Read urhobo 2 Samuẹl 3 Bible Online

2 Samuẹl 3 - urhobo bible

2 Samuẹl 3

¹Ofovwi okrekri da rhe dia vwẹ uwevwi ri Sọl vẹ uwevwi ri Devid; Devid da rhe goma phihọ jẹ uwevwi ri Sọl rha vwiẹrẹ phihọ.

²Devid de vwiẹ emọ buebu vwi Hebrọn; ọmọkpako rọye da dia Amọn, ri Ahinoam rẹ ohwo ri Jezrẹẹl vwiẹ kẹ;

³Ọrivẹ, Chileab, ri Abigail ayeuku rẹ Nabal ohwo ri Kamẹl vwiẹ kẹ; Ọrerha, Absalọm ọmọ ri Maakah ọmọtẹ ri Talmail rẹ ovie ri Gẹshur;

⁴Ọrẹne, Adonijah ọmọ ri Haggit; ọriyori, Shephatiah, ọmọ ri Ahital;

⁵ọrẹsan, Itream, rẹ Eglah, aye ri Devid. E vwiẹ enana kẹ Devid vwi Hebrọn.

⁶Rẹ ofovwi vwọ hẹ uwevwi ri Sọl vẹ uwevwi ri Devid re, Abner de rhi ru oma rọye gan vwọ kẹ uwevwi ri Sọl.

⁷Ọke yena Sọl vwo ọnse, re se nẹ Rizpah, ọmọtẹ ri Aiah; Ishboshet da ta kẹ Abner, Die sorọ wọ vẹ ọnse rẹ ọsẹ mẹ vwọ rọvwọn?

⁸Ota rẹ Ishboshet na de mu Abner ophu gangan, ọ da ta, Mẹvwẹ uyovwi rẹ eranko ri Juda? Rhi te nonẹ na mi mu ọghọ kẹ uwevwi ri Sọl rẹ ọsẹ wẹn, te iniọvo rọye rẹ eshare, kugbe igbeyan rọye, mi se phi we phihọ obọ ri Devidi-i, ju wọ haro vwẹ ota kpahe aye nana.

⁹Ọghẹnẹ ru ọtiọye kẹ Abner, ọ rọ jẹ nẹ ọtiọye rhe, mi gbi ru kẹ Devid kirobo rẹ Ọrovwobwo veri nẹ ọye ru kẹ-ẹ;

¹⁰ne wene uvie rẹ uwevwi ri Sọl, ra vwẹ uvie ri Devid mu vwẹ Izrẹl vi Juda, ni Dan re te Biẹshẹba.

¹¹Ishboshet gbe sa kpahe ota kẹ Abner ọfa-a, fikiridie ọ djẹ oshọ rọye.

¹²Abner de ji ikọn bru Devid vwi Hebrọn, tanẹ, Ono vwo otọ na? Yarhe rere a re ọphọ; nighere, me vẹ owẹ dia obọ re me họnre kẹ wẹ vwọ reyọ ihwo rẹ Izrẹl ejobi rhe we.

¹³Etiyin ọ da ta, Ọyoma; me vẹ owẹ re ọphọ; ẹkẹvuọvo me guọnọ emu ọvo vwẹ obọ wẹn; emu na kẹ ọna, wọ mrẹ opharo mẹ-ẹ jokpa nẹ wọ vwẹ Mikal, ọmọtẹ ri Sọl rhe, kọye wọ mrẹ opharo mẹ.

¹⁴Etiyin Devid de ji ikọn bru Ishboshet rẹ ọmọ ri Sọl, nẹ, Kẹ vwẹ Mikal rẹ aye mẹ, re me vwẹ upheruphe ujori ri Filistia vwọ ga ẹga rọye.

¹⁵Ishboshet de ji ikọn ra reyọ mie ọshare rọye Paltiẹl ọmọ ri Laish.

¹⁶Ẹkẹvuọvo ọshare rọye da viẹ nene yanran vwẹ idjerhe ejobi re te Bahurim. Abner da ta kẹ, Rhivwi, etiyin o de rhivwi.

¹⁷Abner vẹ ekpako rẹ Izrẹl da jẹ iroro tanẹ, Ọkeọvo rọ wanre wa guọnọ Devid nọ re uvie vwẹ enu rẹ ovwa-an.

¹⁸Asakiephana gbe jọ dia ọtiọye; kidie Ọrovwohwo ve kẹ Devid, tanẹ, Vwẹ obọ rẹ odibo mẹ Devid mi de sivwi ihwo mẹ Izrẹl nẹ obọ ri Filistia, kugbe obọ rẹ ivwighrẹn rayen.

¹⁹Abner da ta ota kẹ Bẹnjamin; ọye Abner de bru Devid ra ta kẹ vwẹ Hebrọn emu esiri ejobi rẹ Izrẹl vẹ uwevwi ri Bẹnjamin rori nẹ ayen ru.

²⁰Ọke rẹ Abner vẹ ihwo uje vwo bru Devid rhe Hebrọn; Devid de chere emu vwọ kẹ Abner vẹ ihwo ri nenire rhe.

²¹Abner da ta kẹ Devid, Mi vrẹn me yanran re koko ihwo rẹ Izrẹl kẹ ọrovwovwe ovie, rere ayen vẹ owẹ re ọphọ, rere wọ re uvie vwọ enu rẹ ihwo ejobi rẹ ẹwẹn wẹn guọnọre. Devid de siobọ nẹ Abner yanran, ọ yanran vwẹ ufuoma.

²²Ọmọke yena idibo ri Devid vi Joab de nẹ ugborho rhe, vẹ ekuakua buebu rayen ghwẹ rhe. Ẹkẹvuọvo Abner vi Devid gbi Hebọni-i, kidie ọ ta kẹ nẹ o kpo, ọ da yanran vẹ ufuoma.

²³Ọke ri Joab vẹ utuofovwi rọye vwọ rhe, etiyin a da ta kẹ nẹ Abner rẹ ọmọ ri Ner bru ovie rhe, ọ da rhọvwe nẹ o kpo, ọ da rhoma kpo vẹ ufuoma.

²⁴Abner de bru ovie ọ da ta, Die wo ruru na? Nighere Abner bru we rhe; die sorọ wọ vwọ rhọvwe nẹ o kpo, ro de ghine kpo?

²⁵Wọ riẹnre nẹ Abner ọmọ rẹ Ner rhere rhe phiẹn wẹ, vwọ mrẹ obo wọ epha.

²⁶Ọke ri Joab ghwe vwo nẹ asan ri Devid epha nu o de ji ikọn nene Abner, ikọn na da vwa vwẹ asan orhare ri Sirah. ẹkẹvuọvo Devid riẹnre-e.

²⁷Abner ri vwo hirhe te Hebrọn, Joab de se phihọ akakọ kpo ughere rere ọbẹbẹ nene ta omota, etiyin o de duvwo evun o de ghwu, fiki rẹ ọbara rẹ Asahẹl rẹ oniọvo rọye.

²⁸Ukuko rọye ri Devid rhi vwo nyo, Ọ da ta, Mẹvwẹ vẹ uvie mẹ re ase rẹ ọbara rẹ Abner rẹ ọmọ rẹ Ner vwẹ obaro rẹ Ọrovwohwo bẹdẹ.

²⁹Jọ dia uyovwi ri Joab vẹ evwruwevwi rẹ ọsẹ rọye, e jẹn ozighẹ karo uwevwi ri Joabu-u, eyẹ ọhonvwoti, ohwo rọ ghworo rọ vwẹ ọkpọ yan, yẹrẹ ohwo ra vwẹ ọlọkọ hwe, eyẹ ogbere kare uwevwi ri Joabu-u.

³⁰Joab vẹ Abishai rẹ oniọvo rọye hwe Abner fikiridie o hwe oniọvo rayen Asahẹl vwẹ ofovwi ri Gibiọn.

³¹Etiyin Devid da ta kẹ Joab kugbe ihwo re vọye gba herọ, Bẹrẹ emwa rẹ ovwan rere we ku esiso phihọ rere we muomahọ kẹ Abner. Devid de nene orivwi na.

³²E de shi Abner phihọ Hebrọn. Etiyin Devid da viẹ vwẹ asan ushi ri Abner, ihwo na ejobi da je viẹ.

³³Ovie de vwerhe oma kẹ Abner ọ da ta, Abner ghwuru kerẹ ẹkpa?

³⁴A gba obọ wẹ-ẹ, yẹrẹ a vwẹ ọjọrọn karọ owọ wẹ-ẹ, kirobo rẹ ohwo she phihọ obọ rẹ ihwo umwemwu wo sheri. Ihwo na ejobi da viẹ kẹ.

³⁵Eriyin ihwo na ejobi da rhe nẹrhẹ Devid nẹ ọ re emu rẹ ọke ki rhi kpo; ẹkẹvuọvo Devid de duvwu iyori ọ da ta, E jẹn Ọghẹnẹ ru ọtiọye kẹ vwẹ, ọ rọ fiki nọ ọtiọye, ọ da dianẹ me re emu yẹrẹ mi ru emu ọfa, bẹsiẹ rẹ ọnre vwọ ruotọ.

³⁶Ihwo na ejobi de rhi no so, o de je ayen; kidie kemu kemu rẹ ovie ruru ejobi je ihwo na.

³⁷Fiki rẹ ihwo na ejobi kugbe Izrẹl ejobi da riẹn vwẹ ẹdẹ yena, nẹ ọ dia ovie ri hwe Abner rẹ ọmọ ri Nẹr.

³⁸Ovie da ta kẹ idibo rọye nẹ, Wa riẹnre nẹ osun kugbe okpohwo ri ghwuru vwẹ Izrẹl nonẹ na?

³⁹Owenẹ a vwẹ ovwẹ mu ovie dede, oma ghwọrọ ovwẹ nonẹ na. Ihwo nana rẹ emọ ri Zeruyah na ganọ kẹ vwẹ. Ọrovwohwo hwosa kẹ ohwo ro ru obo re brare kerẹ ọtiobo rẹ umwemwu rọye epha.