Read urhobo 1 Ivie 12 Bible Online

1 Ivie 12 - urhobo bible

1 Ivie 12

¹Rehoboam de kpo Shikẹm, kidie Izrẹl ejobi kpo Shikẹm ra reyọ vwọ ma ovie.

²Ọke ri Jeroboam ọmọ ri Nebat vwo nyo (kidie ọ je hẹ Ijipt, obo rọ djẹ ra fiki ri Solomọni), etiyin Jerọboam de rhivwi nẹ Ijipt rhe.

³Ayen de ji ohwo re se; Jeroboam vẹ ọghwẹgbe rẹ Izrẹl na ejobi da rhe re ta kẹ Rehoboam,

⁴ọsẹ wẹn kru oghwa ọhọhọ nyẹ avwanre. Asakiephana gbe ru iruo ọgangan rọye na kugbe oghwa ọhọhọ rọye na pharhe kẹ avwanre, avwanre ke ga wẹ.

⁵Ọ da ta kẹ ayen, We kpo ẹdẹ erha kẹ ovwan rhoma bru uvwe rhe. Ọtiọye na ihwo na da yanran kpo.

⁶Etiyin ovie Rehoboam vẹ ekpako na da jẹ iroro, ihwo re vẹ Solomọn ọsẹ rọye gba herọ vwẹ ọke rọ vwọ hẹ akpọ, tanẹ, Die wa nẹ vwẹ ne me kpahe kẹ ihwo nana?

⁷Ayen da ta kẹ, Wọ da sa dia odibo kẹ ihwo nana nonẹ wọ da ga ayen, re wọ da ta ota esiri kẹ ayen vwẹ ọke ru wọ da kpahe kẹ ayen na, etiyin kẹ ayen dia idibo wẹn bẹdẹ.

⁸Ẹkẹvuọvo ọ da sen iroro rẹ ekpako na jẹ kẹ, ọ vẹ imighele re vẹ ọye gba hẹ otu ri gbe odibo kẹ da jẹ iroro.

⁹Ọ da ta kẹ ayen, Die wa nẹ vwẹ ne me kpahe kẹ ihwo nana re ta kẹ vwẹ nẹ, Ru oghwa rẹ ọsẹ wẹn kru nyẹ avwanre pharhe kẹ avwanre?

¹⁰Imighele na re vẹ ọye gba hẹ otu na da ta kẹ, Enẹ wọ ta kẹ ihwo nana re ta kẹ wẹ nẹ, ọsẹ wẹn kru oghwa ọhọhọ nyẹ avwanre, ẹkẹvuọvo ku wo ruo pharhe kẹ avwanre; Enẹ kọye wọ ta kẹ ayen, Urhiabọ rẹ otete mẹ na che vwọ ọkpan nẹ ehu rẹ ọsẹ mẹ.

¹¹Asakiephana, rẹ ọsẹ mẹ vwo kru oghwa ọhọhọ nyẹ ovwan na, ke Me rha vwọ ba oghwa rẹ ovwan. Uphiaphiẹ ọye ọsẹ mẹ vwọ fa ovwan, ẹkẹvuọvo ke me vwẹ akpakpasimagha vwọ fa ovwan.

¹²Ọtiọye Jeroboam vẹ ihwo na ejobi de bru Rehoboam rhe vwẹ ẹdẹ re erha, kirobo rẹ ovie tare, Rhivwi rhe vwẹ ẹdẹ re erha.

¹³Ovie na da kpahe ota waewae kẹ ihwo na, ọ sen iroro rẹ ekpako na jẹ kẹ,

¹⁴ọ da ta kẹ ayen kerẹ iroro rẹ imighele na jẹ kẹ, tanẹ, ọsẹ mẹ kru oghwa ọhọhọ nyẹ ovwan, ẹkẹvuọvo ke me vwọ ba oghwa na; uphiaphiẹ ọye ọsẹ mẹ vwọ fa ovwan, ẹkẹvuọvo akpakpasimagha kọye me rha vwọ fa ovwan.

¹⁵Ọtiọye na ovie rha davwerhọ rẹ ihwo na-a, kidie ọye obo rẹ Ọrovwohwo ruru rere ota rọye vwọ sẹ, rẹ Ọrovwohwo wan unu rẹ Ahijah ohwo ri Shilo ta kẹ Jeroboam ọmọ ri Nebat.

¹⁶Ọke rẹ Izrẹl ejobi vwọ mrẹ nẹ ovie na rha davwerhọ raye-en, ihwo na da kpahe kẹ ovie na, Didi ẹkẹn ri te avwanre vwẹ oma ri Devid? Avwanre vwo uku vwẹ oma rẹ ọmọ ri Jesse-e. ọ vuẹ uwevwi rọye ra, E Izrẹl, Gbe sun uwevwi wẹn ri Devid, na ọvo Ọtiọye na Izrẹl de kpo uwevwi rayen.

¹⁷Ẹkẹvuọvo Rehoboam de sun vwẹ enu rẹ ihwo rẹ Izrẹl re dia irere ri Juda.

¹⁸Etiyin Ovie Rehoboam de ji Adoram, onotu rọ gba ihwo vwo ru iruo, Izrẹl ejobi da vwẹ ibieragha vwo phio hwe. Ovie Rehoboam de pho ro akpẹrẹ rọye kpatakpata, ọ da djẹ kpo Jerusalẹm.

¹⁹Ọtiọye kọye Izrẹl vwo mukpahe uwevwi ri Devid rhi te nonẹ.

²⁰ọke rẹ Izrẹl ejobi vwo nyo nẹ Jeroboam rhivwi rhire, ayen de ji ohwo re se rhe ọghwẹgbe na ayen da vwọ ma ovie vwẹ enu rẹ Izrẹl ejobi. ọ gbi rhe vwo ọvuọvo ro nene uwevwi ri Devidi-i, jokpa rẹ uvwiẹ ri Juda na ọvo.

²¹Ọke ri Rehoboam rhi vwo te Jerusalẹm, o de se uwevwi ri Juda ejobi koko, kugbe uvwiẹ ri Bẹnjamin, ihwo uriori ujurhiri egba rẹ ofovwi rẹ asanọre, re e ra họnre uwevwi rẹ Izrẹl, rere ayen reyọ uvie na rhivwi rhe Rehoboam ọmọ ri Solomọn.

²²Ẹkẹvuọvo ota rẹ ọfuanfon de bru Shemaya rẹ ohwo rẹ ọfuanfon rhe:

²³Ta kẹ Rehoboam ọmọ ri Solomọn, ovie ri Juda, kugbe uwevwi ri Juda vi Bẹnjamin ejobi, kugbe ihwo ri chekọ,

²⁴Enẹ Ọrovwohwo tare, Wọ yanra-an eyẹ wọ ra họnre imoni wẹn ihwo rẹ Izrẹli-i. Rhivwi kpo dohwo duwevwi rọye kidie emu nana obọ mẹ o nurhe. Ọtiọye ayen de nyo ota rẹ Ọrovwohwo, ayen da yanran kpo, kirobo rẹ ota rẹ Ọrovwohwo epha.

²⁵Etiyin Jeroboam da bọn Shikẹm vwẹ obo orho rẹ ugbenu rẹ Ifrem, ọ da dia etiyin; o de rhe ne etiyin ra bọn Pẹnuẹl.

²⁶Jeroboam da ta vwẹ udu rọye, Asakiephana uvie na cha rhoma rhivwi kpo uwevwi ri Devid;

²⁷rọ da dianẹ ihwo na re ze izobo vwẹ uwevwi rẹ Ọrovwohwo rọ hẹ obo Jẹrusalẹm, etiyin udu rẹ ihwo nana ko che rhivwi bru ọrovwo ayen, Rehoboam ovie ri Juda kẹ ayen hwe vwe kẹ ayen rhivwi bru Rehoboam ovie ri Juda.

²⁸Ọtiọye na ovie na da jẹ iroro, o de duvwu umuomuo rẹ erhuẹn ivẹ rẹ oro. ọ da ta kẹ ihwo na, Ovwan kpo Jernsalẹm tere. Nighe ẹdjọ rẹ ovwan, E Izrẹl, rọ reyọ owẹ nẹ otọ rẹ Ijipt rhe.

²⁹Ọ da vwẹ ọvo vi vwi Bẹtẹl ọ da vwẹ ọrivẹ vi vwi Dan.

³⁰Ọnana de rhi hirhe phihọ umwemwu, kidie ihwo ẹvo kpo obi Bẹtẹl efa rhe kpo obi Dan.

³¹Ọ da je bọn iwevwi phihọ asan ro kpenu, ọ da vwẹ irherẹn mu vwẹ ohri rẹ ihwo na ejobi, rọ dia ihwo rẹ orua ri Livae-e.

³²Jeroboam de bru ẹdẹ phihọ ẹdẹ ihwiori rẹ orianre na kerẹ ẹdẹ rọ hẹ obi Juda; o de ze izobo vwẹ enu rẹ agbada; ọtiọye o ruru vwi Bẹtẹl, ro vwo ze izobo kẹ umuomuo rẹ erhuẹn ro duvwuru na. o dẹ phi irherẹn rẹ enu rẹ igbenu ro ruru na phihọ Bẹtẹl.

³³Ọ da yanran kpo obenu rẹ agbada rọ so phihọ Bẹtẹl na vwẹ ẹdẹ ihwiori rẹ orianre na, vwẹ emeranvwe ro rori vwẹ udu rọye; o de bru ẹdẹ orẹ kẹ ihwo rẹ Izrẹl, o de kpo obenu rẹ agbada ra torhẹ insẹns.