia ọ hẹ evun ri Bẹtlẹhẹm.

¹⁵Devid da ta vwẹ ivuẹvwerhọ nẹ Manẹ ohwo ọvo sa jẹn ame kẹ vwẹ vwẹ orhare ri Bẹtlẹhẹm rọ hẹ oma rẹ anurhoro na.

¹⁶Ọye Egba erha na da ra vẹn otuofovwi ri Filistia wan ayen de re vo ame vwẹ orhare ri Bẹtlẹhẹm rọ hẹ oma rẹ anurhoro na, e de vwo rhe Devid. Ẹkẹvuọvo ọ darọ-ọ, o de kuo vwo kẹ Ọrovwohwo;

¹⁷Ọ da ta, E jo bi nu vwe oma sheri, E Ọrovwohwo ri mi vwo ru ọnana. Me da ọbara rẹ ihwo ri ku uyovwi rayen fia? Fiki rẹ ọtiọye na ọ darọ-ọ. Emu nana ọye ihwo erha na re ganre na ruru.

¹⁸Vwẹ ọke nana, Abishai, oniọvo ri Joab, ọmọ ri Zeruiah ọye olori rẹ ihwo ọgban na. Ọ da vwẹ Oshuẹ rọye vwọ họnre ihwo ujori erha, ọ da re odẹ kẹ oma rọye vwẹ ohri rẹ ihwo erha na.

¹⁹Ọye ohwo ro me kperi usi vwẹ ihwo ọgban na, o de hirhe ohwo ro suẹn ayen; ẹkẹvuọvo o te ihwo erha na-a.

²⁰Benaiah ọmọ ri Jehoiada, ohwo ro yivwaro ohwo ri Kabzeel, ohwo ro ruẹ emu rode; o hwe ihwo ivẹ ri Moab re pha kerẹ okpohrokpo; ọ je yanran re hwe okpohrokpo vwẹ ọgọdọ vwẹ ọke rẹ imicho vwo she.

²¹O hwe ohwo rẹ Ijipt ọvo, ọshare yoyovwi. Ohwo rẹ Ijipt na vwo oshuẹ vwẹ obọ, ẹkẹvuọvo ọkpọ Benaiah vwo bro, o de fru oshuẹ rọye mie obọ, ọ da vwẹ oshuẹ rẹ obọ rọye hwe.

²²Imu nana ọye Benaiah rẹ ọmọ rẹ Jehoiada, ruru, o de rhi kperi usi vwẹ ihwo erha na.

²³O kperi usi vwẹ ohri rẹ ihwo ọgban na, ẹkẹvuọvo, o se te ihwo erha na-a. Devid de vwo ru ohwo rọ rhẹrẹ.

²⁴Asahẹl rẹ oniọvo ri Joab je vwẹ usun rẹ ihwo ọgban na; Elhanan ọmọ ri Dodo ohwo ri Bẹtlẹhẹm,

²⁵Shammah ri Harod, Elika ri Harod,

²⁶Hẹlẹz ri Paitit Ira rẹ ọmọ ri Ikkesh ri Tekoa,

²⁷Abiẹza, ri Anatot, Mebunnai ri Hushat,

²⁸Zalmọn rẹ Ahoh, Maharai ri Netophah,

²⁹Heleb ọmọ ri Banah, ohwo ri Netophat, Ittai rẹ ọmọ ri Ribai ri Gibeah rẹ ọmọ ri Bẹnjamin.

³⁰Benaiah ri Piratọn, Hiddai rẹ ẹtẹrhe ri Gash,

³¹Abialbon ri Arbat, Azmavẹt Barhurim,

³²Eliahba ri Shaalbọn, emọ ri Jashen, Jonatan,

³³Shammah ohwo ri Harar, Ahiam ọmọ ri Sharar ohwo ri Harar,

³⁴Eliphẹlẹt ọmọ Ahasbai ri Maacah, Eliam ọmọ rẹ Ahitofẹl ri Gilo,

³⁵Hezro ri Kamẹl, Farai ri Arbit

³⁶Igai ọmọ ri Natan ri Zobah, Bani ri Gad,

³⁷Zelẹk ohwo rẹ Ammọn, Naharai ri Beerọt ro mu ekpo ri Joab ọmọ ri Zeruiah,

³⁸Ira rẹ ohwo rẹ Itri, Garẹb ohwo rẹ Itri,

³⁹Uraya rẹ ohwo ri Hẹt. ayen ejobi ọgban gbẹ ighwrẹ.