Read urhobo 2 Samuẹl 7 Bible Online

2 Samuẹl 7 - urhobo bible

2 Samuẹl 7

¹Vwẹ ọke nana rẹ ovie rhe vwọ dia uwevwi rọye, rẹ Ọrovwohwo vwọ vwẹ ufuoma kẹ nẹ obọ rẹ ivwighrẹ rọye re riarierẹ phihọ nu,

²ovie na da ta kẹ Natan rẹ ọmraro rẹ Ọghẹnẹ, Nighere asakiephana me dia uwevwi rẹ igẹun ẹkẹvuọvo ekpeti rẹ Ọghẹnẹ dia utughẹ.

³Natan da ta kẹ ovie, Yanran re ru obo re hẹ udu wẹn ejobi, kidie Ọrovwohwo vẹ owẹ herọ.

⁴Ẹkẹvuọvo vwẹ ason yena ọvuọvo na ota rẹ Ọrovwohwo de bru Nathan rhe,

⁵Yanran ra ta kẹ odibo mẹ Devid, Ọtiọna Ọrovwohwo tare; Wọ bọn uwevwi kẹ vwẹ dia?

⁶Me je dia uwevwi rhawọke me vwọ reyọ ihwo mẹ Izrẹl nẹ otọ rẹ Ijipt rhe rhi te nonẹ na-a, ẹkẹvuọvo Me yan vwẹ utughẹ.

⁷Vwi kasan kasan re Me vẹ emọ rẹ Izrẹl yan te, Me ta ota kẹ iguẹdjọ rẹ Izrẹl dẹvo-o re Me tanẹ i sun ihwo mẹ Izrẹl, nẹ Die wọ rha bọn uwevwi rẹ igẹdu kẹ vwẹ-ẹ?

⁸Asakiephana, fiki rẹ ọtiọye, ọtiọna wọ ta kẹ odibo mẹ Devid, Ọtiọna Ọrovwohwo rẹ ofovwi tare, Mi si we nẹ aghwa rhe ru wo de sun igegede re wọ rhe re ovie vwẹ enu rẹ ihwo mẹ Izrẹl;

⁹Me vẹ owẹ da herọ vwi kasan kasan wọ rare ejobi, Me da djẹ ivwighrẹ wẹn na we oma; Mi ru odẹ wẹn rho, kerẹ odẹ rẹ ihwo re rhoro vwẹ akpọ na.

¹⁰Ke vwẹ ẹdia kẹ ihwo mẹ Izrẹl, ke Me vwẹ owọ rayen muotọ, kẹ ayen dia asan rayen, e gbi rhe kpokpo aye-en, ihwo okpetu gbi ru ayen oja ọfa-a, kirobo re ru ayen dẹvure.

¹¹Nẹ ọke re Me vwọ vwẹ iguẹdjọ mu ni gbe sun ihwo mẹ Izrẹl, mi de ru we nẹ wo vwo ufuoma nẹ obọ rẹ ivwighrẹ wẹn, Ọrovwohwo je ta kẹ wẹ nẹ ọye vwẹ uwevwi kẹ wẹ.

¹²Ọke rẹ ẹdẹ wẹn da ghare, re de shi we kugbe esẹ wẹn ke Me kpare ọmọ wẹn ro nẹ orhẹn wẹn rhe kpenu, ke Me vwẹ uvie rọye vwo mu.

¹³Kọ bọn uwevwi phihọ vwẹ odẹ mẹ ke Me vwẹ uvie rọye muotọ bẹdẹ.

¹⁴Ke Me dia ọsẹ rọye kọ rha dia ọmọ mẹ, o de ru umwemwu, ke Me vwẹ uphiephia rẹ ohwo rẹ akpọ vwọ fa.

¹⁵Ẹkẹvuọvo mi se sio nẹ otọ rẹ ẹguọnọ ro jẹrhẹriẹ mẹ-ẹ, kirobo ri mi ru Sọl ri mi si nẹ obaro mẹ.

¹⁶Uwevwi wẹn vẹ uvie wẹn vẹ ekete wẹn kọ dia bẹdẹ.

¹⁷Kerẹ ọtiobo rẹ eta nana ejobi epha vẹ aroẹmrẹ nana ọtiọye Natan ta kẹ Devid.

¹⁸Ẹtiyin ovie Devid da ro uwevwi o de tidia vwẹ obaro rẹ Ọrovwohwo, ọ da ta, Ono omẹvwẹ E Ọrovwohwo Ọghẹnẹ, didi emu uwevwi mẹ epha ru wọ da vwo vwẹ kpenu ọtiọna?

¹⁹Ọnana jẹn nẹ emu otete vwẹ obaro wẹn Ọrovwohwo Ọghẹnẹ, Wọ je ta ota kpahe oma rẹ uwevwi rẹ odibo wẹn, vwẹ ọke grogro rọ cha, wọ da rha vwẹ uvwiẹ rọ cha dia vwẹ ẹdẹfa vwọ nẹ vwẹ E Ọrovwohwo Ọghẹnẹl

²⁰Die ọfa Devid je sa ta kẹ wẹ? Kidie wọ riẹn odibo wẹn E Ọrovwohwo Ọghẹnẹ.

²¹Fiki rẹ iveve wẹn kerẹ ọtiobo rẹ ẹwẹn Wẹn epha, ọye wọ vwọ vwẹ emu ride nana ejobi phia kẹ odibo wẹn.

²²Fiki rẹ ọtiọye na Wọ rhọrọ E Ọrovwohwo Ọghẹnẹ; ohwo rọ họhọ owẹ herọ-ọ, Ọghẹnẹ ọfa herọ wan wẹ-ẹn, kirobo ma vwẹ erhọn nyo.

²³Didi orua ọvo vwẹ akpọ na họhọ ihwo wẹn Izrẹl, rẹ Ọghẹnẹ yanran ra tan hirhe phihọ ihwo rọye, re o vwo re odẹ kẹ oma rọye, ro ru emu rọ rhoro, ro muoshọ, rọ vwọ djẹ ihwo vẹ edjọ rayen nẹ obaro rẹ ihwo rọye?

²⁴Wọ da vwẹ ihwo wẹn Izrẹl mudia bẹdẹ; Wẹ E Ọrovwohwo wo de hirhe phihọ Ọghẹnẹ kẹ ayen.

²⁵Asakiephana, E Ọrovwohwo rẹ Ọghẹnẹ ru iveve wẹn gan bẹdẹ vwọ kẹ odibo wẹn kerẹ ọtiobo wọ tare kpahe uwevwi rọye, gbe ru kirobo wọ tare.

²⁶Ke ru odẹ wẹn rho bẹdẹ ra tanẹ, Ọrovwohwo rẹ Ofovwi ọye Ọghẹnẹ ro sun Izrẹl, kugbe uwevwi rẹ Odibo wẹn Devid ko ghwotọ bẹdẹ.

²⁷Fiki wẹn E Ọrovwohwo rẹ ofovwi Ọghẹnẹ rẹ Izrẹl, vwe rọ phia kẹ odibo wẹn nẹ, Me bọn uwevwi kẹ wẹ, fiki rẹ ọtiọye kọye odibo wẹn vwo yivwaro nẹ ẹrhovwo nana kẹ wẹ;

²⁸Asakiephana E Ọrovwohwo Ọghẹnẹ, wẹ ọye Ọghẹnẹ, ota wẹn uyota, wo de rhe kẹ odibo wẹn emu esiri nana.

²⁹Asakiephana gbe jẹn oma vwerhe owẹ wo phi ẹrhovwo phihọ uwevwi rẹ odibo wẹn rọ dia bẹdẹ vwẹ obaro wẹn; kidie wẹ Ọrovwohwo Ọghẹnẹ re tarọ, jẹn uwevwi rẹ odibo wẹn vwo ẹrhovwo bẹdẹ.