Read urhobo 1 Ivie 10 Bible Online

1 Ivie 10 - urhobo bible

1 Ivie 10

¹Asakiephana rẹ ovie rẹ aye ri Sheba vwo nyo usi ri Solomọn kpahọ odẹ rẹ Ọrovwohwo, ọ da rhe vwẹ enanọ egangan vwọ davwọ.

²Ọ vẹ usun rode gbrigbrigbri gbe rhi te Jerusalẹm, ọ vẹ kamẹl re ghwa ogẹn, kugbe oro buebu, vẹ ibieragha eghaghare; ọke ro rhi vwo te asan ri Solomọn, ọ da ta obo rẹ hẹ udu rọye ejobi kẹ.

³Solomọn da kpahe phihọ enanọ rọye ejobi; o vwo emu ọvuọvo rọ djahere rẹ ovie jẹ ta kẹ-ẹ.

⁴Ọke rẹ ovie rẹ aye ri Sheba na rhe vwọ mrẹ ẹghwanre ri Solomọn nu, uwevwi rọ bọnre,

⁵emu rọ ria vwẹ imẹjẹ rọye, obo rẹ idibo rọye tẹrẹ urhiẹ wan, obo rẹ idibo rọye vwẹ ẹro te ihwo wan, emwa rẹ ayen rhuo, otu ri muẹ iko rẹ idi, kugbe izobo rẹ ẹtorhẹ ro ze vwẹ uwevwi rẹ Ọrovwohwo na, udu de no awọ.

⁶Ọ da ta kẹ ovie na, Iyẹnrẹn rẹ obo ru wo ruẹ vẹ ẹghwanre wẹn ri mi nyori vwẹ obo otọ mẹ na uyota,

⁷ẹkẹvuẹvo mi se iyẹnrẹn na gbuyota-a tavwe me ke rhe na ibiẹro mẹ ghine mrẹre; gbe, nighere, ubro rẹ ikun na e gbe kẹ vwẹ; ẹghwanre wẹn vẹ oyouvwe wẹn rho nọ ikun ri mi nyori.

⁸Aghọghọ kẹ eya wẹn. Aghọghọ kẹ idibo wẹn nana, re vwẹ kọke kọke mudia vwẹ obaro wẹn ri nyo ẹghwanre wẹn.

⁹Ebruba kẹ Ọrovwohwo Ọghẹnẹ wẹn, rẹ ivun wẹ vwerhere rọ da vwẹ owẹ tidia ekete rẹ Izrẹl. Fikiridie Ọrovwohwo guọnọ Izrẹl bẹdẹ, kọye ọ vwọ vwẹ owẹ mu ovie, rere wo vwo brorhiẹ rẹ ọsoso vẹ ọvwata.

¹⁰Etiyin ọ da vwẹ talẹnt ujosan rẹ oro vwọ kẹ ovie, kugbe egẹn buebu, vẹ ibieragha eghaghare; egẹn obuebu tiọnana rhe bru ovie Solomọn rhe ọfa-a nọ ọ rọ ovie rẹ aye ri Sheba na vwọ kẹ-ẹ.

¹¹Ọ rọ marho usun rẹ ekpo ri Hiram, re ghwa oro nẹ ọfa cha, da je ghwa igedu buebu kugbe ibieragha eghaghare nẹ ọfa rhe,

¹²Igedu na kọye ovie vwo ru egbẹn re vwo vi uwevwi rẹ Ọrovwohwo na, kugbe uwevwi rẹ ovie na, ekpata vẹ isorogun vwọ kẹ otu re soine; a gbe mrẹ igedu etiọye-e eyẹ etiọye gbi bro rhe ọfa-a, rhi te ẹdẹ ri nonẹ na-a.

¹³Ovie Solomọn da kẹ ovie aye ri Sheba na obo rọ guọnọre ejobi, kemu kemu rọ nọre vwọ ba ọye Ovie Solomọn vwo ru ẹse kẹ. Ọtiọye o de kuoma rhẹriẹ o de rhivwi kpo otọ rọye, vẹ idibo rọye.

¹⁴Asakiephana ovwanvwọn rẹ oro ro bru Solomọn rhe ẹgbukpe ọvo da dia talẹnt rẹ oro ujori esan gbẹ ujorha gbẹ esan,

¹⁵vwọ ba iri nẹ obọ rẹ ineki na rhe kugbe obo ri nẹ oghwa rẹ eki rhe, ji nẹ obọ rẹ ivie rẹ Arebia kugbe isun rẹ otọ na.

¹⁶Ovie Solomọn de duvwu ekpọfia rẹ oro ujori ivẹ; shẹkẹl ujori esan rẹ oro eye e vwo duvwu ekpọfia ọvuọvo.

¹⁷O de duvwu ekpọfia ujori erha ra vwẹ ororo duvwu; ovwanvwọn rẹ oro shẹkẹl ujori gbe ujuvẹ gbe ihwe ọye e vwo duvwu ekpọfia ọvuọvo; ovie de phi ayen phihọ Uwevwi rẹ Egbo ri Lẹbanọn.

¹⁸Ovie na da je kanre ekete rode rẹ Akeni, ọ da vwẹ omamọ rẹ oro vwo pharọ.

¹⁹Ekete na de vwo ichihi esan, obuko rẹ ekete na uyovwi rẹ ọmọ rẹ erhuẹn da herọ, vwẹ abọ ọvuọvo rẹ ekete na asan ra ghwẹ abọ kpaha herọ, ikpohrokpo ivẹ da hẹ akakọ rẹ asan

²⁰jẹ ikpohrokpo ihwivẹ mudia etiyin; ọvo ọ hẹ obo oba rẹ ichihi ọvuọvo vwẹ enu rẹ ichihi esan na. E ji ru oghẹre yena vwẹ uvie ọfa dẹvo-o.

²¹Iko ejobi rẹ Ovie Solomọn vwọ da udi oro e vwo ru ayen, ekuakua ejobi re hẹ Uwevwi rẹ Egbo ri Lẹbanọn omamọ rẹ oro e vwo ru ayen; a vwẹ idọnọ efuanfon duvwu ọvuọvo-o, e sere gbe emu ọvuọvo vwẹ ọke ri Solomọni-i.

²²Kidie ovie vwo usun rẹ ekọ ri Tarshish vwẹ obo abadi kugbe usun rẹ ẹko ri Hiram. Ẹsiẹvo vwẹ ẹgbukpe erha ọye usun rẹ ekọ ri Tarshishi cha e me ghwa oro, idọnọ efuanfon, akeni, okpe, kugbe ogbodu.

²³Kẹnẹ Ovie Solomọn vwọ nọ ivie rẹ akpọ na ejobi vwẹ efe kugbe aghwanre.

²⁴Akpọ na ejobi ke guọnọ opharo ri Solomọn mrẹ rere ayen vwo nyo aghwanre rọye, rẹ ọfuanfon phi phihọ udu rọye.

²⁵Kuohwo rọ cha kuọko rọ phare rhe, ekuakua rẹ idọnọ efuanfon vẹ oro, iwun, adjija, egẹn, iyesi, vẹ irhuẹn, buebu kukpe kukpe.

²⁶Solomọn da ghwẹ ekpẹrẹ ofovwi koko kugbe ihwo re gua iyesi; o de vwo ekpẹrẹ rẹ ofovwi ujori ihwẹne kugbe ihwo re gua iyesi uriori ihwivẹ, rọ ghare phihọ irere rẹ ekpẹrẹ vẹ ovie hẹ Jerusalẹm.

²⁷Ovie na de ru idọnọ efuanfon kueku kerẹ ibiẹragha vwi Jerusalẹm, o de rhe ru igẹdu kueku kerẹ sikamọ ri Shephẹlah.

²⁸Kẹ obo Ijipt vi Kue ọye a da ghwa iyesi rhe Solomọn, ineki rẹ ovie me dẹ ayen mie ihwo ri Kue oka rẹ unu ọvo.

²⁹A sa dẹ akpẹrẹ rẹ ofovwi ọvo nẹ Ijipt rhe shẹkẹl rẹ idọnọ efuanfon ujori esan, iyesi ke rha vwẹ ujori gbe ujuvẹ gbe ihwe; vwẹ obọ rẹ ineki rẹ ovie keye e wan te obo rẹ ivie rẹ ihwo ri Hẹt kugbe ivie ri Siria.