Read urhobo 2 Samuẹl 24 Bible Online

2 Samuẹl 24 - urhobo bible

2 Samuẹl 24

¹Ophu rẹ Ọrovwohwo da rhoma tua kpahe emọ rẹ Izrẹl, o de fovwo Devid vwọ kpahe ayen nẹ, yanran re kere Izrẹl vi Juda.

²Etiyin Ovie da ta kẹ Joab vẹ inotu rẹ ofovwi rọye, re vọye gba herọ, yan nene orua rẹ Izrẹl ejobi, nẹ Dan re te Beersheba we kere ihwo na, rere me riẹn uche ihwo re herọ.

³Ẹkẹvuọvo Joab da ta kẹ ovie E jẹn Ọrovwohwo rẹ Ọghẹnẹ phi ba ihwo na asakon ujori kerẹ ọtiọbo rayen bute rẹ ẹro rẹ ọrovwovwe ovie mrẹ na, ẹkẹvuọvo die sorọ rẹ ọrovwovwe ovie vwọ guọnọ emu nana?

⁴Ẹkẹvuọvo ota rẹ ovie de gbe ọ ri Joab kugbe inotu rẹ ofovwi rọye phihọ otọ. Etiyin Joab vẹ inotu na da yanran nẹ obaro rẹ ovie re kere ihwo rẹ Izrẹl.

⁵Ayen da shariẹ Jọdan ayen de mu phihọ nẹ Aroer nẹ orere rọ uherevie rẹ iyara kpo ẹbẹre ri Gad kpo Jazer.

⁶Etiyin ayen de rhi te Giliad vẹ Kadẹsh vwẹ otọ ri Hẹt ayen de rhi te Dan, ayen da yan riariẹ Sodon,

⁷ayen da rhe ogba rẹ ofovwi ri Taya rhi te irere ejobi ri Hiv kugbe Kenan, ayen da rha yanran kpo Nẹgẹb ri Juda vwẹ oma ri Bẹẹrshẹba.

⁸Ọke rẹ ayen vwọ yan nene otọ na ejobi re nu, ayen da rhe Jerusalẹm vwẹ oba rẹ emeranvwe irhiri kugbe ẹdẹ uje.

⁹Joab da vwẹ uchunu rẹ ihwo na vwọ kẹ ovie; Vwẹ evun rẹ Izrẹl ọ da dia odu ẹrenre rẹ inotu ri phi ofovwi; Eshare ri Juda da dia odu ẹrenre.

¹⁰Ẹwẹn ri Devid de rhi kpokpo ro vwo kere ihwo na nu. Devid da rhe ta kẹ Ọrovwohwo, Mi ru imwemwu rhuarho vwẹ obo mi ruru na. Asakiephana Ẹ Ọrovwohwo, Me rẹ wẹ, si orukuruku rẹ odibo wẹn nu; fikiridie mi ru emu rẹ ẹkpa.

¹¹Devid vwo vrẹn vwẹ irhiọke, ota rẹ Ọrovwohwo de bru ọmraro Gad rhe, ọmrẹ ri Devid, ọ da ta,

¹²yanran ra ta kẹ Devid, Ẹtiọna Ọrovwohwo tare, Me vwẹ emu erha kẹ wẹ; jẹn ọvo re Me vwọ kẹ wẹ na reyọ, re mi vwo ru we.

¹³Ọye Gad de bru Devid ọ da ta kẹ, Ọwẹvwe rẹ ẹgbukpe erha bru we rhe otọ wẹn? Yẹrẹ wọ djẹ kẹ ivwighrẹ wẹn emeranvwe erha ayen da vwọ tua wẹ? Yẹrẹ ọga rẹ ẹdẹ erha rọ rhe otọ wẹn? Asakiephana roro wọ jẹn Me mrẹ ẹkpahọ mi vwo hirhe bru ọ ro ju vwe rhe.

¹⁴Etiyin Devid da ta kẹ Gad, Mi hẹ evun rẹ ukpokpoma rode; ju vwe she phihọ obọ rẹ Ọrovwohwo, kidie ehrọre rọye ọrhuarho; ẹkẹvuọvo wo ju vwe she phihọ obọ rẹ ohwo rẹ akpọ-ọ.

¹⁵Ọye Ọrovwohwo de ji ọga bru ihwo Izrẹl nẹ irhiọke re te ọke rọ tare; ihwo ri ghwuru ni Dan re te Bẹẹrshẹba da dia uriori ujorha gbe ihwe.

¹⁶Ọke rẹ amakashe na cha vwọ riẹn obọ kpo Jerusalẹm rọ vwọ guọghọ, Ọrovwohwo da rhẹriẹ nẹ emu ọbrabra rọ guọnọ ru, ọ da ta kẹ amakashe rẹ o ru iruo rẹ ẹghwọrọ vwẹ ohri rẹ ihwo na, o teri; Asakiephana gba da obọ ji. Yẹ amakashe rẹ Ọrovwohwo na hẹ oma rẹ uwevwi rẹ Aruanah rẹ ohwo ri Jebu.

¹⁷Etiyin Devid da ta kẹ Ọrovwohwo vwẹ ọke rọ vwọ mre amakashe ro hwe ihwo na, ọ da ta, Nighe mi ru imwemwu, mi ru imwemwu, mi ru o re brare gangan, ẹkẹvuọvo igodẹ nana, die ayen ruru? hwe vwe vẹ uwevwi rẹ ọsẹ mẹ Me rẹ wẹ.

¹⁸Gad da rhe ẹdẹ yena bru Devid, ọ da ta kẹ, Yanran kpenu wọ tọn agbada phihọ kẹ Ọrovwohwo vwẹ asan uwevwi rẹ ewunye rẹ Araunah ohwo ri Jebu.

¹⁹Etiyin Devid yanran kere obo ri Gad tare na, rẹ Ọrovwohwo tare.

²⁰Araunah vwo nẹ otọ, ọ da mrẹ o vẹ idibo rọye ri bro cha; Araunah da yanran re yere ovie vẹ opharo rọ bọvwọ rhuo otọ.

²¹Araunah da ta, Fikiridie ọrovwovwe ovie vwo bru odibo rọye rhe? Devid da ta, Me rhe dẹ asan rẹ ewunye wẹn re me tọn agbadaizobo kẹ Ọrovwohwo siẹnẹ ọga vwo nẹ oma rẹ ihwo

²²Araunah da ta kẹ Devid, Jẹn ọrovwovwe reyọ rọ torhẹ izobo obo ro jere, irhuẹn vwọ torhẹ izobo na, vẹ ekpẹrẹ vẹ irhuẹn vwọ ghwa irhe kẹ ena.

²³Enana ejobi Ovie, eye Araunah vwọ kẹ ovie. Araunah da kẹ ovie, Ọrovwohwo rẹ Ọghẹnẹ reyọ owẹ.

²⁴Ẹkẹvuọvọ ovie da ta kẹ Araunah, Ẹjo, me dẹ mie we; Mi se ze izobo rẹ ẹtorhẹ kẹ Ọrovwohwo rẹ Ọghẹnẹ mẹ ọphẹ-ẹ; Ọye Devid da dẹ asan re de wunye kugbe irhuẹn na shẹkẹi ujuvẹ gbe ihwe rẹ idọnọ.

²⁵Devid da so agbada phihọ etiyin kẹ Ọrovwohwo, o de ze izobo rẹ ẹtorhẹ vẹ ọ rẹ ufuoma kẹ. Ọye Ọrovwohwo da rhọvwe orẹ vwọ kẹ otọ na, o de si ọga na nẹ Izrẹl.