Read urhobo 2 Samuẹl 4 Bible Online

2 Samuẹl 4 - urhobo bible

2 Samuẹl 4

¹Ọke rẹ Ishboshet ọmọ ri Sọl, rhe vwo nyo nẹ Abner ghwuru vwi Hebrọn oshọ de muo vẹ Izrẹl ejobi.

²Ọke yena ọmọ ri Sọl vwo ihwo ivẹ re dia olori rẹ ofovwi ro vwo ogangan rẹ imu. Odẹ rẹ ọvo Baanah, ọrivẹ Rekab, emọ ri Rimmọn ohwo ri Bẹnjamin ro nẹ Beerot rhe (fikiridie e kere Beerot kugbe Bẹnjamin.

³Ihwo ri Beerot da djẹ kpo Gitaim, ayen kẹ ihwo re kuarhe rhe dia Etiyin rhi duvwu nonẹ na).

⁴Jonatan, ọmọ ri Sọl de vwo ọmọ ọvo rẹ owọ dare. Ọ te ẹgbukpe iyori rẹ usi rẹ ọsẹ rọye rode, Sọl, vi Jonatan rẹ ọsẹ rọye, vwo ni Jezreel rhe; etiyin ohwo rọ vwẹ ẹro te de muo ọ vọye da djẹ; o vwo bru okpakpa djọnẹ yanran, ọmọ na de she, o de rhi hirhe phihọ ukpono. Odẹ rọye Mefiboshet.

⁵Ọke yena, emọ ri Rimmọn ri Beerot, Rikab kugbe Baanah da yanran ọke rẹ uvo vwọ rhọvwa gan ayen de rhi te uwevwi ri Ishboshet, ro vwo sherhẹ vwẹ oghẹruvo.

⁶Nighere ohwo rọ rhẹrẹ anurhoro rẹ uwevwi na ra sanọ ọka, ovwerhẹ ko suo o de sherhẹ. Etiyin Rekab kugbe Baamah rẹ oniọvo rọye rẹ ọshare da bẹbẹ ro uwevwi na.

⁷Ọke rẹ ayen vwọ ro evun rẹ uwevwi, o shevwerhẹ ehwa vwẹ evun rẹ uvun rọye, ayen de hwe, ayen da nyavwe uyovwi rọye, ayen da wan idjerhe rẹ Araba vwẹ ason,

⁸ayen da reyọ uyovwi rẹ Ishboshet vwo rhe Devid vwi Hebrọn. Ayen da ta kẹ ovie, Uyovwi rẹ Ishboshet na, ọmọ ri Sọl, ọvweghrẹ wẹn, rọ guọnọ owẹ hwe; Ọrovwohwo reihri kẹ ọrovwovwe ovie nonẹ na vwẹ oma ri Sọl vẹ emọ rọye.

⁹Ẹkẹvuọvo Devid da kpahe ọ da ta kẹ Rikab vẹ Baanah rẹ oniọvo rọye, emọ ri Rimmọn ohwo ri Beerot, Kerẹ ọtiobo rẹ Ọrovwohwo herọ rọ tan vwẹ nẹ obọ rẹ ivwighrẹ,

¹⁰ọke rẹ ohwo ọvo vwọ ta kẹ vwẹ nẹ Sọl ghwuru, ayen vwo roro nẹ omamọ rẹ iyẹnrẹn ayen ghwarhe, me da yọnrọn mi de hwe vwi Ziglag, ayen rori nẹ me cha hwa osa kẹ ayen vwẹ iyẹnrẹn rọ ghwarhe.

¹¹Mavọ ọ rho te rẹ ihwo umwemwu de hwe ohwo ọvwata vwẹ evun rẹ uwevwi rọye vwẹ ehwa rẹ obọ rọye? Me gbe reyọ ọbara rọye vwẹ obọ rẹ ovwan? mi gbi si ovwan nẹ otọ rẹ akpọ na?

¹²Devid da ta kẹ ihwo rọye nẹ e hwe ayen, nẹ bru abọ rayen vẹ awọ rayen re churu ayen si vwẹ oma rẹ ẹtẹrhe vwi Hebrọn. Ẹkẹvuọvo ayen da reyọ uyovwi rẹ Ishboshet, ayen de sho phihọ ushi rẹ Abner vwi Hebrọn.