Read urhobo 1 Ivie 15 Bible Online

1 Ivie 15 - urhobo bible

1 Ivie 15

¹Asakiephana vwẹ ikpe rihwe gbe ẹrenre rẹ Ovie Jeroboam ọmọ ri Nebat, Abijam de mu ẹriọ phihọ vwi Juda.

²Ọ da re ikpe erha vwi Jerusalẹm. Odẹ rẹ oni rọye Maakah ọmọtẹ rẹ Abishalọm.

³Ọ de nene imwemwu rẹ ọsẹ rọye ru phihọ otọ jovwo; udu rọye gbe rha dia ọsoso vẹ uyota kẹ Ọrovwohwo Ọghẹnẹ rọye-e, kirobo rẹ udu ri Devid ọsẹ rọye epha.

⁴Ẹkẹvuọvo fiki ri Devid Ọrovwohwo Ọghẹnẹ rọye da vwẹ urhukpẹ kẹ vwi Jerusalẹm, ọ da vwẹ ọmọ rọye mu vwẹ ẹdia rọye, ọ da vwẹ uchivwo ri Jerusalẹm vi otọ kokoroko;

⁵fikiridie Devid ru obo ri shephihọ vwẹ obaro rẹ Ọrovwohwo, o gbobọnyẹ urhi ro ji kẹ vwẹ ẹdẹ rẹ akpọ rọye ejobi-i, jokpa rẹ ota rẹ Yuraya rẹ ohwo ri Hẹt na ọvo.

⁶Asakiephana ofovwi da rhe dia vwẹ uvwre ri Rehoboam vi Jeroboam vwẹ ẹdẹ rẹ akpọ rọye ejobi.

⁷Eyenre rẹ akpọ rẹ Abijam ro chekọ, kugbe obo ro ruru ejobi, e rhe si ayen phihọ Ọbe rẹ Ikun rẹ ivie ri Juda? Ofovwi da herọ vwẹ uvwre rẹ Abijam vi Jeroboam.

⁸Abijam de ghwu bru esẹ rọye; ayen de sho phihọ orere ri Devid. Asa rẹ ọmọ rọye de re vwẹ ẹdia rọye.

⁹Vwẹ ikpe uje ri Jeroboam ovie rẹ Izrẹl Asa de mu ẹriọ phihọ vwi Juda,

¹⁰ọ da re ikpe ujuvẹ gbe ọvo vwi Jerusalẹm. Odẹ rẹ oni rọye Maakah ọmọtẹ ri Abishalọm.

¹¹Asa de ru obo ri shephihọ vwẹ obaro rẹ Ọrovwohwo, kirobo ri Devid ọsẹ rọye ruru.

¹²ọ da guọghọ ẹgbẹ rẹ eshare de gbe igberadja nẹ otọ na, ọ da guọghọ ẹdjọ rẹ ọsẹ rọye mare ejobi.

¹³ọ da djẹ Maakah oni rọye nẹ ọ gbe dia oni rẹ ovie-e, fikiridie ọ vwo ẹdjọ ọbrabra ọvo ro mu phihọ Ashera; Asa da nyavwẹ ẹdjọ rọye na ọ da torhẹ vwẹ uto ri Kidrọn.

¹⁴Ẹkẹvuọvo o kporo asan ri kpenu na-a. Dede na udu rẹ Asa da dia uyota kpahe Ọrovwohwo vwẹ ẹdẹ rẹ akpọ rọye ejobi.

¹⁵Ọda ghwẹ ẹga rẹ ive rẹ ọsẹ rọye veri jovwo kugbe ive robọ rọye kpo uwevwi rẹ Ọrovwohwo, idọnọ efuanfon, oro, kugbe ekuakua.

¹⁶Ofovwi da hẹ uvwre rẹ Asa kugbe Baasha ovie rẹ Izrẹl vwẹ ẹdẹ rayen ejobi.

¹⁷Baasha ovie rẹ Izrẹl da vwọ so Juda, ọ da bọn Ramah, rere ohwo vwo jẹ ra eyẹ nẹ obọ rẹ Asa ovie ri Juda rhe.

¹⁸Etiyin Asa da reyọ ekuakua rẹ idọnọ efuanfon kugbe iro re jovwo vwẹ uwevwi rẹ efe rẹ uwevwi rẹ Ọrovwohwo na kugbe efe rẹ uwevwi rẹ ovie, ọ da vwẹ ayen kẹ idibo rọye, Ovie Asa de ji ayen bru Bẹnhadad ọmọ ri Tabrimọn, ọmọ ri Hẹziọn, ovie ri Siria, rọ dia Damaskọs, tanẹ,

¹⁹Yanrhe rere me vẹ owẹ mu ugbeyan kirobo rẹ ọsẹ mẹ vẹ owẹ ruru: nighe me phare ọko rẹ idọnọ efuanfon vẹ oro rhe we; yanran, wọ vẹ Baasha ovie rẹ Izrẹl ra fan ugbeyan, rere o vwo bi nẹ uvwe oma.

²⁰Bẹnhadad da rhọvwe kẹ Asa, o de ji inotu rẹ ofovwoi rọye re phi irere rẹ Izrẹl o de phi Ijọn, Dan, Abel-bet-maakah, kugbe Gbinnerọt ejobi kua, kugbe etọ ri Naftali ejobi.

²¹Ọke ri Baasha vwo nyo, o de gbobọnyẹ Ramah rọ bọn jovwo, ọ da ra dia Tirzah.

²²Etiyin ovie Asa de ghwoghwo vwi Juda ejobi, ohwo ọvuọvo nuro-o, ayen da ra ghwẹ ibieragha ri Ramah ejobi kugbe ephapha rọye, ri Baasha vwọ bọn; kẹ eye Ovie Asa vwọ bọn Geba ri Bẹnjamin kugbe Mizpah.

²³Asakiephana eyenre rẹ Asa ro chekọ, ẹgha rọye ejobi, kugbe obo ro ruru ejobi, kugbe irere rọ bọnre, e rhe si ayen phihọ Ọbe rẹ Ikun rẹ Iviẹ ri Juda? Ẹkẹvuọvo rọ rhe vwọ ghwore o de rhi hirhe phihọ ukpono.

²⁴Asa de ghwu bru esẹ rọye e de sho kugbe esẹ rọye vwẹ orere ri Devid ọsẹ rọye; Jehoshafat ọmọ rọye da re vwẹ ẹdia rọye.

²⁵Nadab ọmọ ri Jeroboam de mu ẹriọ phihọ vwi Izrẹl vwẹ ukpe rivẹ rẹ Asa ovie ri Juda; ọda re vwẹ Izrẹl ikpe ivẹ.

²⁶O de ru obo re brare vwẹ obaro rẹ Ọrovwohwo, ọ da vwọ kpahe idjerhe rẹ ọsẹ rọye, vẹ umwemwu rọye rọ vwọ nẹrhẹ Izrẹl ru umwemwu.

²⁷Baasha ọmọ rẹ Ahijah, rẹ uwevwi rẹ Isaka, da ro ẹro kpahọ; Baasha da ghwiẹ she vwi Gibbẹtọn, rẹ ihwo ri Filistia; Nadah vẹ ihwo rẹ Izrẹl ejobi kpo imu vwi Gibbẹtọn.

²⁸Ọtiọye Baasha de hwe ghwu vwẹ ukpe rerha rẹ Asa ovie ri Juda ọ da re vwẹ ẹdia rọye.

²⁹Rọ ghwa vwọ re ovie nu, o de hwe uwevwi ri Jeroboam ejobi; o rhe jẹ ohwo ọvuọvo vwo vwẹ uwevwi ri Jeroboamu-u, bẹsiẹ rọ vwọ guọghọ re, kerẹ ota rẹ Ọrovwohwo rọ wan unu rẹ odibo rọye Ahija rẹ ohwo ri Shilo ta;

³⁰fiki rẹ umwemwu ri Jeroboam ro ruru rọ vwọ nẹrhẹ Izrẹl ru umwemwu, ji kugbe obo rọ vwọ kpare Ọrovwohwo ophu, Ọghẹnẹ rẹ Izrẹl na.

³¹Asakiephana eyenre ri Nadab ro chekọ, kugbe obo ro ruru ejobi, e rhe si ayen phihọ Ọbe rẹ Ikun rẹ Ivie rẹ Izrẹl?

³²Ofovwi da herọ vwẹ uvwre rẹ Asa vi Baasha ovie rẹ Izrẹl vwẹ ẹdẹ rayen ejobi.

³³Vwẹ ikpe rerha rẹ Asa ovie ri Juda, Baasha ọmọ rẹ Ahija de mu ẹriọ phihọ vwẹ Izrẹl vwi Tirzah, ọ da re ikpe uje gbe ẹne.

³⁴O de ru obo re brare vwẹ obaro rẹ Ọrovwohwo, ọ da vwọ kpahe Jeroboam vwẹ umwemwu ro ruru rọ nẹrhẹ Izrẹl ru umwemwu.