Read urhobo 1 Ivie 13 Bible Online

1 Ivie 13 - urhobo bible

1 Ivie 13

¹Nighere, ohwo rọ Ọghẹnẹ de nẹ Juda rhe ọ vẹ ota rẹ Ọrovwohwo rọ cha ta kẹ Bẹtẹl. Yi Jeroboam mudia vwẹ asan agbada ra da torhẹ insẹns.

²Ohwo na da vwẹ ota rẹ Ọrovwohwo bunu sohọ aghade na, ọ da ta, E agbada, agbada, enẹ Ọrovwohwo tare: Nighere, e che vwiẹ ọmọ vwẹ uwevwi ri Devid na, re se Josaya; kọ cha vwẹ irherẹn rẹ asan ro kpenu na re torhẹ insẹns vwẹ enu wẹ na vwo ze izobo vwẹ enu we; ka cha torhẹ ibeku rẹ ihwo vwẹ enu wẹ.

³O de phi oka phihọ otọ vwẹ ẹdẹ yena, tanẹ, Ọnana kọye re dia oka nẹ Ọrovwohwo tarọ nure: Nighere, e che kporo agbada na te otọ, iwurhie re hẹ enu rọye ejobi ke kuo kufia.

⁴Ọke rẹ ovie na vwo nyo eta rẹ ohwo rẹ ọfuanfon na, ro vwo bunu kpahe agbada ri Bẹtẹl na, Jeroboam da riẹnobọ rọye nẹ obọ agbada na rhe, tanẹ, Yọnrọn. Obọ rọye rọ riẹn kpahọ na, da ghwa yamu, ọtiọye na o gbi se sio rhivwi-i.

⁵Agbada na rhe e de kporo phihọ otọ, e de ku iwurhie rẹ agbada na kufia, kerẹ oka rẹ ohwo rẹ ọfuanfon djeri na vwẹ oma rẹ ota rẹ Ọrovwohwo.

⁶Ovie na da ta kẹ ohwo rẹ Ọghẹnẹ na, Gba rẹ Ọrovwohwo Ọghẹnẹ wẹn na kẹ vwẹ, re wọ nẹ ẹrhovwo kẹ vwẹ, rere obọ mẹ na vwo rhivwi kpo ẹdia. Ohwo rẹ ọfuanfon na da rẹ Ọrovwohwo; obọ rẹ ovie na de rhivwi kpo ẹdia, kirobo rọ epha jovwo.

⁷Ovie na da ta kẹ ohwo rẹ ọfuanfon na, Mọ re kpo rere wọ ra sasa oma wẹn, rere mi ru ẹse kẹ wẹ.

⁸ohwo rẹ ọfuanfon na da ta kẹ ovie na, Wọ da ghwẹ abọvo rẹ uwevwi wẹn kẹ vwẹ dede, mi se kpo uwevwi wẹ-ẹn. Me sa re emu eyẹ da ame vwẹ etinẹ-ẹ;

⁹kidie ọtiọye urhi wan oma rẹ Ọrovwohwo vuẹ vwẹ, tanẹ, Wọ ria emu-u eyẹ da ame-e, eyẹ wọ wan idjerhe ru wọ wan rhe na kpo-o.

¹⁰ọtiọye na ọ da wan idjerhe ọfa, o rhe rhivwi wan idjerhe rọ wan kpo Bẹtẹl na-a.

¹¹Vwẹ ọke yena ọmraro ọvo ro ghworo kọ dia Bẹtẹl. Emọ rọye de rhi gbe ikun kẹ obo rẹ ohwo rẹ ọfuanfon na ruru ejobi vwẹ ẹdẹ yena vwi Bẹtẹl; eta rọ ta kẹ ovie na ayen de gbe ayen kẹ ọsẹ rayen.

¹²Ọsẹ rayen da ta kẹ ayen, Idjerhe rhọ ọ wanre? Emọ rọye na de dje idjerhe rẹ ohwo rẹ ọfuanfon ro nẹ Juda rhe na wanre.

¹³Ọ da ta kẹ emọ rọye, Jẹn ufi phihọ ekẹtẹkẹtẹ na kẹ vwẹ. Ayen da jẹn ufi phihọ ekẹtẹkẹtẹ na kẹ ọ da ruo.

¹⁴Ọ da vwọ kpahọ ohwo rẹ ọfuanfon na, ọ da vwa ro tidia otọ rẹ ọhahe ọ da ta kẹ, Wẹ ohwo rẹ ọfuanfon ro nẹ Juda rhe na? ọ da ta, mẹvwẹ.

¹⁵Etiyin ọ da ta kẹ, Nene uvwe kpo rere wọ re emu.

¹⁶Ọ da ta, Me vẹ owẹ se rhivwi-i, eyẹ bru we ra-a; eyẹ me vẹ owẹ vwọ re emu eyẹ vwọ da ame vwẹ etinẹ-ẹ;

¹⁷kidie ota rẹ Ọrovwohwo vuẹ vwẹ nẹ, Wọ ria emu eyẹ da ame vwẹ etiyi-in, eyẹ wo rhivwi wan idjerhe re wọ wan ra-a.

¹⁸Ọ da ta kẹ, Mẹvwẹ je vwẹ ọmraro kirobo wọ epha, amakashe da rhe ta ota rẹ Ọrovwohwo kẹ vwẹ, tanẹ, Vwo rhivwi rhe uwevwi wẹn rere o re emu re ọ da ame. Ẹkẹvuọvo efian ọ vwọrọn kẹ.

¹⁹Ọtiọye na o de nene kpo, ọ da re emu vwẹ uwevwi rọye, ọ da da ame.

²⁰Ro vwo tidia vwẹ udemu na, ota rẹ Ọrovwohwo de bru ọmraro ro sere rhivwi na;

²¹o de kperi se ohwo rẹ ọfuanfon ro nẹ Juda rhe na, Enẹ Ọrovwohwo tare, Fikiridie wo mu ọghọ kẹ ota rẹ Ọrovwohwo-o, wọ je yọnrọn urhi rẹ Ọrovwohwo Ọghẹnẹ wẹn ji kẹ wẹ-ẹ,

²²ẹkẹvuọvo wo de rhivwi, ra re emu ra da ame vwẹ asan rọ ta kẹ wẹ nẹ, Wọ ria emu-u, wọ da ame-e; e rhe che shi orivwi wẹn phihọ ushi rẹ esẹ wẹ-ẹn.

²³Rọ vwọ re emu nu rọ vwọ da nu, ọ da jẹn ufi phihọ ekẹtẹkẹtẹ kẹ ọmraro ro se rhivwi na.

²⁴Rọ vwọ yanran re okpohrokpo da vwa vwẹ idjerhe o de hwe. ọ de phi orivwi rọye phihọ idjerhe, ekẹtẹkẹtẹ na de mudia kẹrẹ; okpohrokpo na de ji mudia kẹrẹ orivwi rọye.

²⁵Nighere, ihwo re wanvrẹn, da mrẹ orivwi rọye ro she phihọ idjerhe, okpohrokpo na mudia kẹrẹ orivwi rọye. Ayen da rhe vuẹ vwẹ obo orere rẹ ọmare rẹ ọmraro na dia.

²⁶Ọke rẹ ọmraro ro sere rhivwi na vwo nyo, ọ da ta, ọye ohwo rẹ ọfuanfon na, ro mu ọghọ kẹ ota rẹ Ọrovwohwo na-a; kọye Ọrovwohwo vwo siobọ no kẹ okpohrokpo, rọ chagherẹ hwe, kerẹ ota rẹ Ọrovwohwo ra ta kẹ.

²⁷ọ da ta kẹ emọ rọye, Wa jẹn ufi phihọ ekẹtẹkẹtẹ na kẹ vwẹ. Ayen da jẹ ufi na phihọ.

²⁸ọ da yanran ra mrẹ orivwi rọye ra kpare phihọ idjerhe, te ekẹtẹkẹtẹ na te okpohrokpo na mudia kẹrẹ orivwi rọye. Okpohrokpo na je re orivwi na-a. eyẹ ke chaghọ ekẹtẹkẹtẹ na-a.

²⁹Ọmraro na de mu orivwi rẹ ohwo rẹ ọfuanfon na o de muo kpahe ekẹtẹkẹtẹ na, o de muo rhivwi rhe obo orere, rhi vwere rere o sho.

³⁰ọ de sho orivwi rọye phihọ ushi rẹ obọ rọye; ayen de vwere, tanẹ, Eghwo, oniọvo mẹ!

³¹Ro vwo sho nu, ọ da ta kẹ emọ rọye, Mi de ghwu, we shi vwe phihọ ushi ọvuọvo re shi ohwo rẹ ọfuanfon na phihọ; wa ghwẹ ibeku mẹ kerẹ ibeku rọye.

³²Fiki rẹ ota rẹ Ọrovwohwo rọ ta kpahe agbada vwi Bẹtẹl, je vwọ kpahe iwevwi rẹ asan ri kpenu ejobi re hẹ orere ri Sameria na, ke cha phia.

³³Rẹ imu nana vwọ wan nu Jeroboam ji se kurhẹriẹ nẹ idjerhe ọbrabra rọye-e, ẹkẹvuọvo ọ je vwẹ irherẹn vwo mu phihọ asan ri kpenu na vwẹ ohri rẹ ihwo na; ọ ro jere ọye o vwo muẹ irherẹn vwẹ asan ro kpenu na.

³⁴Emu nana de rhi hirhe phihọ umwemwu kẹ uwevwi ri Jeroboam ọtiọye na kọye e vwo bro kufia ra vwọ ghwọrọ nẹ otọ rẹ akpọ na.